कर्णालीमा कोराना नियन्त्रणमा ८ करोड ९९ लाख बढी खर्च

A+ A A-

कर्णाली प्रदेश सरकारको सामाजिक विकास मन्त्रालयले कोरोना नियन्त्रण तथा रोकथामका लागि ८ करोड ९९ लाख ४८ हजार २ सय रुपैयाँ खर्च गरेको सार्वजनिक गरेको छ । कर्णाली प्रदेश सामाजिक मनत्रालयले कोरोना भाइरस नियन्त्रणमा भएको खर्च विवरण सार्वजनिक गरेको हो ।

कोरोना नियन्त्रणका लागि १६ करोड २५ लाख रकम प्राप्त भएकोमा ८ करोड ९९ लाख ४८ हजार २ सय रुपैयाँ खर्च भएको सामाजिक विकास मन्त्रालयले जनाएको छ । सबैभन्दा बढी स्वास्थ्य सामग्री खरिदमा ४ करोड ८९ लाख ५४ हजार रुपैयाँ खर्च भएको मन्त्रालयका सूचना अधिकारी सुनिल लिम्बुले बताए । ‘पूर्वाधार शीर्षकमा २ करोड १८ लाख ८७ हजार खर्च भएको छ’ उनले भने, ‘जनशक्ति शीर्षकमा ५३ लाख ४५ हजार, औषधि खरिदमा ६८ लाख ३१ हजार खर्च भएको छ ।’

सामाजिक विकास मन्त्रालयलगायतका स्वास्थ्य सेवा निर्देशनालय सुर्खेत, प्रदेश अस्पताल कालागाउँ सुर्खेत, जनस्वास्थ्य सेवा कार्यालय सुर्खेत, जनस्वास्थ्य सेवा कार्यालय सल्यान, जनस्वास्थ्य सेवा कार्यालय रुकुम पश्चिम, जनस्वास्थ्य सेवा कार्यालय जाजरकोट, जनस्वास्थ्य सेवा कार्यालय दैलेख, जनस्वास्थ्य सेवा कार्यालय कालिकोट, जनस्वास्थ्य सेवा कार्यालय जुम्ला, जनस्वास्थ्य सेवा कार्यालय हुम्ला, जनस्वास्थ्य सेवा कार्यालय मुगु, जनस्वास्थ्य सेवा कार्यालय डोल्पा चौरजहारी अस्पताल, मेहेलकुना अस्पताल, कर्णाली स्वास्थ्य विज्ञान प्रतिष्ठान जुम्लामा कार्यालयबाट कोरोना रोकथाम र उपचारमा खर्च भएको मन्त्रालयले जनाएको छ ।

स्वास्थ्य सेवा कार्यालय दैलेखका लागि १ करोड १९ लाख ५९ हजार र सबैभन्दा कम खर्च प्रदेश आर्युवेद औषधालयमा २ लाख खर्च भएको विवरणमा उल्लेख छ । अस्पताल शीर्षकमा सबैभन्दा बढी प्रदेश अस्पताल सुर्खेतमा ९४ लाख ८० हजार खर्च भएको छ ।

प्रकाशित मिति: बिहीबार, असार १८, २०७७ १६:०९