सलह बेचेर अच्युत र सविनाले पाए १ सय ७० रुपैयाँ

A+ A A-

प्रदेश ५ सरकारले प्रोत्साहन स्वरुप प्रतिकेजी २० रुपैयाँ दिने निर्णय गरेसँगै सलह किरा बोकेर सर्वसाधारण स्थानीय तहमा आउन थालेका छन् ।

शनिबार नेपालमा भित्रिएको सलह रुपन्देहीमा पनि देखिएको थियो । त्यसलगत्तै विपद् व्यवस्थापन समितिको बैठकले सलह किरा छापेर स्थानीय तहमा ल्याउनेलाई प्रोत्साहन स्वरुप प्रतिकेजी २० रुपैयाँ दिने निर्णय गरेको थियो ।

सलह किरा छोप्नेलाई प्रोत्साहन रकम दिने निर्णयपछि सामाजिक सञ्जालमा समेत विभिन्न टीकाटिप्पणीसमेत भएको थियो । तर, सर्वसाधारणले भने सलह किरा छापेर स्थानीय तहमा बुझाउँन सुरु गरेका छन् ।

आइतबार बुटवलका २ बालबालिकाले बुटवल उपमहानगरपालिका-४ को वडा कार्यालयमा सलह लगेर गएका थिए । सोही वडाका ४ का अच्युत न्यौपाने र सविना थारु सलहलाई लगेर वडा कार्यालय पुगेका थिए ।

वडा कार्यालयमा पुगेका अच्युतले ५ किलो र सविनाले साढे ३ किलो सलह छोपेर ल्याएका थिए । उनीहरूले ल्याएको सलह तौलिँदै बुटवल-४ का वडाध्यक्ष टंकप्रसाद पराजुलीले वडाबाट उपमहानगरपालिकामा पठाएका थिए ।

बुटवल उपमहानगरपालिका वरिष्ठ अधिकृत तथा आर्थिक विकास महाशाखा प्रमुख भुवाप्रसाद लुइँटेलले वडा कार्यालयबाट उपमहानगरमा पठाएपछि प्रतिकेजी २० रुपैयाँका दरले अच्युत र सविनालाई १ सय ७० रुपैयाँ दिइएको बताए । ‘धन्यवादका साथ उहाँहरूलाई पैसा दिइयो । प्रोत्साहन भनेको यही त हो,’ उनले भने ।

२० रुपैयाँ प्रतिकेजीमा किसानले लगे सलह

अच्युत र सविनाले उपमहानगरपालिकालाई बुझाएको सलह वडा नम्बर १२ का कुखुरापालक कृषक बुद्धि प्रसाद भुसालले किने छन् ।

काम विशेषले उपमहानगरपालिका कार्यालय पुगेका बुद्धि सलह छापेर ल्याएका बालबालिकालाई देखेपछि उनी केही बेर त्यहीँ बसे ।

बालबालिकाबाट सलह खरिद गरेपछि उनले कुखुराका लागि आफूलाई बिक्री गर्न प्रस्ताव गरे । त्यसपछि उपमहानगरपालिकाले त्यत्ति नै बेला प्रतिकेजी २० रुपैयाँमा बुद्धिलाई दियो । ‘हामीले किसानलाई नै त्यहि मुल्यमा दियौं । प्रोटिन हुने रहेछ । दाना हुन्छ भन्दै बृद्धि जि ले लैजानुभयो,’ उनले भने ।

प्रकाशित मिति: आइतबार, असार १४, २०७७ १९:४६