प्रदेश ५ मा साढे ६ हजार व्यक्तिको स्वाब परीक्षण हुन बाँकी

A+ A A-

प्रदेश ५ का विभिन्न प्रयोगशालामा रहेका ६ हजार बढी स्वाबको परीक्षण हुन बाँकी छ । प्रदेश स्वास्थ्य निर्देशनालयका अनुसार बिहीबारसम्म प्रदेशका १२ जिल्लाका ६ हजार ७ सय ५१ वटा स्वाब परीक्षण गर्न बाँकी रहेको हो ।

संकलित स्वाबमध्ये सबैभन्दा बढी दाङका रहेका छन् । हालसम्म दाङमा ८ हजार ७ सय ८१ जनाको स्वाब संकलन गरिएकोमा ६ हजार ६ सय ६८ जनाको रिपोर्ट नेगेटिभ र ३ सय ८२ जनाको रिपोर्ट पोजिटिभ आएको छ । अझै १ हजार ६ सय ९१ स्वाब परीक्षण हुन बाँकी छन् ।

त्यस्तै, पाल्पाका १ हजार ८ स्वाब परीक्षण हुन बाँकी छ । पाल्पामा हालसम्म ३ सय ९३ जनामा कोरोना पोजिटिभ देखिएको छ ।

त्यस्तै, अर्घाखाँचीका ८ सय ४३ जनाको रिपोर्ट आउन बाँकी छ । यो जिल्लामा अहिलेसम्म २ सय ५४ जनामा कोरोना पोजिभिट आएको स्वास्थ्य निर्देशनालका प्रवक्ता रोशनलाल चौधरीले जानकारी दिए । कपिलवस्तुमा अझै ६ सय ९५ जनाको रिपोर्ट आउन बाँकी छ ।

प्रदेश ५ मा सवैभन्दा बढी संक्रमित ७ सय ८ जना रहेको कपिलवस्तुमा हालसम्म ६ हजार ७ सय ८८ स्वाब संकलन गरिएको छ । त्यस्तै, प्यूठानमा ६ सय ७७ जनाको रिपोर्ट आउन बाँकी छ । यो जिल्लामा १ सय ९१ जनामा कोरोना पाजिटिभभ देखिएको छ ।

रोल्पामा ३ सय २७, नवलपरासीमा १ सय ३, गुल्मीमा ५ सय ७३, रुपन्देहीमा १ सय ८४ र बाँकेमा २ सय १९ जनाको रिपोर्ट आउन बाँकी छ ।

यी स्वाबमध्ये राष्ट्रिय जनस्वास्थ्य प्रयोगशालामा १ हजार ८ सय २५, प्रदेश जनस्वास्थ्य प्रयोगशाला भैरहवामा १ हजार २ सय ३४, भेरी अस्पताल प्रयोगशालामा ६ सय ५५, राप्ती स्वास्थ्य विज्ञान प्रतिष्ठानमा २ हजार २ सय ३१ र अन्य प्रयोगशालामा ७ सय ९६ वटा नमुना परीक्षणका लागि बाँकी रहेको प्रवक्ता चौधरीले जानकारी दिए ।

संकलन गरिएका स्वाबको रिपोर्ट आउन धेरै दिन लाग्न थालेपछि प्रदेश सरकारले परीक्षणको दायरा थप गर्न पीसीआर मेसिन खरिदको काम सुरु गरिसकेको छ ।

प्रदेशमा हालसम्म ३ हजार १ सय १० जनामा कोरोना संक्रमण पुष्टि भएको छ । जसमध्ये १ हजार ४ सय ५१ जना निको भएर घर फर्किएका छन् ।

१६ हजार बढी क्वारेन्टाइनमा

हालसम्म प्रदेश ५ मा १६ हजार बढी व्यक्ति क्वारेन्टाइनमा रहेका छन् । स्वास्थ्य निर्देशनालयले सार्वजनिक गरेको अध्यावधि विवरणअनुसार प्रदेशको १२ जिल्लामा १६ हजार ४ सय ६३ जना क्वारेन्टाइनमा रहेका छन् ।

बाँकेमा १ हजार १, बर्दियामा १ हजार ७ सय २, कपिलवस्तुमा ७ सय ९, अर्घाखाँचीमा १ हजार ५५, रुपन्देहीमा १ हजार ६६, पाल्पामा १ हजार ९ सय ९४, गुल्मीमा २ हजार ९८ जना रहेका छन् । त्यस्तै, नवलपरासीमा ७ सय ५, दाङमा ३ हजार ४ सय ४, रोल्पामा ३ सय ६६, रुकुम पूर्वमा १ सय ५१ र प्युठानमा २ हजार २ सय १२ जना क्वारेन्टाइनमा रहेका छन् ।

कोरोनाबाट १० जनाको मृत्यु

प्रदेश ५ मा हालसम्म १० जना कोरोना संक्रमितको मृत्यु भएको छ । त्यसमध्ये १ जना आत्महत्यापछि कोरोना पुष्टि भएका व्यक्ति छन् ।

अर्घाखाँचीको हरि मावि क्वारेन्टाइन सितगंगा-५ का पुरुषले ३ असारमा आत्महत्या गरेका थिए । पछि उनको पीसीआर रिपोर्ट पोजिटिभ आएको थियो । त्यो बाहेक ९ जना संक्रमण रहेकै अवस्थामा मृत्यु भएका थिए । ज्यान गुमाउनेमा बाँकेका २, गुल्मी, अर्घाखाँचीका ३/३, दाङ र पाल्पाका १/१ जना रहेका छन् ।

प्रकाशित मिति: शुक्रबार, असार १२, २०७७ १०:२६