नेपालमा ५ हजार ८ सय सक्रिय संक्रमित, कुन प्रदेशमा कति ?

A+ A A-

नेपालमा कोरोना भाइरस सक्रिय संक्रमितको संख्या ५ हजार ८ सय २५ जनामा झरेको छ ।

यो कुल संक्रमितको संख्यामध्ये ३३ दशमलव २८ प्रतिशत हो । गत १६ असारमा सबैभन्दा धेरै सक्रिय संक्रमित १० हजार ३ सय ४१ जना पुगेको थियो ।

सक्रिय संक्रमितमध्ये प्रदेश १ मा ७९, २ मा १ हजार ८ सय ४४, बाग्मती प्रदेशमा ४ सय ११, गण्डकी प्रदेशमा ४ सय ८ जना आइसोलेसनमा उपचाररत रहेको स्वास्थ्य तथा जनसंख्या मन्त्रालयले जनाएको छ ।

यस्तै, प्रदेश ५ मा ४ सय १४, कर्णाली प्रदेशमा ३ सय १७ र सुदूरपश्चिम प्रदेशमा २ हजार ३ सय ५२ जना आइसोलेसनमा उपचाररत छन् ।

स्वास्थ्य मन्त्रालयका अनुसार सकृय संक्रमितमध्ये अधिकांशको स्वास्थ्य अवस्था सामान्य रहेको छ । गत शनिबार सक्रिय संक्रमितको संख्या ८ हजार २ सय ३९ जना रहेको थियो ।

शनिबार यो संख्या घटेर ५ हजार ८ सय २५ पुगेको हो । यसरी हेर्दा १ साताको अवधिमा सक्रिय संक्रमित २ हजार ४ सय १४ जना डिस्चार्ज भएका छन् ।

यसैबीच, पछिल्लो २४ घन्टामा नेपालमा थप ५७ जनामा कोरोना संक्रमण देखिएको छ । योसहित नेपालमा संक्रमितको संख्या १७ हजार ५ सय २ जना पुगेको स्वास्थ्य मन्त्रालयका प्रवक्ता डा. जागेश्वर गौतमले बताए ।

शनिबार थप १०३ जना कोरोना संक्रमणमुक्त भएका छन् । हालसम्म ११ हजार ६ सय ३७ जना उपचारपछि निको भएका छन् ।

संक्रमितमध्ये अधिकांशमा लक्षण देखिएको छैन । मंगलबारसम्म नेपालमा ४० जना कोरोना संक्रमितको मृत्यु भएको स्वास्थ्य मन्त्रालयले जनाएको छ ।

यस्तै, हालसम्म २३ हजार २ सय ७५ जना क्वारेन्टाईनमा बस्दै आएका छन् । हालसम्म २७ वटा प्रयोगशालाबाट ३ लाख ११ हजार ८ सय २९ जनाको आरटी-पीसीआर प्रविधिमार्फत कोरोना परीक्षण गरिएको छ । सबै जिल्लामा कोरोना भाइरस संक्रमण देखिएको छ ।

हालसम्म सबैभन्दा धेरै प्रदेश ५ बाट ३ हजार ७ सय १५ जना कोरोना संक्रमणमुक्त भएका छन् । प्रदेश २ मा २ हजार ६ सय ३३ जना र सुदूरपश्चिम प्रदेशमा १ हजार ६ सय ३४ जना कोरोना संक्रमणमुक्त भएका छन् ।

कर्णाली प्रदेशमा १ हजार ४ सय ९२, गण्डकी प्रदेशमा ९ सय ४६ र प्रदेश १ मा ७ सय ४९ जना व्यक्ति कोरोना संक्रमणमुक्त भएका छन् ।

प्रकाशित मिति: आइतबार, साउन ४, २०७७ ०६:१९