६८ कर्मचारीले बचाएको बिदा र औषधोपचारको पैसा दिँदा सकियो ६ करोड

A+ A A-

अधिकांश नेपालीले जागिरका लागि रोज्ने पहिलो काम निजामती सेवा देखिन्छ । समान काममा निजीक्षेत्रले पारिश्रमिक बढी दिए तापनि अधिकांश नेपालीको रोजाइ सरकारी जागिर नै हुने गरेको हो ।

विशेषतः जागिरको सुरक्षा र सेवा अवधि सकेर निस्केपछि पाउने सुविधाका कारणले पनि निजामती सेवा वा अन्य सरकारी जागिरमा सर्वसाधारण आकर्षित हुने गर्छन् । बिरामी हुँदा औषधोपचार खर्च, पाएको बिदा नबसेका कारण आउने रकम, जागिरबाट अवकाश पाउँदा पाइने उपदान वा पेन्सनलगायत सुविधाका कारणले गर्दा सरकारी जागरिमा नागरिक आकर्षित भएको देखिन्छ ।

१ जना निजामती कर्मचारीले सेवाबाट अवकाश पाउँदा बचाएकाे बिदा र औषधोपचार खर्चबापत कति रकम पाउँछन् होला ? २२ साउन २०७६ देखि २० फागुन २०७६ सम्मको ७ महिनामा अवकाश पाएका ६८ कर्मचारीलाई यसबापत सरकारले झण्डै ६ करोड रुपैयाँ भुक्तान गरेको छ ।

महालेखा नियन्त्रककाे कार्यालयका अनुसार उनीहरूलाई ५ करोड ७० लाख ८ हजार २ सय ७६ रुपैयाँ दिएको हो । उनीहरूको सञ्चित बिदा र औषधि उपचारबापत लिन बाँकी रकमको हिसाब मात्रै हो यो । सामान्य प्रशासन मन्त्रालयका अनुसार प्रत्येक वर्ष औसत रूपमा वार्षिक ३ हजार कर्मचारीले अवकाश पाउने गरेका छन् ।

अवकाश पाउँदा औसत रूपमा सञ्चित बिदा, खर्च शीर्षक ६०१०००१३३/२७३१३ बाट गरिने भुक्तानी र औषधि उपचार, खर्च शीर्षक ६०१०००१६३/२११२३ बाट गरिने भुक्तानी रकम साढे २ अर्ब रुपैयाँभन्दा बढी जाने गरेको अर्थ मन्त्रालयको तथ्यांक छ ।

पछिल्लो समय अवकाश पाएका ६८ जनामध्ये ३० जनाको मात्रै सञ्चित बिदा बाँकी रहेकोमा १ करोड ९२ लाख ७१ हजार रुपैयाँ पाएका छन् । कर्मचारीले विशेष गरी २ वटा बिदाअन्तर्गतको बिदा बचत गर्ने गरेका हुन्छन् । बिरामी बिदा मासिक रूपमा १ दिन पाउँछन् । कुनै कर्मचारीले वर्षमा १२ दिन पाउने बिदा सेवा अवधि ३० वर्षसम्म लिएन भने अन्तिममा करिब ३६ दिनबराबरकै रकम पाउँछन् ।

तर, घर बिदा भने अधिकतम १८० दिनको मात्रै हुन्छ । घर बिदाबापतको जति बिदा सञ्चित भए पनि कर्मचारीले अधिकतम १८० दिनको बिदाबापतको रकम पाउँछन् । औषधोपचारका लागि दिएको बिदाभन्दा ४५ दिनसम्म बढी लिन पाइने भए पनि बिदा नलिएमा रकम भने मासिक १ दिनका दरले दिने व्यवस्था छ ।

सञ्चित बिदामार्फत एक कर्मचारीले अधिकतम ६ लाख ६० हजारदेखि न्यूनतम २ लाख १२ हजार रुपैयाँसम्म भुक्तानी लिएका छन् । त्यस्तै, औषधोपचारका लागि एक कर्मचारीले १० लाख ८८ हजार रुपैयाँसम्म लगेका छन् ।

६८ मध्ये औषधोपचारका लागि रकम नलैजाने कर्मचारी ४ जना छन् । औषधोपचारमा न्यूनतम १ लाख १५ हजार रुपैयाँ पाएका छन् । औषधोपचारमा ६८ कर्मचारीले गरी ३ करोड ७६ लाख रुपैयाँ रकम पाएका छन् ।

सञ्चित बिदा र औषधोपचारका लागि ६८ मध्ये १ व्यक्तिले १६ लाख रुपैयाँसम्म रकम पाएका छन् भने न्यूनतम रकम पाउनेले ३ लाख रुपैयाँसम्म पाएका छन् ।

प्रकाशित मिति: मंगलबार, असार १६, २०७७ १४:४१