साम्राज्ञीमाथि डेब्यू चलचित्रमै भेदभाव !

A+ A A-

भर्खर १७ वर्ष पुगेकी साम्राज्ञी राज्यलक्ष्मी शाहलाई चलचित्र क्षेत्रमा रुचि थिएन । बरु, उनलाई फेसन डिजाइनिङमा विशेष चासो थियो ।

कहिलेकाहीँ संयोग यस्तो बनिदिन्छ, जुन सोचिएको पनि हुन्न । साम्राज्ञीको जीवनमा पनि यस्तै एउटा संयोग बन्यो- चलचित्र क्षेत्रको प्रवेश ।

१२ कक्षाको परीक्षाको अन्तिम दिन थियो । परीक्षाको तनाव सकिएको खुसी लिएर साम्राज्ञी घर फर्किइन् ।

घर छिर्नसाथ साम्राज्ञीकी ममीले उनलाई नजिक बोलाइन् र मसिनो स्वरमा बोलिन्- 'भुवन केसीको फोन आएको छ । चलचित्र खेलाउने रे तँलाई । ला, कुरा गर ।'

एकछिन त साम्राज्ञी अकमक्किइन् । केही डरसहित फोन समातिन् र कुरा गरिन् । भुवनले आफूले चलचित्र बनाउन लागेको र साम्राज्ञीलाई खेलाउन चाहेको बताए । साम्राज्ञीले पनि 'हुन्छ'को उत्तर फर्काइन् ।

भुवनले आफ्नो अफिसमा भेट्न बोलाए र स्क्रिप्ट सुनाए । साम्राज्ञीलाई स्क्रिप्ट मनपर्‍यो । उनले चलचित्रमा काम गर्न सम्झौता गरिन् । उक्त चलचित्र थियो- 'ड्रिम्स' ।

चलचित्रमा साम्राज्ञीले युवा स्टार अनमोल केसीसँग काम गर्नुपर्ने थियो । तर, साम्राज्ञीलाई अनमोल को हो ? भन्ने पत्तो पनि थिएन । उनले मतलब पनि गरिनन्- 'काम गर्न थालेसी परिचय भइहाल्छ ।'

चलचित्रको सम्झौता गर्दा नै भुवनले भनेका थिए- 'नानु, चलचित्रमा काम गर्नु भनेको 'लेवर वर्क' हो । गाह्रो हुन्छ है ।'

साम्राज्ञीले यसलाई गम्भीर सोचिनन् । उनले जति पनि चलचित्र हेरेकी थिइन्, सबैमा कलाकारलाई राम्रै रूपमा देखेकी थिइन् ।

तर, जब चलचित्रको छायाङ्कन सुरु भयो, त्यहाँ उनले महसुस गरिन्, 'ओहो ! यो काम त साँच्चिकै गाह्रो रहेछ ।'

जाडो/गर्मी केही भन्न नपाइने । घाम भयो भन्न पनि नपाउने । हिँडेर कहाँकहाँसम्म पुग्नुपर्ने । यो सबै साम्राज्ञीका लागि पीडा नै थियो । त्यो पललाई सम्झँदै साम्राज्ञी भन्छिन्, 'एउटा टेक लिन पनि चारतिरबाट क्यामेरा फिट गरिएको छ । सानो कुरा नमिले पनि फेरि खिचेको छ । एकचोटि त सक्दिनँजस्तै लागिसकेको थियो ।'

साम्राज्ञीका लागि काममा मात्र पीडा भएन, उनले निर्माण पक्षको हेपाइ पनि महसुस गर्नुपर्‍यो । उनको थाकेको शरीरलाई शीतल दिनुको सट्टा पटक-पटक मन पनि भाँचिदिए ।

साम्राज्ञी चलचित्र क्षेत्रमा नयाँ थिइन् । त्यसैले पनि उनलाई को-एक्टर अनमोलको जस्तो सुविधा उनलाई थिएन । सँगै टेक दिएका साम्राज्ञी र अनमोलमा निर्माण पक्षले धेरै भेदभाव गर्‍यो ।

यस विषयमा साम्राज्ञी भन्छिन्, 'टेक सकिएपछि अनमोललाई जुस पिउने भन्दै सोध्न आइपुग्थे । उसलाई छाता ओडाइथ्यो । तर, मलाई कसैले केही वास्तै गर्दैनथे । त्यो बेलाचाहिँ धेरै दु:ख लाग्थ्यो ।'

अनमोलका लागि ड्रेस निर्माणपक्षले नै उपलब्ध गराएको थियो । साम्राज्ञीले आफ्ना लागि आफैँ तयार गरेकी थिइन् । तर, साम्राज्ञीले आफूले लगेको ड्रेस पनि फिर्ता पाइनन् ।

साम्राज्ञीको कामको विषयमा पनि कसैले प्रतिक्रिया दिएनन् । राम्रो गरेको वा नगरेको उनलाई पत्तै थिएन । तैपनि चुपचाप काम गरिरहिन्, साम्राज्ञीले ।

छायाङ्कनको समयमा भएको यस्तो व्यवहारले साम्राज्ञी निर्माण पक्षसँग निकै रुष्ट थिइन् । आफूले भोग्नुपरेको पीडाका कारण उनलाई चलचित्र क्षेत्रप्रति नै वितृष्णा जागेको थियो ।

उनले सोचेकी थिइन्- 'यही नै मेरो पहिलो र अन्तिम चलचित्र हुनेछ ।'

०००

'ड्रिम्स' रिलिज भयो । हलमा दर्शकको उत्साहजनक उपस्थिति रह्यो । धेरैले दर्शकले साम्राज्ञीको काम रुचाए । निर्माण पक्षका अन्य सदस्यहरू हलमा पुग्दा दर्शकले साम्राज्ञीलाई खोजिरहेका थिए ।

चलचित्र रिलिजको मतलब पनि नगरी घरमा नै बसेकी साम्राज्ञीको मोबाइलमा घण्टी बज्यो । साम्राज्ञीले उठाइन्, 'नानी, तिमीमा यत्तिका हुटिङ आइरहेको छ । तिम्रो कामलाई मन पराएका छन् । आऊ तिमी ।'

साम्राज्ञीले दर्शकको अपार माया पाइन् । त्यो मायाले उनलाई चलचित्र क्षेत्रमा नै निरन्तरता दिन हौसला दियो ।

'ड्रिम्स' रिलिजपछि साम्राज्ञीलाई धेरै चलचित्रबाट अफर आएको थियो । साम्राज्ञी सुनाउँछिन्- 'साँच्चिकै स्क्रिप्ट पढ्न भ्याई-नभ्याई नै थियो ।'

०००

साम्राज्ञीले अहिलेसम्म ८ वटा चलचित्रमा काम गरिसकेकी छन् । यी ८ चलचित्रमध्ये ३ चलचित्रबाट आफूले निकै शोषण भोग्नुपरेको साम्राज्ञीले बताएकी छन् । सामाजिक सञ्जाल इन्स्टाग्राममा एक भिडियो पोस्ट गर्दै साम्राज्ञीले आफूमाथि शोषण भएको बोलेकी हुन् ।

नेपाली चलचित्र क्षेत्रमा अहिले नेपोटिज्म र ग्रुपिज्मको विषयमा विभिन्न तर्क-वितर्क भइरहेको छ । यस्तैमा, साम्राज्ञीले पनि आफ्नो भनाइ राखेकी हुन् ।

आफूलाई ३ निर्माण पक्षले गरेको शोषण सुनाउन पनि नसक्ने उनको भनाइ छ । उनले भनेकी छन्, 'मैले जति पनि ब्यानरसँग काम गरेँ, तीमध्ये धेरैसँग दोहोर्‍याएर काम नगर्नुको कारण उहाँहरूले गर्ने व्यवहार नै हो । एउटा कलाकारले पाउनुपर्ने सानो सम्मान पनि यहाँ पाइँदैन ।'

छायाङ्कनस्थलमा पानी माग्दा पनि अपशब्द सुन्नुपर्ने साम्राज्ञीको गुनासो छ । ‘सुटिङ सेटमा खाना र पानीको व्यवस्था उपलब्ध गराउन आग्रह गर्दा निर्माता/निर्देशकहरू आक्रमण शैलीमा आउँथे', साम्राज्ञी भन्छिन्, 'उनीहरूको व्यहार देखेर धेरै बेर रुन्थेँ, अनि केही नभएजस्तो गरेर फेरि सुटिङ गर्थेँ । किनकि, मलाई कामसँग प्रेम छ ।'

यी सबै कुरा बाहिर ल्याउँदा नराम्रो इमेज बन्ने भए पनि बोल्नैपर्ने विषय भएकाले बोल्नुपरेको साम्राज्ञीले प्रष्ट पारेकी छन् ।

प्रकाशित मिति: आइतबार, असार १४, २०७७ १२:१९