काठमाडौं आवतजावत गर्ने मुख्य राजमार्ग नै ठप्प, विकल्प त्रिभुवन राजपथ

A+ A A-

अविरल वर्षासँगै आएको बाढीपहिरोका कारण संघीय राजधानी काठमाडौं आवतजावत गर्ने मुख्य राजमार्ग अनिश्चितकालका लागि ठप्प भएको छ ।

धादिङको गल्छीदेखि मुग्लिन–नारायणगढ सडकखण्डको चार किलोसम्मका दर्जर्नौं स्थानमा पहिरो खसेपछि काठमाडौं आवतजावत गर्ने मुख्य पुथ्वी राजमार्ग ठप्प भएको हो । प्रदेश प्रहरी कार्यालयका अनुसार दर्जनौँ ठाउँमा पहिरो खसेपछि अवरुद्ध राजमार्ग कहिले खुल्ने निश्चित हुन सकेको छैन ।

चितवनदेखि धादिङका विभिन्न स्थानमा पहिरो जाँदा राजमार्ग अवरुद्ध भएको हो । राजमार्गको चितवन क्षेत्रमा मात्रै सानाठूला गरी दर्जनभन्दा बढी पहिरो गएको छ । फिस्लिङ बजार, मौवाखोलामा साना ठूला गरी धेरै पहिरो गएको छ । धादिङको फुर्केखोला, गलौंदी, गल्छीको महेशखोला क्षेत्रमा पनि पहिरो भएको छ ।

पृथ्वी राजमार्गअन्तर्गत धादिङको मौवाखोला पुल भत्काएको छ । बाढीका कारण पुल पूरै भाँचिएको छ । पुल भाँचिएपछि राजमार्ग अनिश्चितकालका लागि ठप्प भएको प्रहरीले जनाएको छ । पुथ्वी राजमार्ग हुँदै पूर्वदेखि पश्चिमका नागरिक आवतजावत गर्छन् । यो राजमार्गबाट दैनिक हजारौँ यात्रुवाहक, मालवाहक सवारीसाधन गुड्ने गरेका छन् ।

विकल्पमा मकवानपुरको त्रिभुवन राजपथ

पृथ्वी राजमार्ग अवरुद्ध भएपछि काठमाडौं आवतजावत गर्न वैकल्पिक मार्गको रूपमा मकवानपुरको त्रिभुवन राजपथ छ ।

नेपालकै पुरानो त्रिभुवन राजपथबाट बागमती प्रदेशको मुकाम हेटौँडाबाट पालुङ हँदै धादिङको नौबिसे पुगिन्छ । वर्षाले देशका थुप्रै मुख्य सडक सञ्जालहरू ठप्प भए पनि त्रिभुवन राजपथ भने अवरुद्ध छैन । त्रिभुवन राजपथबाट मालवाहक सवारीसाधन पनि गुड्न सक्छन् ।

विगतका वर्षमा पृथ्वी राजमार्ग अवरुद्ध हुँदा त्रिभुवन राजपथ नै प्रयोग हुँदै आएको थियो । त्रिभुवन राजपथ काठमाडौंलाई तराईसँग जोड्ने वैकल्पिक राजमार्ग हो ।

प्रकाशित मिति: सोमबार, साउन ५, २०७७ १९:३७