गण्डकीमा २२ संक्रमित थपिए, आइसोलेसनमा बस्नेको संख्या ४ सय २९

A+ A A-

गण्डकी प्रदेशमा थप २२ जनामा कोरोना संक्रमण पुष्टि भएको छ । पोखरा स्वास्थ्य प्रतिष्ठनमा गरिएको परिक्षणमा थप २२ जनामा कोरोना पुष्टि भएको हो ।

गण्डकी स्वास्थ्य निर्देशनालयका निर्देशक डा. विनोदविन्दु शर्माका अनुसार नयाँ संक्रमितमा लमजुङको मस्र्याङदीमा गाउँपालिकामा ६, ढोर्दीमा ४, राइनसमा ८, दूधपोखरीमा १ र क्वोलासोथारमा १ जनामा संक्रमण देखिएको हो ।

गण्डकी प्रदेशमा आज बिहान मात्र २५ जना संक्रमित भेटिएका थिए । योसँगै गण्डकी प्रदेशमा एकै दिन ४७ जनामा कोरोना संक्रमण देखिएको छ । कोरोना संक्रमण देखिएकालाई सम्बन्धित जिल्लाको आइसोलेसनमा लैजाने तयारी भइरहेको स्वास्थ्य निर्देशक डा. शर्माले जनाकारी दिए ।

योसँगै गण्डकीमा संक्रमितको संख्या १ हजार २ सय ७८ पुगेको छ । प्रदेशमा कोरोनको संक्रमणबाट निको हुनेको संख्या ९ सय ३८ पुगेको प्रदेश स्वास्थ्य निर्देशनालयले जानकारी दिएको छ ।

गण्डकी प्रदेशमा अहिलेसम्म संक्रमित भएका १ हजार २ सय ७८ मध्ये १ हजार १ सय १९ पुरुष रहेका छन् भने १ सय ५९ महिला रहेका छन् । प्रदेशअन्तर्गत रहेका ११ जिल्लामध्ये बाग्लुङमा २१७ संक्रमित भएका छन् । त्यसमध्ये १ सय ७४ निको भएर घर फर्किएका छन् भने ४२ जना आइसोलेसनमा रहेका छन् । १ जनाको मृत्यु भएको छ ।

त्यसैगरी, पर्वतमा ९४ जनमा कोरोना संक्रमण देखिएको छ । त्यसमध्ये ७१ जना निको भएका छन् भने २३ जना आइसोलेसनमा रहेका छन् । म्याग्दी ३४ जनामा संक्रमण देखिएको छ । त्यसमध्ये २१ जना निको भएका छन् भने १३ जना आइसोलेसनमा रहेका छन् ।

त्यसैगरी, स्याङ्जामा १९१ मा संक्रमण देखिएको छ । त्यसमध्ये १७१ जना निको भएर घर फर्किएका छन् । ६० जना आइसोलेसनमा छन् भने २ जनाको मृत्यु भएको छ । कास्कीमा ८२ मा संक्रमण देखिएको छ । त्यसमध्ये ७१ जना निको भएर घर फर्किएका छन् भने ११ जना आइसोलेसनमा रहेका छन् ।

मनाङ र मुस्ताङमा भेटिएका १/१ जना संक्रमित निको भएर घर फर्किएका छन् । हाल दुवै जिल्लाको आइसोलेसन खाली छन् । गोरखामा ९९ जना संक्रमितमध्ये ८४ जना निको भएका छन् भने ३८ जना आइसोलेसनमा रहेका छन् । १ जनको मृत्यु भएको छ ।

लमजुङमा ८६ संक्रमितमध्ये ४४ निको भएका छन् भने ४२ जना आइसोलेसनमा रहेका छन् । यस्तै, नवलपरासी पूर्वमा २९५ संक्रमितमध्ये १५७ निको भएका छन् भने १ सय ३८ आइसोलेसनमा रहेका छन् । यसैगरी, तनहुँमा १६६ संक्रमितमध्ये १ सय जना निको भएका छन् भने ६६ जना आइसोलेसनमा रहेको गण्डकी प्रदेश स्वास्थ्य निर्देशनालयले जानकारी दिएको छ । गण्डकी प्रदेशमा आइसोलेसनमा रहेकाको कूल संख्या ४ सय २९ रहेको छ ।

प्रदेशमा सबैभन्दा धेरै नवलपरासी पूर्वमा २९५ जनामा संक्रमण देखिएको छ भने सबैभन्दा कम मनाङ र मुस्ताङमा १/१ जनमा संक्रमण देखिएको छ ।

गण्डकी प्रदेशमा अहिलेसम्म कोरोना संक्रमणबाट ४ को मृत्यु भएको छ । मृत्यु हुनेमा बागलुङका १, गोरखाका १, स्याङ्जाको वालिङका १ र आँधीखोला गाउँपालिकाको पञ्चमूलका १ पुरुषको रहेका छन् ।

प्रकाशित मिति: शुक्रबार, साउन २, २०७७ १८:१०