नेगेटिभ रिपोर्ट आएको १२ दिनपछि क्वारेन्टाइनमा बसेका युवकमा कोरोना

A+ A A-

मकवानपुरका थप २ जना पुरुषमा कोरोना संक्रमण देखिएको छ । बकैया र मनहरी गाउँपालिकाका १/१ जना पुरुषमा शुक्रबार संक्रमण देखिएको हो ।

भारतबाट आएका मनहरीका २६ वर्षीय युवकमा शुक्रबार हेटौंडास्थित प्रादेशिक कोरोना प्रयोगशलामा गरिएको परीक्षणमा कोरोना संक्रमण देखाएको हो । उनको ३२ जेठमा पहिलो पटक स्वाब परीक्षण गरिएको थियो ।

पहिलो पटकको परीक्षणमा नेगेटिभ देखाए पनि १२ दिनपछि कोरोना संक्रमण देखाएको हेटौंडा आइसोलेसनका इञ्चार्ज भोला चौलागाईंले जानकारी दिए ।

उनी भारतबाट आफ्नो दाईसहित करिब ६/७ जनासँग मनहरी आएका थिए । उनीसँग आएका मनहरीका ६ जनामा यसअघि नै संक्रमण पुष्टि भइसकेको छ । जसमध्ये ४ जनाले कोरोना जितेर घर फर्किसकेका छन् । संक्रमित युवक भारतबाट आएर सिधै मनहरी-३ लामिटारमा रहेको क्वारेन्टाइनमा बसेको इञ्चार्ज चौलागाईंले बताए ।

संक्रमित युवकको दाईलाई पनि ५ असारमा कोरोना संक्रमणको पुष्टि भएको थियो । उनको ३० वर्षीय दाई हाल हेटौंडा आइसोलेसनमा उपचाररत् छन् । ‘यसअघि संक्रमण देखिएका मनहरीका ६ जनामध्ये १ महिलासहित ४ जना डिस्चार्ज भइसकेका छन् । २ जना भने आइसोलेसनमै उपचाररत् छन्,’ इञ्चार्ज चौलागाईंले भने ।

यसैगरी भारतबाट २ असारमा आएका बकैया-११ का १७ वर्षीय युवकमा पनि शुक्रबार कोरोना संक्रमण पुष्टि भएको छ । महेन्द्र मावि छतिवनको क्वारेन्टाइनमा बसेका युवकको हेटौंडाको प्रयोगशालामा गरिएको स्वाबको पुनः परीक्षणमा संक्रमण देखिएको हो ।

यसअघि १० असारमा गरिएको स्वाब परीक्षण बिग्रिँदा नतिजा नआएको आइसोलेसनका इञ्चार्ज भोला चौलागाईंले जानकारी दिए ।

संक्रमित युवक दिल्लीको एक होटलमा किचन हेल्पर काम गर्दै आएका थिए । उनी बकैयाका अन्य ७ जनासँगै आएको चौलागाईंले बताए ।

बकैयाकै ७ जनाको रिपोर्ट भने नेगेटिभ आएको छ । संक्रमित युवकलाई हेटौंडा आइसोलेसनमा भर्ना गरिएको उनले जानकारी दिए ।