विद्यालय शिक्षामा 'साँढेको जुधाइ बाच्छोको मिचाइ'

A+ A A-

निजी विद्यालयहरूले १ साउनदेखि वैकल्पिक शिक्षण सिकाइ बन्द गरे । शुल्क उठाउन नपाउँदा र सरकारले सहुलियत दरमा ऋण उपलब्ध नगराएकाले निजी विद्यालयहरूले वैकल्पिक शिक्षण सिकाइ बन्द गरेका हुन् । त्यसको ४ दिनपछि शिक्षा, विज्ञान तथा प्रविधि मन्त्रालयले वैकल्पिक शिक्षण सिकाइलाई निरन्तता दिन आग्रह गर्‍यो ।

यो पनि पढ्नुहोस

निजी विद्यालयको वैकल्पिक शिक्षण सिकाइ बन्द, शिक्षक-कर्मचारी बेतलबी घर बिदामा

शिक्षण सिकाइलाई निरन्तरता नदिने

तर निजी विद्यालयहरूले माग पूरा नभएसम्म वैकल्पिक शिक्षण सिकाइलाई निरन्तरता नदिने स्पष्ट पारेका छन् । ‘मन्त्रालयको विज्ञप्तिले पनि केही सम्बोधन गरेन,’ एनप्याब्सन महासचिव सुवास न्यौपानेले भने, ‘सहुलियत दरमा ऋणको व्यवस्था विज्ञप्तिमा पनि आएन । मौद्रिक नीतिमा पनि परेन । अरुलाई मेन्सन भएर आयो । तर निजी विद्यालयका लागि आएको छैन ।’

शिक्षामन्त्री गिरिराजमणि पोखरेलको अकर्मण्यताले समस्या भएको उनले बताए । ‘शिक्षामन्त्रीको कमजोरी हो । उहाँमा नेतृत्वको असक्षमता देखियो । आलटाल र अलमल गर्न मात्र खोजियो । यसले ठूलो क्षति हुन सक्छ ।’

आन्दोलन जारी रहने

माग पूरा नभएसम्म आन्दोलन जारी रहने उनले बताए । ‘माग पूरा नभएसम्म शिक्षण सिकाइलाई निरन्तरता दिन सकिँदैन । सरकारले भन्दा पहिले नै वैकल्पिक शिक्षण सिकाइ हामीले सुरु गरेका हौँ । यसलाई रोक्न खोजेको होइन । तर सरकारकै कारण समस्या भएको हो,’ उनले भने ।

सिकाइलाई निरन्तरता दिनू : सरकार

शिक्षा मन्त्रालयका प्रवक्ता दीपक शर्माले जारी गरेको विज्ञप्तिमा निजी विद्यालयले लिएको ऋणको सावाँ र ब्याजको विषयमा सम्बोधन गरिएको उल्खेख छ । ‘माैद्रिक नीतिमा शिक्षालगायतका व्यवसायले लिएको ऋणको सावाँ र ब्याज लकडाउन अवधिमा भुक्तानी गर्न कठिनाइ भएको अवस्थालाई दृष्टिगत गरी कर्जा भुक्तानीको म्याद कर्जाको पुर्नसंसरचना गर्ने व्यवस्था गरिएको छ,’ विज्ञप्तिमा भनिएको छ । मन्त्रालयले वैकल्पिक शिक्षण सिकाइ नरोक्न निजी विद्यालयलाई आग्रहसमेत गरेको छ ।

विद्यार्थी मारमा

सरकार र निजी विद्यालयका कारण विद्यार्थी र अभिभाव मारमा परेका छन् । सरकारले भनेको मान्ने कि विद्यालयले भनेको मान्ने भन्नेमा अभिभावक दोधारमा छन् । शिक्षण सिकाइ अवरुद्ध हुँदा निजी विद्यालयका २५ लाख बालबालिका प्रभावित भएका छन् ।

निजीको समस्या विद्यालय र अभिभावकको हो

शिक्षाविद् डा. विद्यानाथ कोइरालाले निजीको शुल्कको विषय विद्यालय र अभिभावकलाई दिइनुपर्ने बताए । ‘यो विद्यालय र अभिभावक बसेर मिलाउन सकिने विषय हो । अभिभावकसँग छलफल गर्न दिनुपर्छ । शुल्क तिर्न अभिभावक तयार छन् । कोही अभिभावक पूरै तिर्न सक्ने होलान्, कोही आधा दिने होलान्, कोही थोरै दिन सक्लान्, कोही दिनै नसक्ने पनि होलान् । शुल्क नै नलिनू भन्नु भनेको मुर्ख्याइँ हो,’ उनले भने ।

निजी विद्यालय र शिक्षक र कर्मचारीबीच सहमति

४ महिनादेखि तलब नपाएको भन्दै आन्दोलनमा उत्रेका निजी विद्यालयका शिक्षक कर्मचारी र विद्यालय सञ्चालबीच सहमति भएको छ । प्याब्सन, एनप्याब्सन र इस्टु राष्ट्रिय समितिबीच सहमति भएको हो । विद्यालय सञ्चालकले शिक्षक कर्मचारीलाई बेतलबी घर बिदामा नराख्ने र शिक्षक कर्मचारीले आन्दोलनका कार्यक्रम फिर्ता लिने सहमति भएको छ ।