सडक कालोपत्रे गरेको २ दिनमै खाल्डा

A+ A A-

पासाङल्हामु सडक मर्मत गरेको २ दिनमै खाल्डैखाल्डा परेको छ । वर्षातको समयमा हतारमा काम गरेर बजेट सक्ने चटारोमा यस्तो भएकोमा स्थानीयले गुनासो गरेका छन् ।

पासाङल्हामु सडकको त्रिशूली कालिकास्थान सडकखण्ड अन्तर्गतको कालिकास्थान बजार क्षेत्रमा जानुकादेवी कन्स्ट्रक्सनले काम गर्ने जिम्मा पाएको थियो । ‘वर्षातको समयमा हतारोमा झारा टार्नेजस्तो काम भयो,’ कालिका गाउँपालिका-२ का नागरिक अगुवा झङ्कनाथ न्यौपानेले भने, ‘कालिकास्थान बजारजस्तो ठाउँमा पनि सडक पिच गरेको दुई दिन टिकेन भने अन्यत्र के होला ?’

जानुकादेवी कन्स्ट्रक्सनले १९ स्क्वायर मिटर सडक मर्मतको जिम्मा पाए पनि काम पूरा नगरेकाले भुक्तानी रोकेको सडक विभाग नुवाकोटले जनाएको छ । ६ महिना अगाडि नै टेन्डर भए पनि ठेकेदारले समयमा काम नथालेकाले वर्षात्को समयमा काम गर्दा कालोपत्रे उप्केको सडक विभागका इन्जिनियर राजेन्द्र श्रेष्ठले बताए ।

कालिकास्थानको गन्तव्य पेट्रोल पम्पनजिकै नाली र ह्युमपाइप नभएकाले पनि समस्या भयो, सडक पिच उप्केको हो, अब सडक विभागले मर्मत गर्छ, श्रेष्ठले बताए ।

सडक विभागले उत्तरगया कन्स्ट्रक्सनका घनबहादुर गुरुङ र जानुकादेवी कन्स्ट्रक्सनका लेखनाथ अधिकारीलाई सो सडक मर्मतको काम जिम्मा दिएको थियो । लागत इस्टिमेटअनुसार काम नगरेकाले भुक्तानी रोकेको सडक विभागले जनाएको छ ।

कालोपत्रे मर्मत पुनः सुरु गर्न लागेको सडक विभाग नुवाकोटका इन्जिनियर राजेन्द्र श्रेष्ठले बताउनुभयो । एक÷दुई सातामा सामग्री ल्याएर पुनः मर्मत थाल्ने श्रेष्ठले जानकारी दिए ।

सडक मर्मत गर्नेबित्तिकै भत्केको विषयले निकै चर्चा पाएको छ । यो विषयमा सामाजिक सञ्जालमा पनि टीकाटिप्पणी भएका छन् ।

प्रकाशित मिति: आइतबार, साउन ४, २०७७ ०६:४५