वाह ! विद्युतीय सडक बत्तीले झिलीमिली सिक्स लेन (फोटो फिचर)

A+ A A-

बुटवलको राजमार्ग चौराहदेखि तिलोत्तमाको ड्राईभर टोलसम्म जडान गरिएका सौर्य सडक बत्ती निष्प्रभावी भएपछि बुटवल–बेलहिया सडक खण्डमा अहिले विद्युतीय सडक बत्ती जडान गरिएको छ ।

पहिरो चरणमा जडान गरिएका सौर्य बत्तीले २ वर्षसम्म पनि राम्रोसँग काम नगरेपछि अहिले ड्राइभरटोलदेखि कोटिहवासम्म विद्युतीय सडक बत्ती जडान गरिएको हो ।

बुटवल बेलहिया सडक खण्डमा दायाँ र बाँया हरियाली बनाउने अभियान थालेको तिलोत्तमा नगरपालिकाले अहिले आफ्नै सक्रियतामा विद्युतीय बत्ती जडान गरी सडक नै झिलिमिली बनाएको छ । सडकबत्ती बलेसँगै रातिको समयमा सिक्सलेनको ड्राइभर टोल–कोटिहवा खण्ड झिलिमिली देखिन्छ ।

सिक्स लेनको उत्तरी खण्डमा राखिएका सौर्यबत्ती निष्प्रभावी भएपछि तिलोत्तमा नगरपालिकाले आफ्नो क्षेत्रको बाँकी सडकमा विद्युतीय सडकबत्ती राख्न सम्बन्धित सडक आयोजनालाई आग्रह गरेको थियो ।

नगरपालिकाले विद्युत् प्राधिकरणसँग विद्युत महसुल तिर्ने सम्झौता गरेपछि मात्र सिक्स लेन सडकमा विद्युतीय सडक बत्ती सम्भव भएको हो ।

तिलोत्तमाको योेगिकुटीदेखि ड्राइभरटोलसम्म र कोटिहवा दक्षिणको बाँकी भागमा पनि विद्युतीय सडकबत्तीको जडान हुने नगर प्रमुख बासुदेव घिमिरेले जानकारी दिए ।

आयोजनाले योगिकुटीदेखि ड्राइभर टोलसम्म छिट्टै नै सौर्य बत्ती हटाएर विद्युतीय बत्ती जडान गर्ने समेत बताएको छ ।

बुटवल—बेलहिया ‘सिक्सलेन’ सडकमा दुई वर्ष अगाडि जडान गरिएका सौर्यबत्ती बल्न छाडेका छन् । १० वर्षका लागि भनेर जडान गरिएका सोलार बत्ती सडक निर्माण पूरा नहुँदै बिग्रिएपछि विद्युतीय सडकबत्तीको अवधारणा आएको हो ।

सिक्स लेनको डिभाइडर र दुवैतर्फको सर्भिस लाइनमा विद्युत बत्ती जडान गरिएको छ ।

मुख्य डिभाइडरमा ३०/३० मिटरको अन्तरमा पोल राखिएको भने सर्भिस लेनमा विद्युतकै पोलमा बत्ती जडान गरिएको छ । एउटा पोलको दायाँ–बाँया १ सय ५० वाटका दुईवटा बल्ब राखिएको छ ।

‘सर्भिस लेन’ मा ४० वाटका बल्बहरू राखिएको छ । सडकको डिभाइडरमा बल्ने बत्तीको महसुल नगरपालिकाले र सर्भिस लेनमा बल्ने बत्तीको महसुल सम्बन्धित टोल विकास संस्थाले व्यहोर्नेछन् ।

दुई वर्षसम्म सडकबत्तीको मर्मतसम्भारको जिम्मेवारी ठेकेदार कम्पनीले लिएको नगरपालिकाले जनाएको छ । डिभाइडरको लागि ५ तथा सर्भिसलेनको लागि १५ स्थानमा विद्युत् कन्ट्रोलर राखिएको छ ।

स्वचालित सडक बत्ती अँध्यारो भएपछि सेन्सरले बल्ने र उज्यालो भएपछि आफैँ निभ्नेछन् ।