कोरोनाले अवरुद्ध उद्योगलाई प्रदेश सरकारको साथ

A+ A A-

कोरोना भाइरस महामारीले विश्वलाई आक्रान्त बनाइरहेको अवस्थामा बागमती प्रदेशको उद्योग र पर्यटन क्षेत्रमा पनि प्रतिकूल असर पारेको छ ।

देशकै अर्थतन्त्र धराशयी बनाएको कोरोनाले देशका थुप्रै घरेलु तथा साना उद्योगलाई समस्यामा पारेको छ । कोरोना रोकथाम तथा नियन्त्रणका लागि गरिएको करिब ३ महिना लामो पूर्ण लकडाउनले घरेलु तथा साना उद्योग ठप्प थिए । यसरी मर्कामा परको उद्योग र उद्यमीलाई बागमती प्रदेश सरकारले साथ दिने भएको छ ।

आगामी आर्थिक वर्ष २०७७/०७८ को बजेटमा प्रदेशका आर्थिक मामिला तथा योजना मन्त्र कैलाश ढुंगेलले कोरोनाले असर पारेको घरेलु तथा साना उद्योगलाई सरकारले साथ दिने योजना ल्याएको जानकारी दिए । उद्योगमा परेको असरलाई व्यवस्थापन गर्न स्वास्थ्य सुरक्षा सुदृढ गरी निजीक्षेत्रको सहकार्यमा अनुकूल वातावरण तयार गर्ने बजेटमा उल्लेख छ ।

लकडाउनले अवरुद्ध उद्योगलाई तत्काल सञ्चालनमा ल्याउन र नवउद्यमीहरूका लागि उद्यम/उद्योग स्थापना र सञ्चालनका लागि ‘उद्यमीको हात प्रदेश सरकारको साथ’ कार्यक्रम ल्याएको मन्त्री ढुंगेलले बताए । सरकारले कृषि, फलफूल, जडिबुटी, हस्तकला, वनमा आधारित घरेलु तथा साना उद्योग सञ्चालनमा सहयोग प्रोत्साहनका लागि प्रविधि हस्तान्तरण गर्न बजेट छुट्याएको छ ।

प्रविधि हस्तान्तरण कार्यबाट ७ सय ३२ वटा उद्योगको स्तर पुँजीवृद्धि भई १ हजार ४ सय ६४ जनाले प्रत्यक्ष रोजगारी प्राप्त गर्ने अनुमान प्रदेश सरकारको छ । सरकारले प्रदेशका विपन्न तथा गरिब समुदायका महिला, दलित युवाहरुलाई स्वरोजगार बनाउन ४ सय १० जना नयाँ उद्यमी सिर्जना र २ सय ७५ जना उद्यमीलाई स्तरोन्नतिका लागि रकमको व्यवस्था गरेको जनाएको छ ।

प्रदेश सरकारले ‘एक स्थानीय तह एक उद्योग ग्राम’ कार्यक्रमअन्तर्गत पहिचान भएका स्थानमा ५ वटा उद्योग ग्रामको पूर्वाधार निर्माण गर्न र थप १० उद्योग ग्रामको सम्भाव्यता अध्ययन, वातावरणीय अध्ययन र जग्गा प्राप्तिका लागि ११ करोड रकम विनियोजन गरको आर्थिक मामिला मन्त्री ढुंगेलले बताए ।

सरकारले जिल्लास्थित घरेलु कार्यालयबाट वस्तु विकास तथा प्रशिक्षण कार्यक्रमअन्तर्गत धादिङमा रत्नपत्थर, नुवाकोटमा ढाका बुनाई, ललितपुरमा काष्ठकला र धातुकला, सिन्धुलीमा बाँस निगालो, सिन्धुपाल्चोक र दोलखामा हाते कागज उद्योग सञ्चालन गर्ने व्यवस्था मिलाएको छ । यस कार्यक्रमबाट १ सय जनाले व्यवसाय सुरुवात गर्ने अपेक्षा लिइएको छ ।

सरकारले प्रदेशभित्र स्थापना गर्नेगरी कागज उद्योग र जडिवुटी प्रशोधन उद्योग स्थापनाका लागि आर्थिक विश्लेषण र जग्गा प्राप्तिका लागि रकम व्यवस्था गरेको आर्थिक मामिला तथा योजना मन्त्रालयले जानकारी दिएको छ । चेपाङका लागि चिउरी कार्यक्रमअन्तर्गत् चिउरी खेती र चेपाङ समुदायको सहभागितामा चिउरी प्रशोधन उद्योग स्थापना गर्न बजेट छुट्याइएको जनाइएको छ ।

यसैगरी, कोरोनाले शिथिल बनेको पर्यटनको क्षेत्रमा पनि प्रदेश सरकारले विशेष कार्यक्रम ल्याएको छ । प्रदेशभित्र मकवानपुरको चित्लाङसहित ३ स्थानमा हिलस्टेशन र ८ वटा नमुना गन्तव्य निर्माणको थालनी गरेको छ । चालू आवमा कार्यान्वयनमा रहेका पर्यटन पूर्वाधार विकास कार्यक्रमलाई निरन्तरता दिएको आर्थिक मामिला मन्त्री ढुंगेलले जानकारी दिए । जसअन्तर्गत् हिलस्टेशन, नमुना गन्तव्य, घाञ्जालापास सञ्चालन, गौरिशंकर परिपथलगायतका पर्यटन पूर्वाधार पर्दछन् ।

सरकारले आन्तरिक तथा बाह्य पर्यटकलाई लक्षित गरी वरण्डाभार संरक्षित वनमा प्रकृति, वन्यजन्तु, तथा चरा अवलोकनका लागि जंगल सफारीको पूर्वाधार विकास गर्न आवश्यक बजेट विनियोजन गरेको छ । त्यस्तै, बागमती प्रदेशका ११ जिल्लामा रहेका पशुपतिसँग सम्बन्धित ६४ वटा ज्योतिर्लिङ यात्रा सर्किट अध्ययनका लागि बजेट छुट्याएको छ । प्रदेशमा स्किइङ र गल्फको अध्ययनका लागि रकम विनियोजन गरेको मन्त्रालयले जानकारी दिएको छ ।

प्रकाशित मिति: बिहीबार, असार १८, २०७७ १८:५१