गुठीमा मुद्दैमुद्दा: देशभर तीन हजार मुद्दा

A+ A A-

देशभरका गुठीहरुमा मुद्धैमुद्धा विषयको समाचारलाई प्राथमिकता साथ प्रकाशित गरेको छ । पशुपतिनाथसहित देशभरका गुठीका जग्गामा मुद्दैमुद्दा छन्। गुठीसम्बन्धी देशभर तीन हजार मुद्दा परेका छन्। काठमाडौंमा तीन सयभन्दा बढी मुद्दा चलिरहेका छन् भने जनकपुरमा करिब पाँच सय मुद्दा परेका छन्। संस्थानका कानुन अधिकृत पोखरेल संस्थानका जग्गामा सानोतिनो विवादमा पनि मुद्दा हालीहाल्ने चलन रहेको बताउँछन्। ‘जे भए पनि मुद्दा हालीहाल्ने परिपाटी छ’, उनले भने, ‘दिनैपिच्छेजसो एउटा न एउटा मुद्दा परिरहन्छ।’ समाचारमा भनिएको छ ।

अथाह जग्गा भएको गुठीमा भूमाफियाको चलखेल हुने गरेको कर्मचारी नै बताउँछन्। गुठी जग्गा आफ्नो बनाउन भूमाफिया लागेका हुन्छन्। गुठी, मालपोत, नापीका कर्मचारीको मिलोमतोमा उनीहरूले जग्गा आफ्नो बनाइरहेका छन्। अदालतमा मुद्दा हालेर, कर्मचारीलाई प्रभावमा पारेर उनीहरूले गुठी जग्गा अतिक्रमण गरिरहेका छन्।

संस्थानका उपप्रशासक जयप्रसाद रेग्मीले गुठी जग्गा हत्याउन सक्नेजति सबै लागिरहेको बताए। ‘मानिस अनुचित ढंगबाट जग्गा हात पार्न लागिरहेका छन्। त्यसलाई गुठी संस्थानले प्रतिवाद गरिरहेको छ,’ उनी भन्छन्। जग्गा हत्याउनकै लागि मुद्दाको संख्या बढिरहेको उनको भनाइ छ। ‘अदालतको अन्तिम निर्णयसम्म जग्गा बचाउन संस्थान लागिपर्नेछ। हामी मिलापत्र गर्ने पक्षमा छैनौं र गलत निर्णय पनि गरेका छैनौं’, उनले थपे, ‘हारेमा पुनरावेदन गर्छौं र जितेमा कार्यान्वयन गराउन लाग्छौं।’

यस्तै प्रधानमन्त्री केपी शर्मा ओली चिकित्सक गोविन्द केसीसंग आफैले गरेको सहमति तोडेको भन्दै अन्नपूर्ण पोस्टले समाचार छापेको छ । गत साउनमा डा। गोविन्द केसी १५ औं अनशनमा थिए। अनशन जति लम्बिँदै थियो, सरकार उति नै अप्ठेरोमा पर्दै थियो। त्यसपछि प्रधानमन्त्री केपी ओली आफैँले सहमतिको पहल गरे। रातारात बैठक बसियो। सम्झौता भयो र केसीले २७ औं दिनमा अनशन तोडे।

साउन १० गते सरकार र केसीबीच सहमति भएको थियो। डा। केसीलाई जुस खुवाएर अनशन तोडाएका नेकपा संसदीय दलका उपनेता सुवास नेम्वाङले उसबेला सहमतिप्रति प्रधानमन्त्री र सिंगो सरकार प्रतिबद्ध रहेको बताएका थिए। तर प्रधानमन्त्री आफैँले आफ्नो वचन तोडेका छन्। सम्झौताविपरीत राष्ट्रिय चिकित्सा शिक्षा विधेयक प्रतिनिधिसभाबाट पारित भएको छ। राष्ट्रियसभामा पेस गरिएको विधेयकलाई यथास्थितिमा राखी माग सम्बोधन गर्न गरिएको आग्रहलाई लत्याइएको समाचारमा उल्लेख छ।

यसैगरी अन्नपूर्ण पोस्टले पहिलो बृहत् जुम्ली शब्दकोश बनाउन सुरु गरिएको समाचारलाई पनि पहिलो पृष्ठमा प्रकाशित गरेको छ ।
आखर : शब्द, अक्षर वा रेखा
मथ्थ:धेरै
छोट्या, छोट्टी : छोरा, छोरी

यी खस भाषाका शब्द हुन्। कथ्य रूपमा मात्र जीवित यो भाषालाई शब्दकोशमा सँगालेर जीवन दिने काम भइरहेको छ। पहिलो बृहत् जुम्ली शब्दकोश बनाउन सुरु गरिएको दशक बितिसक्यो। तर ‘खसिया आखर’ को काम अझै सकिएको छैन। ७२ वर्षे रमानन्द आचार्य शब्दकोशको पाण्डुलिपि बनाइरहेका छन्। कसैको सहयोग नपाउँदा उनलाई मुस्किल परेको छ।

शब्द पुनरवलोकनको काम अन्तिम चरणमा पुगेको लेखक तथा सम्पादक आचार्यले बताए। सुरुमा १ हजार पृष्ठमा ४० हजारभन्दा बढी शब्द अटाउने गरी काम थालिएको थियो। तर यो अवधिमा २५ हजार शब्द मात्र संकलन भएको उनले सुनाए।

प्रकाशित मिति: बिहीबार, माघ १७, २०७५ ०७:३१