डा. केसीले तिरिदिए भत्ताको रकमबाट किसानको ऋण

A+ A A-

कर्णाली प्रदेश अस्पताल सुर्खेतका कार्यरत डाक्टर नवराज केसीले सरकारले दिएको ‘दुर्गम विशेष भत्ता’ को रकमबाट किसानको ऋण तिरिदिएका छन् ।

डा. केसीले आफ्नै छिमेकी वीरेन्द्रनगर-३, हिलेखालीका किसान कृष्णबहादुर खत्रीको ऋण तिरिदिएका हुन् ।

सुकुम्बासी खत्रीले भैँसी पालेर जीविकोपार्जन गर्दै आएका थिए । उनको गोठमा पहिले ३ वटा भैँसी देखिन्थे । तर, ऋण तिर्न नसकेर उनले २ वटा भैँसी बिक्री गरे ।

ऋणकै कारण खत्रीले भैँसी बचेको थाहा पाएपछि डा. केसीले ‘दुर्गम विशेष भत्ता’बाट २ लाख रुपैयाँ ऋण तिरिदिएको बताए ।

‘पहिला तीन भैँसी पालेर दूध बेचेर परिवार पाल्ने गर्नुभएको थियो,’ उनले भने, ‘अहिले मैले उनकोमा भैँसी देखिन । सोध्दा ऋण तिर्नका लागि २ भैँसी बेचेँ भन्नुभयो । अनि मलाई निकै नरमाइलो लागेर खत्रीको ऋण तिरिदिएको हुँ ।’

१०/१५ वर्षअगाडि दैलेखबाट बालबच्चासहित आउँदा खत्रीलाई आफ्ना बुबाले भैँसी पाल्न र बस्न दिएकाले अहिले पनि आफूले घरबासको व्यवस्था गर्ने डा. केसीले बताए ।

‘पहिला खत्रीको केही पनि थिएन । बुबाले घरनजिकै बस्न र भैँसी पाल्न दिनुुभएको थियो,’ उनले भने, ‘अब खत्रीलाई घरबासको व्यवस्था पनि गर्ने विचार गरेको छु ।’

डा. केसीले कर्णालीमा आफ्नो घर भएका कारणले आफूलाई दुर्गमसुगमको कुनै चिन्ता नरेहको समेत बताए ।

‘यो वर्ष डाक्टरहरूलाई कर्णाली सरकारले यहाँ काम गरेबापत ‘दुर्गम विशेष भत्ता’ दिएको र मेरा लागि कर्णाली दुर्गम वा सुगम होइन । कर्णाली मेरो घर हो । त्यसैले यो भत्ता आफ्ना लागि लिन गाह्रो लाग्यो,’ उनले भने, ‘सरकारले दिएको दुर्गम भत्ता मेरा लागि होइन भन्ने लागेर सरकारलाई धन्यवाद दिँदै गरिब किसानको ऋण तिरिदिए ।’

गरिब किसानको अवस्था निकै दयनीय रहेको बताउँदै फेसबुकमा डा. केसीले स्टाटससमेत लेखेका छन् ।

‘मेरा छिमेकी हुन् । भैँसी पाल्छन्, दूध बेच्छन्, मिहिनेत गर्छन् । वर्षको अन्त्यमा हिसाब गर्दा करिब किसानको २ लाखको ऋण ‘कमाइ’ भएछ । एउटा भैँसी बेचेछन्, अलिकति ऋण तिरेछन्,’ उनले लेखेका छन्, ‘बैंकहरू सधैँ नाफामा रहिरहँदा मिहिनेती कृष्णबहादुरजस्ता तिनै बैंकका सेवाग्राहीहरूले पनि नाफाको अनुहार देख्न पाउने बैंकिङ व्यवस्था कहिले आऊला ?’

प्रकाशित मिति: बिहीबार, साउन १, २०७७ १२:१७