उपचारमा प्रयोग हुने यी जडिबुटीहरू

A+ A A-

हामी जुनसुकै बेला दुर्घटनामा पर्न सक्छौँ । त्यस्तो अवस्थामा हाम्रो वरिपरि पाइने जडिबुटीबाटै उपचार गर्न सकिन्छ । सामान्य चोटदेखि शरीर पोलेका समस्या घरमा नै उपचार गर्न सकिन्छ । स्वास्थ्यमा आपतकालीन समस्या परेका बेला उपचारमा प्रयोग हुने यी घरेलु जडिबुटीहरूबारे थाहा पाऔँ ।

घीउकुमारी

शरीरको छाला जलेमा वा पोलेमा घीउकुमारी अचुक औषधिको रूपमा प्रयोग गरिन्छ । पोलेको ठाउँमा यसको रस लगाउँदा चिसो र शीतलता प्रदान गर्छ । गमला वा सानो प्लाष्टिकको बट्टामा नै घर वरिपरि रोप्न सकिने घीउकुमारीका अनगिन्ती फाइदा छन् ।

तीतो घीउकुमारी

घीउकुमारीकै एउटा जात (तर ठूला आकारका पात)को यो जडिबुटी कब्जियत, एपेन्डिसाइटिस र पित्तासयको रोगको उपचारमा प्रयोग गरिन्छ । एलोलाई क्याप्सुलको रूपमा पनि किन्न पाइन्छ । यो क्याप्सुल नियमित सेवन गरेमा पाचन प्रणालीलाई सहयोग पुग्छ ।

अदुवा

दैनिक भान्छामा प्रयोग हुने अदुवाले पाचनशक्ति वृद्धि गर्छ । यसले अनावश्यक ग्यास फाल्न मद्दत गरी पेटलाई हल्का बनाउनुका साथै बान्ता आउने समस्याको समाधान गर्छ । हरेक रात एक कप अदुवा चिया खाँदा पाचन पक्रियालाई सहज बनाउँछ ।

लसुन

क्यान्सर रोगबाट बचाउने लसुनले रोग प्रतिरोध क्षमतालाई पनि बलियो बनाउँछ । एन्टिभाइरस र एन्टिव्याक्टेरियल गुणयुक्त लसुनले चिसो, ज्वरो र फ्लुबाट जोगाउँछ । लसुनको नियमति सेवनले आन्तरिक संक्रमणबाट बचाउँछ ।

बेसार

बेसार आफैँमा एन्टिसेप्टिक र एन्टिव्याक्टेरियायुक्त तत्त्व हो । त्यही भएर काटेको ठाउँमा, जलेको स्थान वा अन्य घाउमा यसको प्रयोग गरिन्छ । सामान्य चोटपछिको घाउमा बेसार दल्ने संस्कार प्रचलित छ ।

प्याज

प्याजमा क्युरसेटिन नामको रसायन हुन्छ, जसले ग्याष्ट्राइटिसबाट पनि बचाउँछ । प्याजले विभिन्न संक्रमण र रोगहरूबाट बचाउँछ । प्याजमा विभिन्न पोषण तत्त्व हुन्छ, जसले हामीलाई अन्य रोग लाग्नबाट पनि जोगाउँछ । हनहनी ज्वरो आउँदा प्याजको टुक्रालाई निधारमा राखेमा ज्वरो घट्छ । प्याजलाई हल्का पानीमा डुबाएर निधार, पैताला र हातखुट्टामा दल्दा बिरामीलाई हल्का महसुस हुन्छ ।

हिङ

हिङले पाचनक्रिया मजबुत बनाउँछ । श्वासप्रश्वाससम्बन्धी रोगबाट बचाउँछ । रोघाखोकी लाग्नबाट बचाउँछ । तातो पानीमा राखेर हिङ खाँदा ब्रोन्काइटिसमा राहत मिल्छ । पेट दुख्दा तातो पानीसँग हिङ खाँदा दुखाइ कम हुन्छ । दाँत दुखेमा हिङ खाँदा राहत मिल्छ । दुखाइ भएको ठाउँमा हिङको लेप लगाउँदा दुखाइ कम हुन्छ । हिङले रोग प्रतिरोधात्मक क्षमता बढाउँछ ।

जाइफल

जाइफल घोटेर दूधमा मिसाई पिउनाले निद्रा लाग्छ तर यो बढी मिसाएमा बढी नशाकारक एवं हानिकारक हुन सक्छ । जीउ दुखेमा, हातगोडा गलेमा जाइफललाई पानी वा दूधमा पकाई पिउने गर्दा त्यो समस्या केही क्षणमै सुधार हुन्छ ।

तुलसी

तुलसीमा एन्टिबायोटिक गुण हुन्छ, जो मलेरिया रोगका लागि लाभकारी हुन्छ । तुलसीको सेवनबाट शरीरमा रोग प्रतिरोधी क्षमता बढ्छ, यसको कुनै साइडइफेक्ट हुँदैन र यसको सेवनबाट रुघाखोकी, निमोनिया निको हुन्छ ।

ल्वाङ

ल्वाङलाई खानामा मसलाका रूपमा प्रयोग गरिन्छ । यसमा प्रोटिन, आइरन, कार्बोहाइड्रेट, क्याल्सियम, फस्फोरस, पोटासियम, सोडियम तथा हाइड्रोक्लोरिक एसिड भरपूर मात्रामा पाइन्छ । यस्तै, यसमा भिटामिन ए तथा सी, म्याग्निज र फाइबर पनि पाइन्छ । जतिसुकै दाँत दुखे पनि ल्वाङको तेल लगाउनाले दुखाइ तत्कालै निको हुन्छ । यसमा एन्टिब्याक्टेरियल विशेषता हुन्छ, जसका कारण यसको प्रयोग टुथपेष्ट, माउथवास तथा क्रिम बनाउन हुन्छ । जोर्नीमा हुने दुखाइ, सुन्निने जस्ता समस्याका लागि ल्वाङ फाइदाजनक हुन्छ ।

सुकुमेल

भोक नलाग्ने, बान्ता हुने, अपच हुने आदि समस्या छन् भने सुकुमेल खानाले कम हुन्छ । तिर्खा लागिरहन्छ अथवा घाँटी पोल्ने गरिरहन्छ भने सुकुमेल मिसाइएको पानी पिउँदा राम्रो हुन्छ । छातीमा कफ जमेको छ र सास लिन गाह्रो भइरहेको छ भने सुकुमेल खानाले कफ बाहिर निस्कन्छ र शरीरलाई राहत मिल्छ ।

प्रकाशित मिति: बुधबार, असार १०, २०७७ १५:५०