बुद्धभूमिका स्थानीयको आरोप– वडाध्यक्षको स्वार्थमा विकासनिर्माण

A+ A A-

कपिलवस्तुको बुद्धभूमि नगरपालिका–१ मा जनताको आवश्यकताका आधारमा नभई वडा अध्यक्षको स्वार्थमा विकास निर्माणको काम भइरहेको स्थानीयले आरोप लगाएका छन् ।

अहिल वडा नम्बर १ को राजकुडा सामुदायिक वनमा वहुउद्देस्यीय भवन र मन्दिर निर्माण भइरहेको छ । सोही विषयलाई लिएर स्थानीयले विरोध गरेका छन् ।

वडा नं. १ को वीरपुर क्षेत्रमा सिचाई, खानेपानी, सडक ग्राभेलको योजना आवश्यकता भएकोमा अनावश्यक रुपमा बहुउद्देस्यीय भवन निर्माण र मन्दिर बनाएको आरोप त्यहाँका स्थानीय गौरीप्रसाद बञ्जाडेले बताए ।

जिल्ला वन कार्यालय कपिलवस्तुको स्वीकृतपछि राजकुडा सामुदायिक वनको जग्गामा अहिले नगरपालिका र वनको आर्थिक सहयोगमा वहुउद्देस्यीय भवन निर्माणको काम भइरहेको छ ।

स्थानीय बञ्जाडेकाअनुसार वनभित्र कभर्ड हलको आवश्यकता नभएपनि लाखौं रकम खर्च गरेर कभर्ड हल निर्माण भइरहेको हो ।

स्थानीयले बहुउद्देस्यीय हल र मन्दिरमा लाखौं रकम खर्च गर्नुको सट्टा शिवालयदेखि पोदिनी टोलसम्म सडक ग्राभेल, बेतानीमा पानी, तिनमहेरी देखि धैरेसीसम्मको सडक ग्राभेल आवश्यकता रहेको बताएका छन् ।

गत बर्ष देखि सामुदायिक वनको जग्गामा बहुउद्देस्यीय भवन निर्माण भइरहेको छ । बुद्धभूमि नगरपालिकाको १५ लाख, वडा नं. १ बाट १० लाख र वनको ५ लाख गरी ३० लाखमा भवन निर्माण भइरहेको छ ।

सुरुवातको चरणमा सिंगल कोटसहितको बहुउद्देस्यीय भवन निर्माणका लागि १४ लाख रकम खर्च भएकोमा दोस्रो चरणका लागि ३० लाखको काम भइरहेको बुद्धभूमि नगरपालिका वडा नं. १ का अध्यक्ष तेज बहादुर बस्नेतले बताए ।

वन कार्यालयबाट स्वीकृत भएपछि वनको सामुदायिक भवन र त्यसैमा कभर्ड हल समेत बनाउने गरी योजनाको काम अगाडि बढेको उनले बताए । उनले सिँचाई र सडक ग्राभेलमा बर्सेनि रकम छुट्टाएर काम भइरहेको बताए ।

कुल ७० लाखको लागत स्टेटमेन्ट मध्ये ४४ लाखमा सो भवन निर्माण सम्पन्न हुने उनले बताए । पछिल्लो चरणको ठेक्का बुटवलको मनोज इन्जिनियरले ३० लाखमा ल्याएका छन् ।

राजकुडा सामुदायिक वनका अध्यक्ष मिन बहादुर थापाले वन कार्यालयबाट स्वीकृत भएपछि कार्यालयको भवन सँगै कभर्ड हल प्रयोग हुने गरी निर्माणको काम भइरहेको उनले बताए ।

त्यस्तै वडाले सुपादेउराली मन्दिरका नाममा पनि बर्सेनि रकम खर्च गरेको आरोप स्थानीयको छ । वडा अध्यक्षले उपभोत्ता समिति आफैँ गठन गर्ने र आफ्नै मान्छेलाई समितिमा राखेर रकम कुम्ल्याउने गरी बर्सेनि बजेट मन्दिरमा पार्ने गरेको नाम नभन्ने सर्तमा एक स्थानीयले बताए ।

तर वडा अध्यक्ष बस्नेतले भने स्थानीयले आरोप लगाएजस्तो बर्सेनि बजेट भने नपरेको बताए ।

उनले गत आर्थिक वर्ष र चालु आर्थिक वर्षमा मन्दिरका लागि एक रुपैयाँ पनि बजेट विनियोजन नभएको प्रष्ट पारे । विरोध गर्नका लागि मात्र स्थानीयले बाहना बनाएको उनको भनाई छ ।

उनले वडामा योजना ल्याउँदा सबै आवश्यकताका आधारमा ल्याएको र त्यो सबै जनताकै लागि भएको हुँदा विरोध गर्नुको कुनै पनि अर्थ नभएको बताए ।

प्रकाशित मिति: बुधबार, साउन ७, २०७७ १२:४७