दिसामा पनि कोरोना भाइरस तर ढल वा पानीबाट सर्दैन

A+ A A-

स्वास्थ्य तथा जनसङ्ख्या मन्त्रालयले कोरोना भाइरस दिसामा पनि पाइने जनाएको छ ।

मन्त्रालयको वेबसाइटको सूचनामा भनिएको छ, ‘संक्रमित व्यक्तिले खोक्दा र हाछ्यूँ गर्दा नाक र मुखबाट निस्कने छिटाहरूबाट अर्को व्यक्तिमा सर्छ । त्यसैले यसको संक्रमणबाट बच्न बेलाबेलामा साबुनपानीले हात धुने वा अल्कोहल भएको स्यानिटाइजर प्रयोग गर्ने, खोक्दा र हाछ्यूँ गर्दा नाक र मुख हात वा टिस्यु वा कुहिनाले छोप्ने, प्रयोग गरेको टिस्यु तुरुन्त फोहाेर फाल्ने ठाँउमा फाल्ने र साबुनपानीले हात धुने र रुघाखोकी लागेको व्यक्तिबाट टाढा बस्ने ।'

विश्व स्वास्थ्य संगठन (डब्लूएचओ) र चीन सरकारको संयुक्त टोलीले केही समयअगाडि गरेको कोरोना भाइरस (कोभिड–१९) महामारी अनुसन्धानले दिसामा पनि कोरोना भाइरस देखिन्छ भन्ने पत्ता लगाएको थियो ।

तर, उक्त अध्ययनले पनि ढल वा दिसामा भएको भाइरसले भन्दा पनि खोक्दा र हाछ्यूँ गर्दा नाक र मुखबाट निस्कने छिटाले पनि एक व्यक्तिबाट अर्कोमा सर्दछ भनेको छ ।

नाली वा ढलबाट आउने हावा, गन्धबाट पनि कोरोना भाइरस हुन सक्छ ?

स्वास्थ्य तथा जनसङ्ख्या मन्त्रालयका अनुसार ढल वा नालीबाट आउने हावा, गन्धमा श्वास फेर्दा कोरोना भाइरस संक्रमण भएको तथ्य हालसम्म पाइएको छैन ।

मन्त्रालयले भनेको छ, ‘हालसम्मको तथ्यअनुसार कोरोना भाइरस संक्रमित व्यक्तिले खोक्दा र हाछ्यूँ गर्दा नाक र मुखबाट निस्कने छिटाहरू र संक्रमित व्यक्तिसँगको नजिकको सम्पर्कबाट एक व्यक्तिबाट अर्कोमा सर्दछ ।’

पानीबाट सर्ने भाइरस होइन

जनस्वास्थ्यविद डा. समिरमणि दीक्षितले ढल वा दिसामा देखिएको भाइरस सर्ने जोखिम अत्यन्तै न्यून हुने बताए । ‘यो भाइरस शरीरभित्र बस्ने हो । बाहिर धेरै बस्न सक्दैन । पानीमा गएर यो भाइरस सर्ने सम्भावना अत्यन्तै न्यून छ । पानीबाट सर्ने भाइरस होइन’, उनले भने ।

दीक्षितकै नेतृत्वमा रहेको सेन्टर फर मलिकुलर डायनामिक्सका विज्ञहरूले काठमाडौंको ढलमा पनि कोरोना भाइरस रहेको पत्ता लगाएका थिए । काठमाडौंका ४ स्थानका ढलबाट स्याम्पल लिएर परीक्षण गर्दा २ स्थानका ढलमा कोरोना भाइरस भेटिएको डा. दीक्षितले बताए ।

‘यो अनुसन्धानबाट समुदायमा कोरोना भाइरस छ भन्ने निष्कर्ष निकालेको छ । त्यस्तै कन्ट्याक्ट ट्रेसिङ गर्न सजिलो, सावधानी अपनाउन र समुदायमा परीक्षण गर्नुपर्ने यो अध्ययनको निष्कर्ष हो,’ उनले भने ।

प्रकाशित मिति: आइतबार, असार २१, २०७७ १६:४१