बागमतीमा ११ हजार बढीलाई डेंगु, सबै स्थानीय तहलाई किट

A+ A A-

बागमती प्रदेशमा चालू आर्थिक वर्ष २०७६/०७७ मा ११ हजार २ सय १४ जनालाई डेंगु रोक लागेको छ ।

प्रदेशका १३ वटै जिल्लामा विगत ३ वर्षको तुलनामा चालू आवमा धेरै व्यक्ति डेंगु रोगबाट संक्रमित भएका छन् । २०७४/०७५ मा ४ सय ६५ जनालाई डेंगु लागेको थियो । २०७५/०७६ मा १ सय ५३ जनालाई मात्रै डेंगु लागेको स्वास्थ्य निर्देशनालय बागमती प्रदेशको तथ्यांकमा उल्लेख छ । गत साउनदेखि प्रदेशमा डेंगुको महामारी फैलिएको थियो ।

२०७६ चैतदेखि जेठसम्मको तथ्यांकअनुसार करिब २५ जनालाई मात्रै डेंगु लागेको निर्देशनालयले जानकारी दिएको छ । एडिस एजिप्टाई जातको पोथी लामखुट्टेको टोकाइबाट लाग्ने डेंगु रोग विश्वभर नै देखिएको रोग भएको र बितेको ५० वर्षमा यस रोगको संक्रमण ३० गुणाले बढेर गएको तथ्यांक निर्देशनालयले प्रस्तुत गरेको छ ।

स्वास्थ्य निर्देशनालयले शनिबार हेटौंडामा महामारी विपद् व्यवस्थापनमा सञ्चार माध्यमको भूमिका विषयक अभिमुखीकरण आयोजना गर्दै डेंगु र मलेरिया (औलो) संक्रमणको विगत र वर्तमानको अवस्थाको बारेमा जानकारी गराएका थिए । निर्देशनालयले विश्वभर फैलिरहेको नोभल कोरोना भाइरसको महामारीसँगै डेंगु र औलोको पनि त्रास हुनसक्ने भन्दै त्यसबाट बच्न स्वास्थ्य सचेतना अपनाउन जरुरी रहेको औँल्याएको छ ।

निर्देशनालयका वरिष्ठ स्वास्थ्य प्रशासक डा. अर्जुनप्रसाद सापकोटाले गतवर्ष नेपालमा फैलिएको डेंगुको महामारी यसवर्ष पनि दोहोरिनसक्ने भएकाले त्यसतर्फ पनि सावधानी र नियन्त्रणको पूर्वतयारी गर्नुपर्नेमा जोड दिइएको हो । डेंगु रोगको परीक्षणको लागि डेंगु किट तयारी अवस्थामा राखिएको निर्देशनालयका निर्देशक रमेशप्रसाद अधिकारीले जानकारी दिए ।

‘कोरोनासँगै डेंगु र औलोको पनि खतरा रहेको छ । यसको संक्रमण हुन नदिन र भइहालेमा टेष्ट गर्ने किटको पनि तयारी भइसकेको छ’, निर्देशक अधिकारीले भने, ‘हुन त यो वर्षको गर्मीयाम लागेपछि डेंगुका बिरामी खासै देखिएका छैनन् । हालसम्म प्रदेशमा करिब २ दर्जनको हाराहारीमा बिरामी देखिएका छन् । गत वर्ष यो समयसम्म करिब ३ हजार बिरामी भइसकेका थिए र तै पनि हामीले डेंगु परीक्षण किट खरिद गरी सबै स्थानीय तहमा पुर्‍याइसकेका छौँ ।’

सन् २००४ मा नेपालमा देखा परेको डेंगुबाट बच्न पूरै बाहुला भएको कपडा लगाउने, दिउँसो सुत्दा पनि झुल लगाउने, घरको झ्याल ढोकामा जाली लगाउने, घर वरिपरी पानी जम्ने खाल्डो पुर्ने र पानी जम्ने भाडाहरु खाली गर्ने वना नराख्ने जस्ता उपायहरु उपनाए डेंगु नसर्ने स्वास्थ्यकर्मीको सुझाव छ ।

निर्देशनालयले औलो रोग पनि डेंगुको जस्तै लक्षणयुक्त लामखुट्टेकै टोकाइबाट हुने भएकाले त्यसबाट बच्नुपर्ने जनाएको छ । वरिष्ठ स्वास्थ्य प्रशासक डा. सापकोटो चालु आर्थिक वर्षमा बागमती प्रदेशमा ५ वटा स्थानीय स्तर र २४ वटा आयातित गरी २९ वटा मात्रै औलोको बिरामी भेटिएको जानकारी दिए । २०२२ सम्ममा औलो रोग शून्यमा झार्ने अभियानमा सरकार रहेको सापकोटाले बताएका छन् ।

प्रकाशित मिति: शनिबार, असार २०, २०७७ १८:१३