कोरोना संक्रमितको शव व्यवस्थापनमा अवरोध गर्ने ३ विरुद्ध ‘अभद्र व्यवहार मुद्दा’

कोरोना संक्रमितको शव व्यवस्थापनमा अवरोध गर्ने ३ विरुद्ध ‘अभद्र व्यवहार मुद्दा’

A+ A A-

पोखरामा कोरोना संक्रमितको शव व्यवस्थापनमा अवरोध गरेको अभियोगमा पक्राउ परेका ३ जनालाई प्रहरीले ‘अभद्र व्यवहार’ कसुरमा मुद्दा चलाउने भएको छ । पोखराको मझुवामा शव व्यवस्थापनका क्रममा प्रहरीलाई आक्रमण गरी चेक पोस्टमा समेत तोडफोड गरेको आरोपमा पक्राउ परेका ९ जनामध्येका ३ जनालाई जिल्ला प्रहरी कार्यलय कास्कीले ‘अभद्र व्यवहार’ कसुरमा मुद्दा चलाउने भएको हो ।

यही असार ११ गते स्थानीयले पोखरा महानगरपालिका-३२ स्थित मझुवामा स्याङ्जाको आँधीखोला गाउँपालिका पञ्चमूल घर भएका व्यक्तिको कोरोना अस्पतालमा मृत्यु भएपछि शव व्यवस्थापन गर्ने क्रममा स्थानीयले ढुंगामुढा गरेका थिए ।

नियन्त्रणमा लिएका मध्ये पोखरा ३२ का भीमराज गुरुङ, रीतबहादुर गुरुङ, र उदयपुर घर भई तनहुँ शुक्लागण्डकी २ बस्ने फत्तबहादुर राईविरुद्ध अभद्र व्यवहारसम्बन्धी मुद्दाको प्रक्रिया सुरु गरेको जिल्ला प्रहरी कार्यालय कास्कीका प्रवक्ता एवं डीएसपी सुवास हमालले जानकारी दिए ।

पक्राउ गरिएका ९ मध्ये ६ जनालाई अनुसन्धानपछि रिहा गरिएको र ३ जनालाई अभद्र व्यवहार गरेको आरोपमा मुद्दा प्रक्रिया अगाडि बढाएको प्रवक्ता हमालले बताए । आक्रोशित स्थानीयले २ मोटरसाइकल, १ स्कुटर र १ सशस्त्र प्रहरीको ट्रकमा क्षति पुर्‍याएका थिए । डिएसपी हमालका अनुसार ‘अभद्र व्यवहार’ कसुरमा मुद्दामा ‘मुलुकी अपराध संहिताबमोजिम १ वर्ष कैद वा १० हजार जरिवाना वा दुवै सजाय हुने व्यवस्था गरिएको छ । सवारी साधनलगायतका संरचनामा क्षति पुर्‍याएकाले क्षतिपूर्ति पनि दिनुपर्ने कानुनी व्यवस्था छ ।

अभियुक्तहरूविरुद्धको मुद्दामा कारबाही प्रक्रिया बढाउन जिल्ला प्रशासन कार्यालय कास्कीमा केही दिनभित्रमै सिफारिस प्रतिवेदन पठाइने प्रवक्ता हमालले बताए । स्याङ्जाका ५५ वर्षीय कोरोना संक्रमितको पोखरा स्वास्थ्य विज्ञान प्रतिष्ठान (प्रदेश कोरोना अस्पताल)मा उपचारको क्रममा निधन भएको थियो । उनको शव व्यवस्थापन गर्न भन्दै कास्की र तनहुँको सीमामा पर्ने मझुवाघाट छानिएको थियो । तर, संक्रमितको शव गाड्न नदिन ठूलो संख्यामा अएका स्थानीय आक्रमणमै उत्रिएपछि सशस्त्र प्रहरीले ८ राउन्ड हवाई फायर गरेको थियो ।