एफबीआई निर्देशक भन्छन् : चीन अमेरिकाका लागि सबैभन्दा बढी खतरा

A+ A A-

अमेरिकाको गुप्तचर निकाय एफबीआईका निर्देशकले गुप्तचरी र चोरीका कारण चीन अमेरिकाका लागि सबैभन्दा ठूलो र दीर्घकालीन खतरा भएको आरोप लगाएका छन् ।

वासिङ्गटनस्थित हड्सन इन्स्टिच्युटमा बोल्दै एफबीआई प्रमुख क्रिस्टोफर रेले चीनका विभिन्न गतिविधिबारे टिप्पणी गरेका हुन् ।

चीनले विदेशमा बसोबास गर्ने चिनियाँ नागरिकलाई तारो बनाएको, उनीहरूलाई स्वदेश फर्किन दबाब दिएको र कोरोना भाइरससम्बन्धी अमेरिकी अनुसन्धानमा बाधा पुर्‍याउन खोजेको उनको आरोप छ ।

उनले भने, ‘चीन जसरी पनि विश्वको एक मात्र शक्तिशाली राष्ट्र बन्न पूरै राज्यसंयन्त्र प्रयोग गरेर प्रयास गर्दै छ ।’

उनले चिनियाँ हस्तक्षेप, आर्थिक गुप्तचरी, तथ्यांक र पैसा चोरी तथा घूस र दबाबमार्फत अमेरिकी नीतिलाई प्रभावित गर्ने अवैध गतिविधिबारे करिब एक घन्टा लामो भाषण गरेका थिए । रेले भने, ‘हामी अहिले यस्तो बिन्दुमा पुगेका छौँ, जहाँ एफबीआईले प्रत्येक १० घण्टामा चीनसम्बन्धी एउटा प्रतिजासुसी मुद्दा हेर्छ ।’

देशभरिका झन्डै ५ हजारवटा प्रतिजासुसी मुद्दामध्ये आधाजति चीनसँग सम्बन्धित छन् ।

चीनका लागि खतरा मानिने विदेशमा बसोबास गर्ने चिनियाँलाई लक्षित गर्दै चिनियाँ राष्ट्रपति सी चिनफिङको नेतृत्वमा ‘फक्स हन्ट’ नामक कार्यक्रम सञ्चालित भएको उनको दाबी छ ।

उनले भने, ‘चीनले व्यापक रूपमा मानव अधिकार उल्लंघन गरेको विषय देखाउन खोज्ने राजनीतिक प्रतिद्वन्द्वी, विरोधी र आलोचकबारे हामी कुरा गर्दैछौँ ।’

‘फक्स हन्ट’ अन्तर्गत एक व्यक्ति फेला पार्न नसकेपछि चीनले अमेरिकामा उनको परिवारलाई भेट्न दूत पठाएर ‘चीन फर्किन वा आत्महत्या गर्न’ सन्देश दिएको उनको दाबी छ ।

कोरोना भाइरस महामारी फैलिएको ‍विषयदेखि चीनले हङ्‌कङमा लागू गरेको नयाँ सुरक्षा कानुनलगायतका विषयमा अमेरिकाले चीनको आलोचना गर्दै आएको छ । यद्यपि चीन अमेरिकाका लागि प्रमुख खतरा भएको टिप्पणी गरेको यो पहिलो अवसर भने हाेइन ।

प्रकाशित मिति: बुधबार, असार २४, २०७७ १४:५५