५ करोड स्वाहा पारेर २२ करोडमा बधशाला

A+ A A-

बुटवलमा पशु बधशाला सञ्चालन गर्ने हल्ला भएकै एक दशक भयो । पछिल्लो ५ वर्षयता बुटवल १० रामनगरमा बधशालाका लागि भवन पनि बन्यो ।

तर, बधशालाका लागि ५ करोड रुपैयाँभन्दा बढी रकम खर्च गरेर निर्माण गरिएको त्यो भवन सुरु नै नहुँदा अहिले फेरि बधशाला बनाउने भन्दै शिलान्याससमेत गरिएको छ ।

कृषि मन्त्रालयअन्तर्गतको पशुपन्छी बजार निर्देशनालय र तत्कालीन बुटवल नगरपालिका (हाल उपमहानगर)को लगानीमा निर्माण गरिएको बधशालाको भवन निर्माण पूरा भएर पनि सञ्चालनमा आउन सकेन । यसको एउटै कारण हो, बधशाला सञ्चालनका लागि भवन उपयुक्त नहुनु ।

सो भवनमा बधशाला सञ्चालन गर्न नसकिने निष्कर्ष प्राविधिक टोलीले निकाल्यो । परिणामतः राज्यको झण्डै ५ करोड रुपैयाँ लगानी ‘बालुवामा पानी’ बन्यो ।

५ करोड रुपैयाँको लगानीमा बनेको सो भवनको ठेक्का अहिले बुटवल उपमहानगरपालिका- ८ का वडा अध्यक्ष भीमप्रसाद श्रेष्ठले पाएका थिए ।

अहिले पुनः सोही स्थानमा अन्तर्राष्ट्रिय मापदण्डको बधशाला निर्माण गर्ने उद्घोषसहित शिलान्यास गरिएको छ ।

करिब ३ विगाह क्षेत्रफलमा अन्तर्राष्ट्रिय मापदण्डसहित अत्याधुनिक पशु बधशाला निर्माण हुने उपमहानगरपालिकाको दाबी छ । २२ करोड १३ लाख ३५ हजार ९ सय ९६ रुपैयाँको लागतमा निर्माण गर्न ठेक्का सम्झौता भएको बधशाला निर्माण सुरु भएको १६ महिनामा निर्माण सक्ने गरी सम्झौता भएको छ ।

बधशालाका लागि पहिलो चरणमा प्रदेश ५ को भूमि व्यवस्था, कृषि तथा सहकारी मन्त्रालयको ७ करोड, बुटवल उपमहानगरपालिकाको ३ करोड गरी आव २०७६/०७७ मा कुल १० करोड रुपैयाँ बजेट विनियोजन भइसकेको छ ।

क्रमागत रूपमा बहुवर्षीय योजनाको रूपमा परियोजना सञ्चालन गरिने बुटवल उपमहानगरपालिकाका नगर प्रमुख शिवराज सुवेदीले बताए ।

परियोजनाका लागि तय गरिएको बजेटबाट साइट निर्माणमा १ करोड २२ लाख, भवन निर्माण तथा सिभिल वर्कमा ६ करोड ७० लाख, मुख्य प्लान्ट तथा उपकरणमा ६ करोड ६२ लाख, अन्य उपकरण तथा औजारमा ३ करोड ५७ लाख, सञ्चालनपूर्व खर्च तथा कन्टिजेन्सीमा २ करोड ९० लाख रुपैयाँ खर्च हुने प्रस्तावित बुटवल मासु प्रशोधन तथा उत्पादन केन्द्रको लागत विवरण रहेको उपमहानगरका वरिष्ठ इन्जिनियर एवं सो परियोजनाका साइट इन्चार्ज इन्जिनियर गौतम रौनियारले बताए ।

यस्तो बन्नेछ बधशाला

दैनिक एक हजार खसी-बोका बध गर्न मिल्नेगरी बधशाला बन्नेछ । यहाँ बाख्राको चरण, होल्डिङ, पशु स्वास्थ्य जाँच तथा उपचार कक्ष, बधशालामा खटिनेहरूका लागि प्राथिमक उपचार कक्ष, सुरक्षा कक्ष, फोहोर प्रशोधन केन्द्र, हरियाली उद्यान र बगैँचा निर्माण गरिनेछ ।

यहाँबाट निस्किने फोहोरलाई प्रशोधन गरेर बायो ग्यास निकालिनेछ भने पानीलाई पुनः प्रयोग गर्न मिल्नेगरी प्रशोधन गरिनेछ ।

बधशालामा दैनिक ५ सयदेखि एक हजारसम्म खसी-बोका बध गर्न सक्ने संरचना तयार गरिनेछ ।

बधशाला निर्माण तथा सञ्चालनको प्राविधिक तथा सामाजिक परिचालनको जिम्मा लिएको हेफर र उपमहानगरबीच भएको सम्झौताअनुसार बधशाला निर्माणपश्चात् उत्पादक किसानहरू र मासु व्यवसायीहरूले गठन गरेको बुटवल मासु उत्पादन तथा प्रशोधन प्रा.लि.ले सो बधशाला सञ्चालन गर्नेछ ।

बुटवल बधशालामा करिब १२ हजार खसी-बोका उत्पादक महिला किसानहरू र ३ सय जना मासु व्यवसायीहरू सहभागी हुने हेफरका कार्यकारी निर्देशक डा. तीर्थराज रेग्मीले बताए ।

उनले साना किसानलाई सशक्तीकरण गराउँदै आएको बताउँदै बुटवलसहति कोहलपुर, विराटनगर, भरतपुर र पोखरामा बधशाला निर्माणका लागि हेफरले सहकार्य गरिरहेको बताए ।

हालसम्म करिब ७ हजार जना उद्यमी महिलाहरू र १ सय जना मासु व्यवसायीहरू विभिन्न इन्भेस्टमेन्ट कम्पनीहरूमार्फत् सहभागी भएका छन् ।

परियोजना निर्माण र सञ्चालनका लागि हालसम्म उद्यमी महिला सदस्यहरूबाट करिब ७ करोड तथा मासु व्यवसायीहरूबाट ३ करोड ७८ लाख रुपैयाँ सङ्कलन गर्ने प्रतिबद्धता आइसकेको रेग्मीले बताए ।

बुटवलमा सञ्चालन हुने बधशालाका लागि उपमहानगरले दिगो सञ्चालनको मोडल नै तयार पारेको छ । बाख्रा पालन गर्ने किसानदेखि मासु बिक्री गर्ने व्यवसायीसम्म यसैमा साझेदार बनेका छन् ।

रूपन्देही, कपिलवस्तु, पाल्पा, गुल्मी, अर्घाखाँची जिल्लाका २८ वटा सामाजिक उद्यमी महिला सहकारी संस्थाहरूलाई सङ्गठित गरी ३ वटा इन्भेष्टमेन्ट कम्पनी गठन गरिसकिएको बधशाला सञ्चालन समितिका सहसंयोजक तथा मासु व्यवसायी संघका अध्यक्ष कृष्णप्रसाद पौडेलले बताए ।

प्रकाशित मिति: बुधबार, असार ३१, २०७७ १५:२८