१५ असारअघि नै २० प्रतिशत रोपाइँ सम्पन्न

A+ A A-

यो वर्ष मनसुन समयमै सुरु भएका कारण २० प्रतिशत धान रोपाइँ भएको कृषि विभागले जानकारी दिएको छ । नेपालमा धान उत्पादन हुने क्षेत्रफलको २०.२ प्रतिशत भूभागमा धान रोपाई सम्पन्न भइसकेको विभागले जनाएको हो ।

१५ असारअघि नै देशभर २०.२ प्रतिशत धान रोपाइँ सम्पन्न भएको कृषि विभागका सूचना अधिकारी डा. महादेव प्रसाद पौडेलले जानकारी दिएका छन् । विगतका वर्षमा भन्दा यो वर्ष मनसुन समयमा सुरु भएको कारण उच्च पहाडी र पहाडी क्षेत्रमा धान रोपाइँ छिटै भएको विभागका सूचना अधिकारी डा. पौडेले बताएका छन् ।

सबैभन्दा बढी प्रदेश ५ मा ३६.२६ प्रतिशत भूभागमा रोपाइँ भएको छ । त्यस्तै, सुदूरपश्चिममा २१.४६, कर्णालीमा २०.११, बागमतीमा १८.६८, प्रदेश २ मा १५.५३, गण्डकीमा १३.७२ र प्रदेश १ मा १०.४१ प्रतिशत भूभागमा रोपाइँ सकिएको छ ।

गत असार १० गतेसम्म भएको रोपाइँको तुलनामा ८.४१ प्रतिशतले बढी हो । उक्त अवधिमा उच्च पहाडमा २६.०७, मध्य पहाडमा २०.०७ र तराईमा १९.७५ प्रतिशत भुभागमा रोपाइँ सकिएको छ । समयमै मनसुन सुरु हुनाले रोपाइँ बढेको मन्त्रालयले बताएको छ ।

कृषि तथा पशुपन्छी विकास मन्त्रालय मन्त्रालयका अनुसार देशभर १४ लाख ९१ हजार ७ सय ४४ हेक्टरमा धान खेती हुँदै आएको छ । नेपालमा २ जिल्लामा बाहेक सबै तिर धान उत्पादन हुने गरेको छ । नेपालमा १ सय ३० जातका धान उत्पादन हुँदै आएको विभागले जनाएको छ ।

चालु आर्थिक वर्षमा ५५ लाख ५० हजार मेट्रिक टन धान नेपालमा उत्पादन भएको छ भने १० लाख मेट्रिक टन भारतलगायत अन्य देशबाट आयात भएको विभागले जनाएको छ । कृषि मन्त्रालयले यो वर्ष ५७ लाख मेट्रिक टन धान उत्पादन गर्न लक्ष्य लिएको छ । मन्त्रालयले आगामी ३ वर्षमा ६५ लख मेट्रिक टन धान उत्पादन गरेर धानमा नेपालमा अत्मानिर्भर बनाउन योजना अघि सारेको छ ।

त्यस्तै, चालु आर्थिक वर्षदेखि धानको उन्नत वीउ उत्पादन गर्ने जिम्मा पनि स्थानिय तहलाई दिएको विभागले जनाएको छ । विभागका अनुसार तरकारी, धान, फलफूलजस्ता उन्नत वीउको उत्पादन गर्ने जिम्मा स्थानीय तहलाई नै दिएको हो । विगतका वर्षहरूमा विभागले विभिन्न कृषि अनुसन्धान केन्द्र, सहकारीहरूसँग मिलेर उन्नत वीउ उत्पादन गर्दै आएको थियो । यो वर्षदेखि भने उन्नत धान उप्पादनको जिम्मा स्थानिय तहलाई दिएको जनाएको छ ।

प्रकाशित मिति: शुक्रबार, असार १२, २०७७ १८:४४