यस्ता पनि चोर ! चोरेरै गाडीदेखि घडेरी

A+ A A-

चैत पहिलो साता काठमाडौंका विभिन्न स्थानमा दिनभर व्यापारिक घराना पोदार समूहको नाम बेचेर रेकी गर्ने र रातभर आफ्नै गाडी, ट्याक्सी र मोटरसाइकल प्रयोग गरेर चोरी गर्ने समूहलाई प्रहरीले महाराजगन्जबाट पक्राउ ग¥यो ।

पक्राउ पर्नेमा भारत मोतिहारी घर भई काठमाडौं पुरानो बानेश्वरमा डेरामा बस्ने ३५ वर्षीय पारस प्रसाद, ३२ वर्षीय सन्तोष पोदार र रामेछाप सुनारपानीका ३२ वर्षीय ओमराज श्रेष्ठ छन् । समूहका अन्य चार सदस्य भने अझै फरार छन् ।

उनीहरूको साथबाट प्रहरीले चोरी गरी गोदाम बनाएर राखेका बाथरुम तथा धारामा प्रयोग हुने सामान, चाँदीका विभिन्न भाँडाकुँडा र ५० हजार रुपैयाँ बढी नगद बरामद ग¥योे ।

चोरी गर्न प्रयोग भएको बा१४च ७२६९ नम्बरको भ्यान, बा१ज ११९३ नम्बरको ट्याक्सी र बा८०प १५४० नम्बरको पल्सर मोटरसाइकलसमेत प्रहरीले बरामद गरेको थियो ।

महानगरीय प्रहरी परिसर काठमाडौंका प्रवक्ता डीएसपी होविन्द्र बोगटीका अनुसार पक्राउ पर्नेहरूबाट प्रहरीले करिब ७० लाख बढीको सामान बरामद गरेको थियो । प्रहरीका अनुुुुसार चोरीमा संलग्न समूहका केहीले चोरी गरेर आर्जन गरेको रकमबाटै काठमाडौंमा घडेरीसमेत किनेको पाइएको छ । चोरीमा प्रयोग भएका सवारीसाधनसमेत उनीहरूले चोरी गरेको रकमबाटै खरिद गरेको प्रहरी अनुसन्धानबाट खुलेको छ ।

‘पहिला सामान्य चोरीका घटना हुन्थे अहिले समूह नै बनाएर व्यावसायिक चोरी गर्ने गिरोह नै छन्’

गत माघमा ललितपुर प्रहरीले गोदावरी नगरपालिका–९ छम्पी, ललितपुरस्थित एउटा घरबाट गाडी चोरेर भागेका समूहलाई पक्राउ ग¥यो । पक्राउ परेका मकवानपुर इन्द्रसरोवर गाउँपालिका–५ का सोमला स्याङताङ, सोमलाल थिङ, राजु लामा र कुमार लामाबाट खुल्यो, उनीहरूले दिनभर घरको रेकी गरे र राति गाडीमा चढेर घरमा राखेको गाडी नै चोरेर भागे ।

यो समूहले यसअघि समेत विभिन्न ठाउँमा चोरी गरेको प्रहरीको अनुसन्धानबाट खुलेको छ । उनीहरूको साथबाट ललितपुर प्रहरीले चोरी गर्न प्रयोग गर्ने बा१५प ६०८२ नम्बरको भ्यान, चोरीका विभिन्न सामान र १ लाख बढी नगद रुपैयाँसमेत बरामद गरेको थियो ।

यी दुई प्रतिनिधि घटना मात्र हुन् । काठमाडौंमा हाल समूह नै बनाएर चोरी गर्ने गिरोह सक्रिय रहेको प्रहरीको भनाइ छ ।

‘पहिला सामान्य चोरीका घटना हुन्थे अहिले समूह नै बनाएर व्यावसायिक चोरी गर्ने गिरोह नै छन्’ बोगटीले भने, ‘हामीले चोरीका घटनालाई समेत गम्भीर रूपमा लिएका छौं ।’

निसानामा एकान्तका घर र पसल

प्रहरीका अनुसार समूह बनाएर चोरी गर्ने गिरोहको मुख्य निसानामा एकान्तमा रहेका घर–पसल हुने गरेका छन् । उनीहरूले दिनभर पसल र एकान्तका घरको रेकी गर्ने र राति मोटरसाइकल तथा ट्याक्सी प्रयोग गरी चोरी गर्ने गरेको बोगटीले बताए ।

प्रहरीका अनुसार यसरी चोरी गर्ने समूह उपत्यकाका विभिन्न ठाँउमा सक्रिय छन् । प्रहरीका अनुसार यस्ता चोरले राति घरेलु हातहतियारसमेत बोकेर हिँड्छन् । उनीहरूले घर फोड्न र चाबी काट्नसमेत विभिन्न औजार बोक्ने गरेको प्रहरीको भनाइ छ ।

चार महिनामा ३ सय चोर पक्राउ

महानगरीय प्रहरी परिसर काठमाडौंले पुसको पहिलो साता काठमाडौंका विभिन्न ठाउँमा चल्ने सार्वजनिक सवारीसाधनमा पाकेट मार्ने र चोरी गर्दै हिँड्ने ७७ जनालाई पक्राउ पछि सार्वजनिक गरेको थियो ।

उनीहरूले विभिन्न बहानामा सार्वजनिक बसका यात्रुलाई पाकेट मार्र्नेे गरेको प्रहरीको भनाइ छ । त्यस्तै, काठमाडौं प्रहरीले त्यसको एक महिनापछि माघमा समेत विभिन्न ठाउँमा चोरी गर्ने ९० जनालाई पक्राउ पछि सार्वजनिक गरेको थियो ।

महानगरीय प्रहरी परिसर काठमाडांैको पुस महिनायताको तथ्यांकअनुसार चोरी गर्ने तीन सय बढीलाई पक्राउ गरेर मुद्दा चलाइएको छ । चोरीमा उपत्यका आसपासका जिल्लाका मानिसको संलग्नता बढी हुने गरेको प्रहरीको दाबी छ ।

प्रहरीका अनुसार भारतबाट कामका लागि काठमाडौंमा आएर बसेका भारतीय नागरिक पनि सामूहिक चोरीका घटनामा संलग्न हुने गरेको देखिएको छ ।

प्रकाशित मिति: सोमबार, चैत २५, २०७५ २२:४८