मुख्यमन्त्रीले नै तोडे सरकारको निर्देशन

A+ A A-

कोरोनाका कारण मेला, महोत्सव र भिडभाड हुने कार्यक्रम गर्न सरकारले रोक लगाएको भए पनि गण्डकी प्रदेशका मुख्यमन्त्री पृथ्वीसुब्बा गुरुङले स्याङ्जाको गोठिङमा भीडभाडका बीचमै चक्लाबन्दी कार्यक्रमको उद्घाटन गरेका छन् ।

मुख्यमन्त्री गुरुङले राष्ट्रिय धान दिवसको अवसरमा पुतलीबजार नगरपालिका- ४, गोठिङ फाँटमा सयौँको संख्यामा उपस्थित राजनीतिकर्मी र किसानहरूमाझ जमिन चक्लाबन्दी परियोजनाको शुभारम्भ गरेका हुन् ।

मुख्यमन्त्री उद्घाटनका गर्न ट्रयाक्टरमा चढेपछि उनको सुरक्षार्थ खटिएका सुरक्षाकर्मीहरूसमेत ट्रयाक्टर चढेर उनको सुरक्षामा खटिइरहेका थिए । कोरोना संक्रमणको जोखिम बढेपछि सरकारले कुनै पनि कार्यक्रममा २५ जनाभन्दा बढी जम्मा हुन नपाउने गरी कार्यविधि बनाएको छ ।

गण्डकी प्रदेशमा कोरोना संक्रमणको ‘रेड जोन’का रूपमा रहेको स्याङ्जा पुगेर स्वयम् मुख्यमन्त्रीले नै भीड जम्मा गरेर कार्यक्रमको उद्घाटन गरेपछि सामाजिक सञ्जालमा उनको आलोचना सुरु भएको छ ।

प्रदेश सरकारले कृषिमा आधुनिकीकरण र यन्त्रीकरणका लागि जमिन चक्लाबन्दी परियोजना अगाडि बढाएको हो ।

उद्घाटनपछि मुख्यमन्त्री गुरुङले उपस्थित सञ्चारकर्मीलाई सङ्क्षिप्त प्रतिक्रिया दिँदै जग्गा चक्लाबन्दी र आधुनिक कृषि उपकरणको प्रयोगमार्फत् मात्र कृषि क्षेत्रलाई आत्मनिर्भर बनाउन सकिने बताए ।

प्रदेश सरकारले यस प्रदेशलाई कृषिमा आत्मनिर्भर बनाउने उद्देश्यले जमिन चक्लाबन्दी परियोजनालाई अगाडि बढाएको छ ।

प्रदेश सरकारको अनुदानमा गोठिङमा १ सय २४ किसानको १ सय १० रोपनी जमिन चक्लाबन्दी गरेर सामूहिक रोपाइँ सुरु गरिएको छ । ‘धान उत्पादनमा वृद्धिः आत्मनिर्भर र समृद्धि’ भन्ने नाराका साथ प्रदेश र स्थानीय सरकारको सहयोगमा गोठिङका कृषक समूहले चक्लाबन्दी परियोजनाको काम अघि बढाएका हुन् ।

प्रकाशित मिति: सोमबार, असार १५, २०७७ १६:४४