कोरोना महामारीका कारण दक्षिण एसियाका लाखौँ बालबालिका गरिबीमा : राष्ट्रसंघ

A+ A A-

कोरोना भाइरसको विश्वव्यापी महामारीसँगै करिब १० करोड दक्षिण एसियाली बालबालिका गरिबीको रेखामुनि पुगेको संयुक्त राष्ट्रसंघले जनाएको छ ।

पछिल्ला दिनहरूमा सङ्क्रमण नियन्त्रणका लागि लगाइएको लकडाउनलाई नराम्रोसँग प्रभावित अर्थतन्त्र सुधारका लागि भनी खुकुलो पारिएको छ तर सङ्क्रमण फैलिने क्रम रोकिएको छैन । महामारीका कारण अर्थतन्त्रमा परेको प्रभावसँगै यहाँका करोडौँ बालबालिकाको अवस्था गरिबीतर्फ धकेलिएको राष्ट्रसंघको मङ्गलबार सार्वजनिक कोरोना भाइरसको दीर्घकालीन प्रभाव नामक रिपोर्टमा उल्लेख गरिएको छ ।

‘एसियामा रहेका ती बालबालिकाहरू भाइरसमा मात्र कम संवेदनशील हुनसक्ने भएपनि महामारीका कारा अर्थतन्त्रमा परेको प्रभावका कारण व्यापक असर परिरहेको छ,’ संयुक्त राष्ट्रसंघ बाल अधिकार निकाय यूनिसेफले बताएको छ ।

एसियाली ८ देश भारत, पाकिस्तान, अफगानिस्तान, नेपाल, बङ्गलादेश, श्रीलङ्का, मालदिभ्स र भुटान समावेश रहेको दक्षिण एसियामा करिब ६० करोड बालबालिका रहेकोमा झण्डै २ करोड ४० लाख गरीबीका बीच बाँचिरहेका यूनिसेफले बताएको छ ।

‘अब तत्काल सुधारको प्रयास नथालिएमा कोभिड-१९ ले प्रभावित सम्पूर्ण जनसङ्ख्याको आशा र भविष्यलाई बर्वादीतर्फ धकेल्नेछ,’ यूनिसेफका दक्षिण एशिया क्षेत्रीय निर्देशक जाँ गोफले एक विज्ञप्ति जारी गरी उल्लेख गरेका छन् ।

‘महामारीका कारण खोप, पोषण, तथा अन्य अतिआवश्यकीय स्वास्थ्य सेवाहरूलाई विस्तार गर्ने कुरामा समस्या भइरहेको छ,’ यूनिसेफले भनेको छ, ‘बङ्गलादेशमा गरिएको सर्वेक्षणमा महामारीका कारण कतिपय परिवारले दैनिक तीन पटकको खानाको जोहो गर्न नसकिरहेको उल्लेख छ । त्यस्तै श्रीलङ्कामा करिब ३० प्रतिशत परिवारले आफ्नो खानपानमा कटौति गरेका छन् ।’

महामारीका कारण विद्यालय बन्द भएका छन् । खासगरी ग्रामिण परिवारमा इन्टरनेट र विद्युत् समेतकोे पहुँच नहँुदा लामो समयदेखि बालबालिकाहरू शिक्षाबाट बञ्चित भएका छन् ।

प्रकाशित मिति: बुधबार, असार १०, २०७७ ०७:४५