रूपन्देहीका २ स्कुल नमुना विद्यालयको रूपमा छनोट

A+ A A-

रूपन्देहीका २ वटा विद्यालय नमुना विद्यालयको रूपमा छनोट भएका छन् । शिक्षा विज्ञान तथा प्रविधि मन्त्रालय, शिक्षा मानव विकास केन्द्र अन्तर्गतको विद्यालय शिक्षा मापदण्ड शाखाले रूपन्देहीका देवदहको केरवानी मावि र सैनामैनाको सैनामैना माविलाई नमुना विद्यालयको रूपमा छनोट गरेको हो ।

आर्थिक वर्ष ०७६/०७७ मा नमुना विद्यालयका लागि आवेदन भरेको यी विद्यालयले शैक्षिक एवं भौतिक मापदण्ड पूरा भएका कारण नमुना विद्यालयको रूपमा छनोट भएका हुन् ।

आर्थिक वर्ष ०७६/०७७ मा नमुना विद्यालयका लागि माग भएको आवेदनमध्ये ६ वटा विद्यालय छनोट लागि फाइनल गरिएको थियो ।

पहिलो चरणमा जिल्लाको जिल्ला शिक्षा समन्वयले ६ वटै विद्यालयको प्रारम्भिक मूल्यांकन गरी शिक्षा तथा मानव विकास केन्द्रमा पठाएको र त्यसपछि केन्द्रले थप निरीक्षण गर्दा २ वटा विद्यालय छनोट भएको जिल्ला शिक्षा समन्वय अधिकारी दीपेन्द्र ढकालले जानकारी दिए ।

विद्यालयको सम्पत्ती, विद्यार्थी संख्या, विद्यालयको शैक्षिक उपलब्धि, अन्य विद्यालय मर्ज, जनशक्ति व्यवस्था, नेट, इन्टरनेट जस्ता विभिन्न शिर्षकमा १ सय पूर्णांङ्क राखेर गरिने नमुना विद्यालय छनोट गरिँदै आएको छ । आर्थिक वर्ष ०७५÷०७६ मा रूपन्देहीको छपियास्थित पब्लिक मावि छनोट भएको थियो ।

सरकारले २०८० सम्म १ हजार नमुना विद्यालय बनाउने योजनाअनुसार ०७४ सालदेखि नमुना विद्यालय छनोट गर्दै आइरहेको छ । विद्यालय क्षेत्र विकास कार्यक्रम लागू भएपछि मन्त्रालय नमुना विद्यालय छनोट गर्दै आइरहेको हो ।

मन्त्रालयले बिहीबार सार्वजनिक गरेको १ सय नमुना विद्यालयमध्ये २ वटा रूपन्देहीका पनि सेमटिएका हुन् । सैनामैना नगरपालिका-१ स्थित सैनामैना माविका प्राचार्य नेत्र पुरीले २ वर्षको मिहिनेतले विद्यालय नमुना विद्यालयका रूपमा छनोट भएको बताए ।

उनले विद्यालय नमुनाको रूपमा छनोट भएपछि शैक्षिक र भौतिक व्यवस्थापन सुधारमा मन्त्रालयले अतिरिक्त सहयोग गर्नेसमेत बताए ।

नमुना छनोट भएका विद्यालयले भौतिक व्यवस्थपान, शिक्षक सिकाई क्रियाकलाप लगायतका योजना समेटेर नमुना सुधार गुरुयोजना निर्माण गरी मन्त्रालयमा बुझाउने र सोहीअनुसार कार्य हुने छन् ।

हाल सैनामैना माध्यमिक विद्यालयमा १ हजार ४ सय विद्यार्थी रहेका छन् । विद्यालयले कक्षा ९ सम्म अंग्रेजी र नेपाली माध्यमबाट अध्यापन गराउँदै आएको छ भने एउटा विद्यालयमा बससमेत रहेको छ ।

त्यस्तै, देवदह केरवानी माविका प्राचार्य दुर्गादत्त शर्माले विद्यालय व्यवस्थापनको मिहिनेतले नमुना विद्यालयको रूपमा छनोट भएको भन्दै खुसी व्यक्त गरे । उनले अब विद्यालयले गुरुयोजना निर्माण गरी भौतिक विकासतर्फ भवन निर्माण, छात्राबास निर्माण, नतिजा सुधार गर्दै अगाडि बढ्ने बताए ।

विद्यालयले कक्षा १ देखि १० सम्म अंग्रेजी तथा ६ देखि १० सम्म नेपाली माध्यम र प्राविधिक शिक्षा तर्फ ९ देखि १२ कक्षासम्म बाली विज्ञान अध्यापन गराउँदै आएको छ । हाल विद्यालयमा १ हजार १ सय ५० बढी विद्यार्थी अध्ययनरत रहेका छन् ।

रूपन्देहीमा नमुना छनोट भएका विद्यालय

हालसम्म रूपन्देहीका ८ वटा विद्यालय नमुना विद्यालयको रूपमा छनोट भएका छन् ।

आर्थिक वर्ष ०७५/०७६ मा देवदहको केरवानी माध्यमिक विद्यालय र सैनामैना विद्यालय छनोट हुन् सफल भए ।

यी बाहेक बुटवलको कालिका मानवज्ञान मावि, तिलोत्तमाको शान्ती नमुना मावि, कञ्चनको प्रगति मावि, छपियाको पब्लिक मावि, लुम्बिनी आर्दश मावि र धकधईको रामनरेश मावि पनि नमुना विद्यालयको रूपमा छनोट भएका छन् ।

प्रकाशित मिति: बिहीबार, साउन १, २०७७ १२:४३