पोखरामा सञ्चालनमा ल्याइयो गण्डकीको पहिलो ‘संक्रामक तथा सरुवा रोग अस्पताल’

पोखरामा सञ्चालनमा ल्याइयो गण्डकीको पहिलो ‘संक्रामक तथा सरुवा रोग अस्पताल’

A+ A A-

गण्डकी प्रदेश सरकारले पोखरा लेखनाथस्थित रहेको लायन्स समुदायिक अस्पताललाई प्रदेशको मातहतमा ल्याएर नयाँ नामकरणसहित सञ्चालनमा ल्याइएको छ । एक कार्यक्रमका बीच समुदायले प्रदेशलाई अस्पताल हस्तान्तरण गरेपछि प्रदेश सरकारले ‘संक्रामक तथा सरुवा रोग अस्पताल’ का नामबाट अस्पताल सञ्चालन गरेको छ ।

गण्डकी प्रदेशका मुख्यमन्त्री पृथ्वीसुब्बा गुरुङले अस्पतालको स्वामित्व बुझ्दै अस्पताललाई सुविधा सम्पन्न बनाउने घोषणा गरे । उनले अस्पताललाई जनशक्ति, पूर्वाधार र प्राविधिक रूपमा सक्षम बनाउने बताए । ‘अस्पतालमा प्रदेश सरकारले समयसापेक्ष सञ्चलालन गर्नका लागि आबस्यक भौतिक पूर्वाधार र ब्यवस्थापकिय सुधारमा विषेश ध्यान दिने छ’ उनले भने ।

व्यवस्थापन समितिका अध्यक्ष रमनाथ पौडेलले अस्पतालमा आधुनिक उपकरण, अपरेसन थिएटरलगायतका पूर्वाधारका कार्य पछिल्लो समयमा गरिएको बताए । उनले अस्पतालमा हाल चिकित्सक र कर्मचारी सहित ४२ जनाकार्यरत रहेको बताए ।

अध्यक्ष पौडेलले दैनिक रूपमा बहिरंग र अन्तरंग दुवै सेवा दिँदै आएको अस्पतालमा दैनिक ७० जनासम्म विरामीले सेवा लिने गरेको बताउदै अस्पतालमा सञ्चालनका लागि मासिक १० लाख खर्च हुने बताए ।

नेपाल सरकारबाट १५ बेडको स्वीकृति पाएको अस्पतालसँग ५० बेड क्षमता रहेको छ । प्रदेश सरकारले यसअघि कोरोना डेडिकेटेड अस्पताल बनाउने निर्णय गरेपनि पूर्वाधार र उपकरण अभावका कराण देखाउदै स्थगित गरेको थियो ।

प्रदेश सरकरले अस्पतालमा आवश्यक पूर्वाधार र उपकरण अभाव भएको भन्दै पछि निर्णय नै फेरेर पश्चिमाञ्चल क्षेत्रीय अस्पताल र बागलुङको धवलागिरी अस्पताललाई कोरोना डेडिकेटेड अस्पताल बनाएको थियो ।

१ सय रोपनी क्षेत्रफलमा फैलिएको अस्पताललाई थप जग्गा आवश्यक परे वन क्षेत्रबाट लिन सकिने गरी पहिले नै सहमति भइसकेको अध्यक्ष पौडेलले बताए ।

२०६० मा महायज्ञ सञ्चालन गरि भौतिक निर्माण थालिएको अस्पतालमा २०६२ देखि सेवा सञ्चालन थालिएको थियो । संघ सरकारको ७ वटै प्रदेशमा संक्रामक रोग अस्पताल बनाउने योजनाअनुसार प्रदेश सरकारको अग्रसरतामा लायन्स सामुदायीक अस्पताललाई ‘संक्रामक तथा सरुवा रोग अस्पताल’ बनाइएको हो ।

कोरोना भाइरसको जोखिम बढिरहेका बेला सरकारले प्रत्येक प्रदेशमा कम्तिमा ५० बेडको संक्रामक रोग उपचारका लागि विशेष अस्पताल बनाउने घोषणा गरेको थियो । गण्डकी सरकारले सार्वजनिक गरेको आर्थिक बर्ष २०७७/०७८ को बजेटमा ‘संक्रामक तथा सरुवा रोग अस्पताल’ बनाउनका लागि ५ करोड रकम समेत विनियोजन गरेको छ ।

आर्थिक अभावका कारण बेलाबेलामा समस्या देखिएपछि समुदाय अस्पताल सरकारलाई दिन तयार भएको हो । अस्पतालको भौतिक पूर्वाधार निर्माण र आवस्यक उपकरणको ब्यवस्थापनमा लायन्स क्लवले ठूलो लगानी गर्दै आएको थियो ।

प्रकाशित मिति: बिहीबार, साउन १, २०७७ १९:४१