४ सातामा २६ हजारको उद्धार, सूचीकृत भएका ११ हजार विदेशमै छुटे

A+ A A-

कोरोना भाइरसका कारण विदेशमा अलपत्र परेका २६ हजारभन्दा बढी नेपाली चार्टर्ड विमानमार्फत स्वदेश फर्किएका छन् । सरकारले गत जेठ महिनादेखि विदेशमा अलपत्र कामदार उनीहरूकै खर्चमा उद्धार गर्ने थालेको थियो ।

कोरोनाका कारण विदेशमा अलपत्र परेका २६ हजार नेपाली नागरिक उद्धार गर्न सरकारले भाडादर तोकेर गत ३२ जेठदेखि १२ असारसम्मको कार्यतालिका सार्वजनिक गरेको थियो । तर, २७ असारभित्र पनि २६ हजार विदेशमा कोरोना भाइरसका कारण अलपत्र परेको नागरिक उनीहरूकै खर्चमा चार्टर्डमार्फत सरकारले उद्धार गर्न सकेको छैन ।

४ साताको अवधिमा कोरोना भाइरसका कारण विदेशमा अलपत्र परेका २६ हजार नेपालीलाई उद्धार गरेर स्वदेश ल्याएको परराष्ट्र मन्त्रालयका प्रवक्ता भरतराज पौडेलले जानकारी दिए । यसरी फर्किएका २५ हजारले भने आफैँ खर्च ब्यहोरेर स्वदेश फर्किएका छन् ।

२ हजार रोजगारीमा गएका कामदारको भने रोजगारदाता देशले नै खर्च ब्यहोरेर स्वदेश पठाएका छन् ।

कोरोना भाइरसका कारण विदेशमा अलपत्र परेका करिब ३७ हजार नेपालीलाई तत्काल फर्काउनुपर्ने सूची परराष्ट्र मन्त्रालयले प्रधानमन्त्री कार्यालयमा बुझाएको थियो ।

जसमा २४ हजार भने तत्काल ल्याउन सूचीकृत गरिएको थियो । सूचीकृतमध्ये २० हजार नागरिककाे मात्र सरकारले उद्धार गरेको छ ।

सूचीकृत भएका ४ हजार पनि उद्धार कार्यबाट छुटेका छन् । योभन्दा बाहेक अन्य ७ हजार नागरिक पनि उद्धार कार्यबाट छुटेर विदेशमै अलपत्र परेका छन् । उनीहरूलाई कहिले र कसरी उद्धार गरेर ल्याउने भन्ने प्रष्ट भएकोे छैन ।

सूचीमा परेका तर उद्धार गर्नबाट छुटेकालाई भने ल्याउने तयारी भइरहेको परराष्ट्र मन्त्रालयले जानकारी दिएको छ । सरकारले उद्धारका लागि सूचीकृत गरेका कामदार जसरी भए पनि स्वदेश ल्याउने तयारी भइरहेको प्रवक्ता पौडेलले बताए ।

सरकारले विदेशमा अलपत्र परेका कामदारकाे उद्धार कार्य चुस्त नबनाएको विदेशमा अलपत्र परेका नागरिकले नै गुनासो गरिरहेका छन् । २९ दिन बितिसक्दासमेत विदेशमा समस्यामा परेका २६ हजार नागरिककाे उद्धार गर्न नसकेको उनीहरूको आरोप छ ।

विदेशमा कोरोना भाइरसका कारण समस्यामा परेका नागरिक उद्धार भइरहेको र अलपत्र नागरिकको तथ्याङ्क संकलन गर्ने कामसमेत भइरहेको कोभिड-१९ संकट व्यवस्थापन केन्द्र (सीसीएमसी)ले जानकारी दिएको छ । सीसीएमसीका संयोजक नारायणप्रसाद बिडारीले पनि सूचीकृत भएका नागरिक विदेशमा नरोकिने, उनीहरूलाई चाँडै नेपाल फर्काउने तयारी भइरहेको जानकारी दिए ।

९० हजार तत्काल फर्काउनुपर्ने

परराष्ट्र मन्त्रालय र विदेशमा रहेका कूटनीतिक नियोगका अनुसार कोरोना भाइरसको प्रभावका कारण विभिन्न मुलुकमा रहेका ५ लाख ८८ हजारभन्दा धेरै नेपाली स्वदेश फर्कन चाहन्छन् । जसमा ९० हजार नेपाल तत्काल फर्काउनुपर्ने अवस्थामा रहेको परराष्ट्र मन्त्रालयले जनाएको छ । उनीहरूलाई फर्काउनका लागि पहल र कसरी ल्याउने भनेर कूटनीतिक नियोगसँग छलफल भइरहेको छ । उनीहरू सबैकाे उद्धार गरिने परराष्ट्र मन्त्रालयका प्रवक्ता पौडलेले जानकारी दिए ।

श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा गएर विदेशमा अलपत्र परेका कामदार स्वदेश ल्याउने निर्देशिका गत साता ल्याउने भनिए पनि मन्त्रिपरिषदमा रोकिएर बसेकाे छ ।

विदेशबाट फर्किएका कतिपय कामदारलाई होम क्वारेन्टाइनमा र कतिपयलाई होटल क्वारेन्टाइनमा राखिएको वैदेशिक रोजगार बोर्डका कार्यकारी निर्देशक राजनप्रसाद श्रेष्ठले जानकारी दिए ।

विदेशबाट फर्किएर होम क्वारेन्टाइनमा बस्न चाहनेहरूलाई ३ देखि ६ हजार रुपैयाँसम्म गाडीभाडा उपलब्ध गराएको उनको भनाइ छ ।

वैदेशिक रोजगारीमा धेरै कामदार कोरोना भाइरसका कारण समस्यामा परेकाे गुनासो दैनिक श्रम मन्त्रालयमा आउने गरेको छ । तर, श्रमिक समस्याप्रति श्रम मन्त्रालयले चासो दिएर उद्धार नगरेको कामदारको गुनासो छ ।

गत महिना सर्वोच्च अदालतले वैदेशिक रोजगारीमा जाँदा अप्ठेरोमा परेका नेपालीलाई सरकारी खर्चमै उद्धार गर्न सरकारलाई आदेश दिएको थियो । उक्त आदेश कार्यान्वयन गर्न गत १२ जेठको मन्त्रिपरिषद् बैठकले ‘नेपाली नागरिकलाई स्वदेश ल्याउन सहजीकरण गर्नेसम्बन्धी आदेश’ जारी गरेको थियो । उक्त आदेश कार्यान्वयन गर्न बनेको निर्देशिका भने मन्त्रिपरिषदबाट स्वीकृत हुनै बाँकी छ ।

आजबाट उद्धार कार्य बन्द

विभिन्न देशमा कोरोना महामारीका कारण समस्यामा परेका नेपालीको स्वदेश फिर्तीका लागि भइरहेको उडान समीक्षा गर्न २८ असारपछि तत्काल विदेशबाट नेपाली ल्याउन उडान नगर्ने संस्कृति, पर्यटन तथा नागरिक उड्डयन मन्त्रालयले जनाएको छ ।

३२ जेठदेखि १२ असारसम्म सरकारले विभिन्न देशमा समस्यामा परेका नेपालीको स्वदेश फिर्तीका लागि उडान तालिका सार्वजनिक गरेको थियो ।

पर्यटन मन्त्रालयले हिमालय एयरलाइन्स, नेपाल एयरलाइन्स र अन्य विभिन्न विदेशी जहाजहरू कतार एयरवेज, टर्किस एयरलायन्स, फ्लाई दुबई, जजिरा एयरवेज, कोरियन एयर, एयर अरेबिया, मलिण्डो, सलाम एयरलगायतले उडान अनुमति पाएका थिए ।

कुवेत, यूएई, साउदी अरेयिबा, मलेसिया, कतार, बंगलादेश, माल्दिभ्स, जापान, अस्ट्रेलिया, बहराइन, थाइल्याण्ड, ओमान, अमेरिका, दक्षिण कोरिया, सिंगापुर, बेलायत, हङकङ, पाकिस्तान, म्यानमार, अफगानिस्तान र श्रीलंकाबाट २६ हजार नेपाली स्वदेश फर्किएको परराष्ट्र मन्त्रालय जनाएको छ । सरकारले उद्धार कार्य बन्द गरेपछि करिब ११ हजार सूचीकृत भएका नेपाली नागरिक विदेशमै छुटेका छन् ।

प्रकाशित मिति: आइतबार, असार २८, २०७७ १०:०४