प्रदेश ५ सरकारले खर्चियो ७० प्रतिशत बजेट

A+ A A-

प्रदेश ५ सरकारले गत आव २०७६/०७७ मा ७० प्रतिशत बजेट खर्च गरेको छ ।

जसमध्ये पूँजीगततर्फ ७९.२९ र चालुतर्फ ६०.५४ प्रतिशत खर्च भएको आर्थिक मामिला तथा योजना मन्त्रालयका प्रवक्ता जनार्दन पौडेलले जानकारी दिए । गत वर्ष ३६ अर्ब ४१ करोड ६८ लाख रुपैयाँ विनियोजन भएको थियो । ७ प्रदेशमध्ये प्रदेश ५ मा पूँजीगततर्फ सबैभन्दा धेरै खर्च भएको छ ।

मन्त्रालयगत विवरणअनुसार, मुख्यमन्त्री तथा मन्त्रिपरिषद् कार्यालयले ५२.६० प्रतिशत बजेट खर्च गरेको छ । आर्थिक मामिला तथा योजना मन्त्रालयले ४१ प्रतिशत बजेट खर्च गरेको प्रदेश लेखा नियन्त्रण कार्यालयले जनाएको छ । उक्त मन्त्रालय मुख्यमन्त्री शंकर पोखरेलले नै नेतृत्व गरेका छन् । पूँजीगततर्फ ३६ प्रतिशत र चालु तर्फ ४४ प्रतिशत खर्च भएको बताइएको छ । गत वर्ष ५२ प्रतिशत खर्च भएको थियो ।

त्यस्तै, उद्योग, पर्यटन वन तथा वातावरण मन्त्रालयले ६९.५८ प्रतिशत बजेट खर्च गरेको छ । कुल बजेट २ अर्ब ८८ करोड बजेटमध्ये पूँजीगततर्फ ७२ प्रतिशत र चालुतर्फ ६६ प्रतिशत खर्च भएको कोष तथा लेखा नियन्त्रण कार्यालयको तथ्याङ्गमा उल्लेख छ ।

भूमि व्यवस्था, कृषि तथा सहकारी मन्त्रालयले ४१.५५ प्रतिशत खर्च गरेको छ । आर्थिक वर्ष ०७६/०७७ मा लागि ४ अर्ब ७६ करोड बजेट विनियोजित भएकोमा पूँजीगततर्फ ३६ प्रतिशत र चालुतर्फ चाहिँ ४२ प्रतिशत खर्च भएको छ ।

त्यसैगरी, आन्तरिक मामिला तथा कानुन मन्त्रालयले ३२.९९ प्रतिशत बजेट खर्च गरेको छ । ८० करोड बजेट छुटाएको मन्त्रालयमा पूँजीगततर्फ २४ प्रतिशत चालूतर्फ ४६ प्रतिशत खर्च भएको छ ।

त्यस्तै, भौतिक पूर्वाधार विकास मन्त्रालयले ८३.१८ प्रतिशत बजेट खर्च भएको छ । १५ अर्ब ८४ करोड बजेट छुटाएकोमा ८३ प्रतिशत खर्च भएको हो । सामाजिक विकास मन्त्रालयले ७६.८६ प्रतिशत खर्च गरेको छ । ४ अर्ब ३९ करोड रहेकोमा पूँजीगततर्फ ७४ प्रतिशत र चालू खर्चतर्फ ८८ प्रतिशत खर्च भएको बताइएको छ । त्यस्तै, मुख्य न्यायाधिवक्ताको कार्यालयले ६७.९१ प्रतिशत खर्च भएको छ ।

त्यसैगरी, प्रदेशको आन्तरिक राजस्व लक्ष्यको ७३.९३ प्रतिशत संकलन भएको छ । प्रदेश सरकारले ४ अर्ब १२ करोड २५ लाख राजस्व संकलनको लक्ष्य लिएकोमा ३ अर्ब ४ करोड ९१ लाख १२ हजार ९ सय संकलन गर्न सफल भएको छ । प्रदेश सरकारका प्रवक्ता बैजनाथ चौधरीले कोरोनाकै बीच पनि ७० प्रतिशत खर्च उत्साहजन रहेको बताए ।

प्रकाशित मिति: बिहीबार, साउन ८, २०७७ १३:५७