चिकित्सकको आन्दोलनले ५० हजारभन्दा बढी बिरामी प्रभावित

A+ A A-

समायोजनमा असहमति जनाउँदै सरकारी चिकित्सकले गरेको आकस्मिकबाहेकका सेवा बहिष्कार आन्दोलनका कारण शुक्रबार देशभर ५० हजारभन्दा बढी बिरामी मर्कामा परे ।

चिकित्सकको आन्दोलनका कारण बागलुङदेखि आएका एक बिरामीको शुक्रबार वीर अस्पतालमा निर्धारित पित्तथैलीको अप्रेसन भएन । गत बुधबारको सम्पर्क मितिमा अस्पताल आएर भर्ना भएपछि बिहीबार उनको अप्रेसन अगाडि गरिने परीक्षण भएको थियो । एनेस्थेसिया ९लठ्याउने० विभागले अप्रेसन गर्न मिल्ने पनि बताएको थियो ।

तर चिकित्सक आन्दोलनले अप्रेसन रोकिँदा आफू आर्थिक, शारीरिकसँगै मानसिक तनावमा समेत परेको उनले बताए । अर्की बिरामी सन्जु काफ्ले पैसा नभएकाले सरकारी अस्पतालमै अप्रेसन गराउने बाध्यतारहेको बताइन् । ‘यहाँ १५ देखि २० हजार पर्छ । बाहिर गराउँदा ९० हजारसम्म पर्छ । अढाई वर्षकी नानीलाई बोकेर
आएँ । दिनभरि भोकभोकै राखियो, अन्तमा आज अप्रेसन नै हुन्न भनेर फर्काइयो ।’

उनले आफूसँगै रहेका रुकुम, रोल्पालगायत ठाउँमा चिकित्सकको हडतालले बिरामीले दुःख भोग्न बाध्य रहेको बताइन् । आन्दोलनले गर्दा वीर अस्पताल, ट्रमालगायत मुलुकभरका सरकारी अस्पतालमा पूर्वनिर्धारित अप्रेसन तथा परीक्षणलगायत सेवा प्रभावित भए ।

‘१५–२० जनाको पूर्वनिर्धारित अप्रेसन रद्द भयो,’ वीर अस्पतालका एक पदाधिकारीले भने, ‘पूर्वनिर्धारित परीक्षणसमेत भएनन् ।’ उनका अनुसार पहिले नै समय दिइएका इन्डोस्कोपी, भिडिओ एक्सरेलगायत भएनन् भने शुक्रबार एमआरआई, एक्स–रे गरिए पनि चिकित्सकले त्यसको रिपोर्टिङ गरेनन् । ट्रमा सेन्टरका निर्देशक डा। प्रमोद यादवले ३–४ घण्टा लाग्ने मेजर सर्जरी नभएको बताए ।

‘यस्तै आन्दोलन जारी रहँदा आइतबार निर्धारित ६ घण्टासम्म लाग्ने घुँडाको अप्रेसन पूर्ण प्रभावित हुने देखिन्छ,’ उनले भने । ट्रमा सेन्टरमा घुँडाको प्रत्यारोपण गराउन एक लाख रुपैयाँजति लागे पनि अन्यत्र १० लाखभन्दा बढी लाग्ने औंल्याउँदै डा। यादवले भने, ‘गरिब जनता मारमा पर्ने भएकाले छिट्टै सबै पक्षबाट पहल हुनुपर्छ ।’ वीर अस्पतालका निर्देशक डा।केदार सेन्चुरीले शुक्रबार बहिरंग विभाग आंशिक रूपले प्रभावित भए पनि आन्दोलन जारी रहे आइतबारदेखि थप गाह्रो हुन सक्ने औंल्याए ।

स्वास्थ्य मन्त्रालयका एक पदाधिकारीका अनुसार मुलुकभरका सरकारी अस्पतालको बहिरंग विभाग ९ओपीडी० मा दैनिक करिब २५ हजार बिरामी पुग्ने गरेका छन् । शुक्रबारको हडतालले मुलुकभरका सरकारी स्वास्थ्य सेवा कतै आंशिक तथा कतै पूर्ण रूपमा प्रभावित भएका छन् । राजधानीको वीर अस्पतालमा मात्रै दैनिक १७ सयदेखि २ हजारसम्म बिरामी पुग्छन् । राजधानी बाहिरका बिरामी सरकारी अस्पतालमै भर पर्ने अवस्था छ ।

तराईका अञ्चल अस्पतालहरूमा दैनिक ५ सयदेखि १ हजार र जिल्ला अस्पतालहरूमा दैनिक सरदर ५० देखि एक सयसम्म बिरामी ओपीडी सेवा लिन पुग्छन् । स्वास्थ्य मन्त्रालयका अनुसार मुलुकमा ८४ जिल्ला अस्पताल र १० अञ्चल अस्पताल छन् भने काठमाडौंमा ५ वटा केन्द्रीय अस्पताल, २ क्षेत्रीय र २ उपक्षेत्रीय अस्पताल छन् ।

प्रकाशित मिति: शनिबार, चैत २३, २०७५ १७:३५