पुन: श्रम स्वीकृतिमा वैदेशिक रोजगारीमा जाने कामदारलाई दोब्बर आर्थिक भार

A+ A A-

वैदेशिक रोजगारीबाट घरबिदामा आएर कोरोना भाइरसका कारण रोकिएका कामदारका हकमा सरकारले बिहीबारदेखि पुनः श्रम स्वीकृति खुलाएको छ । कोरोना भाइरस राेकथाम तथा नियन्त्रणका लागि सरकारले गरेको लकडाउनका कारण अन्तर्राष्ट्रिय उडान र सार्वजनिक यातायात बन्द छन् । अन्तर्राष्ट्रिय उडान र सार्वजनिक यातायात बन्द भए पनि सरकारले घरबिदामा आएका कामदारकाे हकमा पुन: श्रम स्वीकृति खुलाएको हो ।

यही १५ असारमा बसेको मन्त्रिपरिषद बैठकले लकडाउनको अहिलेकै मोडललाई निरन्तरता दिने निर्णय गरेकोे थियो । सो निर्णयअनुसार ७ साउनसम्म अन्तर्राष्ट्रिय उडान र सार्वजनिक यातायात बन्द गर्ने निर्णय भएको थियो ।

सरकारले पुन: श्रम स्वीकृति खुलाए पनि घरबिदामा आएका कामदारलाई श्रम स्वीकृति लिएर सहज तरिकाले नियमित उडानमा कामदार विदेश जान सक्ने अवस्था भने देखिँदैन । नेपाली श्रमिकको रोजगार गन्तव्य देश मलेसिया, खाडीका देश, जापान, दक्षिण कोरिया, युरोपका देश र हङकङ भएको विभागले जनाएको छ । जसमा घरबिदामा धेरै मलेसिया, खाडीका देश र दक्षिणा कोरियाबाट आएको विभागले जानकारी दिएको छ ।

सरकारले वैदेशिक रोजगारीमा जाने कामदारका हकमा पुनः श्रम स्वीकृति खुला गरेको वैदेशिक रोजगार विभागका महानिर्देशक कुमार दाहालले बताए । वैदेशिक रोजगार विभागअन्तर्गत काठमाडौं कार्यालय ताहाचलले हिजोदेखि पुन: श्रम स्वीकृति दिन थालेको विभागका महानिर्देशक दाहालले बताए ।

‘वैदेशिक रोजगारीबाट करिब ७ हजार कामदार घर बिदामा आएका होलान् । जसमध्ये कतिपयको करारअवधि सकिएको होला । घरबिदामा आएका कामदार कोरोना भाइरस नियन्त्रण गर्न गरिएको लकडाउनका कारण रोकिएका छन् । उनीहरूका हकमा बिहीबारदेखि पुनः श्रम स्वीकृति खुलेको छ,’ उनले भने, ‘घरबिदामा आएका कामदार पुन: श्रम स्वीकृति लिएर व्यक्तिगत रूपमा पनि जाने गरेका थिए । उनीहरूलाई पठाउने विषयमा सरकारको भूमिका भनेको पुनःश्रम स्वीकृति दिने अथवा रोजगारदाता देशमा समस्या परे उद्धार गर्ने हो ।’

सरकारले रोजगारदाता कम्पनीले बोलाएर समस्या नहोस् भनेर पुनः श्रम स्वीकृति खुलाएको उनको भनाइ छ । सरकारले रोजगारदाता देशबाट बोलाउन सक्ने सम्भावनालाई हेरेर पुनः श्रम स्वीकृति खुलाएको विभागका महानिर्देशक दाहालले जानकारी दिए ।

फर्किंदा दोब्बर खर्च

घर बिदामा आएका कामदार पुनःश्रम स्वीकृति लिएर वैदेशिक रोजगारीमा जाँदा हवाई खर्च दोब्बर तिर्नुपर्ने भएको छ । हाल सरकारले कोरोना भाइरसका कारण विदेशमा अलपत्र परेका नेपाली नागरिक उद्धार गरी स्वदेश फर्काइरहेको छ ।

पुनः श्रम स्वीकृति लिएर वैदेशिक रोजगारीमा जाने कामदारलाई कोरोना भाइरसका कारण अलपत्र नागरिक बोकेर आएको र लिन जाने चार्टर उडानमार्फत पठाउन तयारी भइरहेको श्रम, रोजगार तथा सामाजिक सुरक्षा मन्त्रालयले जनााएको छ ।

हाल खाडीका देशबाट फर्किएका कामदारले प्रतिव्यक्ति ७० हजार रुपैयाँसम्म तिरेर स्वदेश फर्किएका छन् । घर बिदामा आएका कामदारले पनि सोहीअनुसार हवाई भाडा तिरेर फर्कनुपर्ने अवस्था रहेको श्रम मन्त्रालयका एक कर्मचारीले जानकारी दिए ।

सामान्य समयमा खाडीका देश जान ३५ हजार मात्र लाग्ने गरेको थियो । श्रम मन्त्रालयका कर्मचारीका अनुसार कतारबाट बिदामा आएका कामदार फर्किंदा ६० हजार तिर्नुपर्छ भने कोरिया जाने कामदारले ८० हजार, जापान फर्कंने कामदारले ९० हजार रुपैयाँसम्म तिरेर जानुपर्ने अवस्था छ ।

यी देश जान सामान्य अवस्थामा ५० हजार रुपैयाँसम्म लाग्ने गरेको थियो । नियमित उडान नभए पनि चार्टर गरी विदेशबाट कामदार ल्याइएका जहाज फर्कने बेलामा नेपालबाट कामदार विदेश जान सक्ने बताइएको छ तर त्यसबापत कामदारले महँगो हवाई शुल्क तिर्नुपर्नेछ ।

वैदेशिक रोजगारीबाट घर बिदामा आएका कामदारले अन्तर्राष्ट्रिय उडान बन्द भएका कारण सामान्य अवस्थामा भन्दा दोब्बर भाडा तिरेर जानुपर्ने अवस्था भएको मन्त्रालयका ती कर्मचारीले जानकारी दिए । लकडाउनका कारण चार्टरमार्फत जाने हुँदा कामदारलाई आर्थिक भार पर्ने उनको भनाइ छ ।

सरकारले अन्तर्राष्ट्रिय उडान र सार्वजनिक यातायात बन्द भएकै अवस्था पुन: श्रम स्वीकृति खुलाए पनि घर बिदामा आएका कामदारलाई वैदेशिक रोजगारीमा जान समस्या हुने उनीहरूले नै बताउन थालेका छन् । सार्वजनिक यातायात बन्द भएका कारण घरबिदामा आएका कामदारलाई पुन: श्रम स्वीकृति र विमानस्थलसम्म आउन समस्या हुने उनीहरूको गुनासो छ ।

सरकारले वैदेशिक रोजगारीमा संस्थागत १ सय १० देश र व्यक्तिगत १ सय ७२ देख जाने कामदारलाई श्रम स्वीकृति जानकारी गर्दै आएको छ । हाल वैदेशिक रोजगारीमा ४४ लाख कामदार कार्यरत रहेको सरकारी अनुमान छ ।

उपप्रधानमन्त्री एवं रक्षामन्त्री ईश्वर पोखरेलको नेतृत्वमा रहेको कोरोना संक्रमण रोकथाम तथा नियन्त्रण उच्चस्तरीय समन्वय समितिले गत २९ फागुनदेखि वैदेशिक रोजगारीमा जाने कामदारको श्रम स्वीकृति स्थगनको निर्देशन दिएको थियो ।

उक्त निर्देशनपश्च्चात् विभागले गत ३० फागुनदेखि वैदेशिक रोजगारीमा जाने, घर बिदामा नेपाल आएका तथा नयाँ श्रम स्वीकृति अनिश्चितकालका लागि स्थगन गरेको थियो । श्रम कार्यालय ताहाचालले वैदेशिक रोजगार मागपत्रको स्वीकृतिका साथै श्रम स्वीकृति प्रदान गर्दै आएको छ ।

१५ असारमा बसेको मन्त्रिपरिषद्को बैठकले बिदामा नेपाल आएका तथा करार अवधि बाँकी रहेकाको हकमा कोभिड–१९ परीक्षण र स्वास्थ्यसम्बन्धी प्रोटोकलको पालना गर्ने गरी वैदेशिक रोजगारीमा जान दिने निर्णय गरेको हो ।

प्रकाशित मिति: शुक्रबार, असार १९, २०७७ १५:२३