रामदेवले ल्याएको कोरोना औषधिमाथि प्रतिबन्ध

A+ A A-

भारत सरकारले बाबा रामदेवको पतञ्जली आयुर्वेद लिमिटेडले बजारमा ल्याएको कोरोना औषधि ‘कोरोनिल’को प्रचारप्रसारमाथि रोक लगाएको छ ।

भारतीय सञ्चारमाध्यमका अनुसार आज भारतको आयुष मन्त्रालयले रामदेवको सो कम्पनीले ल्याएको कोरोनिल औषधिको प्रचारप्रसारमा रोक लगाएको हो ।

मन्त्रालयले अहिलेसम्म कोरोनाको कुनै औषधि नबनेकाले पतञ्जली आयुर्वेद लिमिटेडले कोरोनाको औषधि भनेर ल्याएको ‘कोरोनिल’माथि तत्काल प्रतिबन्ध लगाइएको जनाएको छ ।

मन्त्रालयले विज्ञप्ति जारी गर्दै पतन्जलीको यो औषधिको विज्ञापन ड्रग एन्ड म्याजिक रिमेडिज (आपत्तिजनक विज्ञापन) कानुन १९५४ र कोरोना महामारीबारे केन्द्र सरकारको निर्देश अन्तर्गत आउने बताएको छ ।

मन्त्रालयले २१ अप्रिल २०२० मा सूचना जारी गर्दै आयुष मन्त्रालयको निगरानीमा कोभिड-१९ बारे कसरी अध्ययन गर्ने भन्ने दिशानिर्देश गरेको थियो ।

भारतीय सञ्चारमाध्यममा अनुसार आयुष मन्त्रालयले पतन्जलि आयुर्वेद लिमिटेडसँग औषधिको नाम र त्यसको प्रयोगबारे सोधपुछ गरेको थियो । साथै, औषधिको अध्ययन कहाँ र कुन अस्पतालमा गरिएको हो । र, मन्त्रालयले प्रोटोकल पालना गरे/नगरेको बारे समेत सोधेको थियो ।

मन्त्रालयका अनुसार नमुना साइज, इन्स्टिच्युसनल इथिक्स कमिटि क्लियरेन्स प्राप्त भए/नभएको, सीटीआरआई दर्ता र अध्ययनसँग जोडिएका तथ्यांकसमेत मागिएको छ । यी सबै विषयमा अध्ययन नभएसम्म यो औषधिको प्रचारप्रसारमा प्रतिबन्ध लगाएको मन्त्रालयले जनाएको छ ।

साथै, मन्त्रालयले उत्तराखण्डको लाइसेन्सिङ प्राधिकरणसँग औषधिको लाइसेन्सको कपीसमेत मागेको छ ।

मंगलबार पतन्जली योगपिठले हरिद्वारमा गरेको एक कार्यक्रममा रामदेवले कोरोनिल ट्याबलेट र श्वासरी बटी नामका २ औषधि सार्वजनिक गरेका थिए । यो औषधिले कोभिड-१९ का बिरामी निको हुने कम्पनीले दाबी गरेको थियो ।

क्लिनिकल ट्रायलका क्रममा दुबै औषधिले बिरामीलाई सतप्रतिशत सकारात्मक प्रभाव पारेको कम्पनीको दाबी छ ।

प्रकाशित मिति: मंगलबार, असार ९, २०७७ २०:०८