पोखरा महानगरकाे नीति तथा कार्यक्रम : पूर्वाधार विकास, खानेपानी र ताल संरक्षण प्राथमिकतामा

पोखरा महानगरकाे नीति तथा कार्यक्रम : पूर्वाधार विकास, खानेपानी र ताल संरक्षण प्राथमिकतामा

A+ A A-

पोखरा महानगरपालिकाले आगामी आर्थिक वर्ष २०७७/०७८मा भौतिक पूर्वाधार निर्माणमा मुख्य जोड दिने भएको छ। बुधबार महानगरपालिकाका प्रमुख मानबहादुर जिसीले आगामी आर्थिक वर्षको नीति तथा कार्यक्रम सार्वजनिक गर्दै भौतिक पूर्वाधार, सडक खानेपानी, ताल संरक्षणलगायतका कार्यक्रमलाई प्राथमिकतामा राखेको बताए।

आर्थिक वर्ष २०७७/०७८ मा पूर्वाधार विकासलाई प्राथमिकतामा राख्दै आर्थिक वर्ष २०७६/०७७ मा निर्माण सम्पन्न गर्ने योजनालाई निरन्तरता दिँदै भौतिक विकासलाई अगाडि बढाउने प्रमुख जिसीले बताए। उनले चालु आर्थिक वर्ष २०७६/०७७ मा अगाडि बढाइएका १२ वटा सडकमा ६० किमी बाटो ग्राबेल र १३ किमी बाटो कालोपत्रे भएको बताए ।

उनका अनुसार सडकहरूको ६० प्रतिशत भौतिक प्रगति र ४८.६ प्रतिशत वित्तीय प्रगति भएको छ । ८ वटा मोटरेबल पुलमध्ये ४ वटा सम्पन्न हुने चरणमा पुगेका र अन्य ४ वटा पुलहरूको भूमिगत संरचना तयार भएको जिसीले बताए ।

सिर्जना चोकस्थित आकाशे पुलको फाउन्डेसनको काम सम्पन्न भई स्टिल फ्रेब्रिकेसनको काम भइरहेको छ ।

ती योजनासमेतलाई महानगरले प्राथमिकतामा राखेकाे छ भने सडक छेउछाउमा रहेका सोलार बत्तीलाई नेपाल विद्युत प्राधिकरणसँगको सहकार्यमा मर्मत सम्भार गरी स्मार्ट सडक बत्तीको व्यवस्थापन गर्ने कार्य अगाडि बढाएको उनकाे भनाइ छ ।

साथै महेन्द्रपुल, पृथ्वीचोक, सभागृहचोकलगायतका स्थानमा ट्राफिक लाइट व्यवस्थापनका लागि आवश्यक सर्भे डिजाइन सम्पन्न भइसकेको र महेन्द्रपुलमा ट्राफिक लाइट निर्माण कार्यका लागि बोलपत्र आव्हान गरिएको उनले जानकारी दिए ।

मेयर जिसीले विगतकाे याेजनाकाे प्रगति र अबका कार्यक्रमबारे यस्ताे जानकारी दिएका छन् :

मुख्य सहरी सडकहरूको स्तर उन्नति गर्ने क्रममा पोखरा महानगरपालिका पूर्वाधार कार्यालय कास्की र सडक विभाग गरी ४० करोड रूपैयाँ लागतमा अस्फाल्ट कंक्रिट गर्नका लागि टेन्डर प्रक्रिया सकिएर काम सुरू हुने चरणमा पुगेको छ ।

भौतिक पूर्वाधारमा थप गुणस्तर कायम गर्न सडक विज्ञको रूपमा छुट्टै प्राविधिक व्यवस्था गर्नुका साथै निर्माण सामग्रीको गुणस्तर कायम गर्नका लागि महानगरपालिकाको आफ्नै गुणस्तर मापन प्रयोगशाला सञ्चालनमा ल्याइएको छ ।

मेयर नमुना सडक निर्माणअन्तर्गत पोखरा-१७ को बिरौटादेखि तीनकुनेसम्म (आरटीओ) सडक, वडा नम्बर १० को राममार्ग सडक निर्माण भइरहेको छ । चालू आर्थिक वर्षमा १७ किमी कालोपत्र (पिच) ७० किमी ग्राभेल, ९.११ किमी बाटो ढलान, १२ किमी बाटो स्तरोन्नति, ३ दशमलव ५ किमी नाला निर्माण, ४१ दशमलव ५ किमी फूटट्रयाक निर्माण, ५ किमी ढल तथा नाली निर्माण र २ दशमलव ५ किमी खानेपानी पाइपलाइन विस्तार गरिएको छ ।

वडा नम्बर १८ मा राष्ट्रिय विभूति तथा पार्कसहित खुल्ला व्यायमशाला निर्माण गरिएको छ । अन्य २ वटा वडामा पार्कसहित खुल्ला व्यायामशाला निर्माण गर्नुका साथै १७ वटा वडामा खुल्ला व्यायामशाला निर्माण गरिएको छ ।

लेक टु लेक, केभ टु केभ जोड्ने सडकको स्तरोन्नति गरिएको छ भने फेवातालदेखि बेगनासतालसम्म सिधा बस सेवा सञ्चालन गरिएको छ । पोखरा सभागृह मर्मत सम्भार कार्य अगाडि बढाइएको छ ।

सेती गर्जलाई साहसिक पर्यटन पूर्वाधार निर्माण सराङकोट पर्यटन पूर्वाधार निर्माण, पातलो छाँगोमा सिसाकोपुल निर्माण लगायतका आयोजनाहरू सम्झौताको प्रक्रियामा रहेका छन्।पोखरा ३२ लामेआहालमा पोखरा क्षेत्रीय बसपार्क निर्माणको लागि प्रदेश सरकारसँग समन्वय गरिएको छ । ग्रामीण कृषि सडक स्तरोन्नति तथा अन्य सहरी सडक मर्मत सम्भार तथा विस्तार गरिएको छ ।

सडक सबै पूर्वाधारको पनि पूर्वाधार हो । क्षेत्रफलको हिसाबले सबैभन्दा ठूलो महानगर पोखराले सडक पूर्वाधारको विकासलाई प्राथमिकतामा राखेको छ । महानगरका सबै ३३ वटै वडाहरूलाई एक आपसमा स्तरीय सडक सञ्जालबाट जोड्ने लक्ष्य राखिए पनि यस आर्थिक वर्षमा कोरोना महामारीको कारण लक्ष्य प्राप्ति हुन नसकेकाे र।आगामी आर्थिक वर्षमा समेत सडक सञ्जाल कार्यक्रमलाई निरन्तरता दिने नीति लिइएको छ ।

पोखरामा अझै ६ हजार ३ सय घरमा खानेपानीको धारा नपुगेको बताउँदै साविक लेखनाथवासीलाई शुद्ध खानेपानी उपलब्ध गराउन चालू आर्थिक वर्षमा लेखनाथ साना सहरी खानेपानी आयोजनाको नरशपुर, थुमाकोडाँडा, आरुपाटामा खानेपानीको ट्यांकी निर्माण कार्य सम्पन्न भएको छ ।

सबै घरमा खानेपानी पुर्‍याउने उद्देश्यले खानेपानीको लाइनसमेत विस्तार गरी घर-घरमा धारा जोड्ने कार्य भइरहेको छ । पोखरा २१ मा र ३३ सहलगानी खानेपानी आयोजना अगाडि बढाइएको र बेगनास सहलगानी खानेपानी आयोजना, लामागाउँ खानेपानी आयोजना अगाडि बढाइएको छ ।

पोखरा महानगरपालिको बजार क्षेत्रमा प्रत्येक घरमा शुद्ध पानी वितरण गर्ने उद्देश्यका साथ संचालित ७ अर्ब रुपैयाँको खानेपानी परियोजनाको काम अगाडि बढेकाे छ । आरटीअाे रोड खानेपानी योजना, काहुँ खानेपानी योजना, सराङकोट खानेपानी योजना साथै वडा नम्बर २८,२४,३३,२१ र २५मा खानेपानी योजनाहरू संचालन गरिएका छन् । महानगरभित्र ६ हजार ३ सय घरधुरीमा खानेपानीको समस्या रहेकाले आर्थिक वर्ष ०७७/०७८ मा महानगरभित्रका सम्पूर्ण घरहरूमा १ घर एक धाराको व्यवस्था गरी पूर्ण खानेपानीको सुविधायुक्त सहर घोषणा गरिने छ ।

पोखरामा कोरोना महामारी पश्चात नेपाल सरकारले गरेको लकडाउनका कारण महानगरले मात्रै करिब १६ अर्ब रुपैयाँको क्षति व्यहोरेको छ । लकडाउनले हरेक क्षेत्रका गतिविधि ठप्प हुँदा ठूलो आर्थिक क्षति पुगेको छ । महानगरपालिकाको आन्तरिक राजश्व संकलन, विकासका कार्यक्रमहरू र नियमित सेवा प्रवाहमा प्रतिकुल असर परेकाे छ ।

महानगरले ३ वर्षमा सिकेको पद्धतिबाटै आगामी योजना तथा कार्यक्रममा पनि दूरदृष्टिलाई जोड दिनेछ । यस आर्थिक वर्षमा सहरी योजना आयोग गठन गरेका छौँ । महानगरपालिकाले दीर्घकालीन दृष्टि निर्माण गरेर यस वर्षको नीति तथा कार्यक्रम तर्जुमा गरेका छौँ ।

प्रकाशित मिति: बुधबार, असार १०, २०७७ १७:३२