राष्ट्र बैंकले २० अर्ब तरलता प्रशोचन गर्ने

A+ A A-

बैङ्किङ प्रणालीमा तरलता बढ्दै गएपछि नेपाल राष्ट्र बैङ्कले २० अर्ब रुपैयाँ तरलता प्रशोचन गर्ने भएको छ । राष्ट्र बैङ्कले रिभर्स रिपोमार्फत् बजारबाट बिहीबार २० अर्ब रुपैयाँ राष्ट्र बैङ्कको ढुकुटीमा तानेको हो ।

मुलुकमा कोरोना सङ्क्रमणसँगै गरिएको लकडाउनले बैङ्किङ प्रणालीमा तरलता बढ्दै गएको छ । बैङ्किङ प्रणालीमा अहिले एक खर्ब ९१ अर्ब रुपैयाँ हाराहारीमा तरलता रहेको राष्ट्र बैङ्कले जनाएको छ । कर्जा प्रवाह न्यून हुँदा लगानीयोग्य रकम लगातार बढ्दै गएको छ ।

सोही कारण तरलता सन्तुलन राख्न बिहीबार २० अर्ब रुपियाँको तरलता प्रशोचन गर्ने अवस्थामा केन्द्रीय बैङ्क पुगेको हो ।

राष्ट्र बैङ्कले बिहीबार जारी गरेको सूचनाअनुसार जारी गरिएको ७ दिने अवधिको यस रिभर्स रिपो साउन १५ गते परिपक्व हुनेछ ।

रिपो खरिदका लागि मास्टर्स रिपर्चेज एग्रिमेन्ट अनिवार्य हुनुपर्ने राष्ट्र बैङ्कले जनाएको छ । रिभर्स रिपो लिन चाहने बैङ्क तथा वित्तीय संस्थालाई बिहीबार दिउँसो २ः०० बजेसम्म अनलाइन बिडिङमार्फत् आवेदन गर्नसक्ने व्यवस्था गरिएको थियो ।

बैङ्किङ प्रणालीमा लगानीयोग्य पुँजी (तरलता) अत्यधिक भएपछि राष्ट्र बैङ्कले तरलता प्रशोचन (वित्तीय प्रणालीबाट खिच्ने) रिभर्स रिपो जारी गर्दै आएको छ ।

आर्थिक वर्ष २०७६/७७ को ११ महिनामा रिपोमार्फत् ११५ अर्ब ८७ करोड र स्थायी तरलता सुविधामार्फत् १०३ अर्ब २८ करोड गरी कुल २१९ अर्ब १५ करोड तरलता प्रवाह भएको छ ।

अघिल्लो वर्षको सोही अवधिमा रिपोमार्फत् १४१ अर्ब २९ करोड र स्थायी तरलता सुविधामार्फत् १४६ अर्ब २८ करोड गरी कुल २८७ अर्ब ५७ करोड तरलता प्रवाह भएको थियो ।

आर्थिक वर्ष २०७६/७७ को ११ महिनामा खुला बजार कारोबारमार्फत कुल ७८ अर्ब तरलता प्रशोचन गरिएको छ । अघिल्लो वर्षको सोही अवधिमा १०० अर्ब ३५ करोड तरलता प्रशोचन गरिएको थियो ।

समीक्षा अवधिमा राष्ट्र बैङ्कले विदेशी विनिमय बजार (वाणिज्य बैङ्क) बाट अमेरिकी डलर ३ अर्ब ५९ करोड खुद खरिद गरी ४१७ अर्ब ३३ करोड तरलता प्रवाह गरेको छ ।

अघिल्लो वर्षको सोही अवधिमा विदेशी विनिमय बजारबाट अमेरिकी डलर २ अर्ब ९२ करोड खुद खरिद गरी ३ सय ३० अर्ब ७२ करोड तरलता प्रवाह गरिएको थियो ।

समीक्षा अवधिमा अमेरिकी डलर ३ अर्ब ४८ करोड बिक्री गरी ४०१ अर्ब तीन करोड बराबरको भारतीय रुपैयाँ खरिद गरिएको छ ।

अघिल्लो वर्षको सोही अवधिमा अमेरिकी डलर ३ अर्ब ९० करोड र अन्य परिवत्र्य विदेशी मुद्रा बिक्री गरी ४ सय ७८ अर्ब १४ करोड बराबरको भारतीय रुपैयाँ खरिद गरिएको थियो ।

प्रकाशित मिति: शुक्रबार, साउन ९, २०७७ ०७:२७