पहिरोले दोबिल्लाको पुल र बस्ती जोखिममा

A+ A A-

पोखराको दक्षिण-पूर्वी क्षेत्रलाई जोड्ने दोबिल्लास्थित फुस्रे खोलामा रहेको पुल बाढीपहिरोका कारण जोखिममा परेको छ । पोखरा महानगरपालिका-१७ र २१ जोड्ने फुस्रे खोलामा बनेको पुलनजिकैको भाग पहिरोले बगाएका कारण जोखिम बढेको हो ।

अविरल वर्षाका कारण पुल निर्माण गरिएको ठाउँनजिकै ठूलो पहिरो गएका कारण त्यस क्षेत्रको बस्ती र सडकसमेत जोखिममा परेको स्थानीयले बताएका छन् ।

पोखरामा १ सातादेखि परेको अविरल वर्षासँगै फुस्रे खोलामा आएको बाढीले किनाराको भाग धसाएका कारण पहिरो जाँदा स्थानीय प्रताप राना मगरको शौचालय, गोबर ग्यास र गोठ बगाएको छ । गत ३१ असारको राति परेको मुसलधारे वर्षाले मगरको घर पछाडिको १० मिटरभन्दा धेरै जमिन खोलाले बगाएको हो ।

दोबिल्ला पुलनजिकै रहेको घरमा पहिरोको जोखिम बढेपछि घर छोडेर अन्यत्र बस्ने गरेको रानामगरले बताए । ‘मुसलधारे वर्षासँगै आएको पहिरोले घर पछाडि सबै जमित बगाएछि घर नै जोखिममा परेपछि घर नै छाडेर अन्यत्र बस्न थालेका छौँ,’ उने भने, ‘पहिरोका कारण दोबिल्ला पुलसँगै पूरै बस्ती पहिरोले जोखिममा परेको छ ।’

पहिरोका कारण दोबिल्ला पुलसँगै पूरै बस्ती जोखिममा परेको स्थानीय समाजसेवी अशोक रायमाझी बताउँछन् । समाजसेवी रायमाझी भन्छन्, ‘पहिरोले पुल र वस्ती पूरै जोखिममा परेको छ । दोबिल्लाको सडक र बस्तीमा गरी २ सय मिटर जति कटान भएको छ ।’

वर्षासँगै आएको बाढी पहिरोका कारण यस क्षेत्रका ३५ घर जोखिममा परेका हुन् । बढ्दो जोखिमपछि यहाँका बासिन्दाले स्थानीय प्रशासन र जनप्रतिनिधिलाई जोखिम बारे जानकारी गराएका छन् ।

स्थानीयले बाढीपहिरोले बस्ती नै जोखिममा परेको जानकारी गराएपछि प्रदेशसभा सदस्य कृष्ण थापासहित वडाका प्रतिनिधिले बस्ती र पुलको निरीक्षण गरेको स्थानीय राम थापाले बताए ।

तर, जुन गतिमा जोखिम व्यवस्थापनका लागि काम गर्नुपर्ने हो, त्यो भने हुन नसकेको उनको गुनासो छ । जनप्रतिनिधिले वर्षाको समयमा केही गर्न नसक्ने भन्दै सुरक्षित रहन सुझाव दिएको स्थानीयको भनाइ छ ।

दोबिल्ला क्षेत्रको बस्ती, सडक र पुल विगत केही वर्षदेखि लगातार पहिरोको प्रकोपमा पर्दै आएको छ । फुस्रे खोलाले बर्सेनि कटान गर्दै जाँदा त्यस क्षेत्रको सडक समेत भासिएको छ । जिल्लाका दक्षिणपूर्वी भेग जोड्ने त्यो सडक हुँदै दैनिक सयौँ यातायातका साधन गुड्ने गरेका छन् । जोखिम व्यवस्थापन गर्नतर्फ समयमै सम्बन्धित निकायले चासो नदिँदा कुनै पनि बेला पुल र बाटो भत्कने अवस्थामा छ ।

विगत वर्षमा पनि निर्वाचित जनप्रतिनिधिले त्यो क्षेत्रको निरीक्षण गर्ने र आसश्वान दिँदै आएका थिए । तर, जनप्रतिनिधिको त्यस क्षेत्रमा बाक्लो आवतजावत भए पनि समस्या भने ज्यूँका त्यूँ छ ।

सडक डिभिजन कार्यालयले खोलामा थालेको तटबन्ध निर्माणको काम पनि अधुरो छ । तटबन्ध निर्माण समयमा पूरा भएको भए बाढी पहिरोको जोखिम कम भई बस्ती सुरक्षित हुने सक्ने स्थानीयको आँकलन छ ।

बस्तीसहित पुल जोगाउनका लागि गुरुयोजना बनाउन पनि स्थानीयले माग गरेका छन् । बाढीबाट जोगाउन खोलामा तटबन्धसँगै चेकड्याम पनि निर्माण गरिनुपर्ने स्थानीय बासिन्दा बताउँछन् ।

पोखरा सहित देश विदेशका पर्यटकहरुका लागि समेत यो क्षेत्र आकर्षक मानिन्छ । ओशो उपवन, सहारा फुटवल क्लब, पिकनिक स्पटसहित घुम्नलायक ठाँउहरूबाट नजिकै दोबिल्लाको बस्ती छ ।

वडा नं १७ मा पर्ने यो बस्तीमा ५ दशकभन्दा पहिलेदेखि बसोबास हुँदै आइरहेको छ । फुस्रे खोलामा पुल निर्माण भएदेखि कास्कीको दक्षिण पूर्वी भेग निर्मलपोखरी, भरतपोखरी, तनहुँ, स्याङ्जाको पूर्वपश्चिम, भू-भागसहित र पोखरा आउजाउ गर्ने गाडीको बढ्दो चाप नियन्त्रमा समेत यस सडकलाई वैकल्पिक सडकका रूपमा प्रयोग गरिँदै आएको छ ।

प्रकाशित मिति: सोमबार, साउन ५, २०७७ १४:४४