सांसद दीपक मनाङेले दिए राजीनामा

A+ A A-

गण्डकी प्रदेश सांसद राजीव गुरुङ (दीपक मनाङे) ले अर्थ तथा विकास समितिको सदस्यबाट राजीनामा दिएका छन् ।

सांसद गुरुङले कामै नभएको बेकामको समितिमा बसिरहनु औचित्य नदेखेकाले समितिका सभापति दीपक कोइरालालाई राजीनामा बुझाएको बताए । उनले राजीनामापत्र समितिका सभापति दीपक कोइरालालाई बुझाएका हुन् ।

ठेक्कापट्टामा मन्त्रीका नजिकका मान्छे इन्जिनियर राखेको र क्रसर उद्योग, विकास निर्माणमा भएका अनियमितता सम्बन्धमा आफूले पटक–पटक कुरा उठाए पनि कुनै सुनुवाइ नभएकाले राजीनामा दिएको उनले बताए ।

‘ठेक्कापट्टामा मन्त्रीका नजिकका मान्छे इन्जिनियर राखिएका छन् । अनुगमन गर्ने भनेको नाम मात्रको अनुगमन हो,’ उनले भने, ‘समितिमा हुँदा म पनि अनुगमनमा गएँ । तर, भत्ता मात्र लिने काम जस्तो देखियो । अनियमतता देखिए पनि कारबाही गर्ने अधिकारै छैन । यस्तो बेकामको समितिमा किन बस्नु ?’

गण्डकी प्रदेशका कास्की र तनहुँको सिमाना कोत्रेमा राजमार्ग नजिकै खोलिएको क्रसर उद्योगका बारेमा समितिको बैठकमा बारम्बार कुरा उठाएको उनले बताए । गिटी बालुवाको टेन्डरमा ठूलो भ्रष्टाचार रहेको उनले बताए । कर्मचारी, नेतादेखि सबै मिलेर दोहन गरिरहेको उनको आरोप छ ।

‘मुख्यमन्त्रीदेखि मन्त्री सबै ओहोरदोहोर गर्ने कोत्रेमै क्रसरले नदी दोहन गरेका छन् । त्यो कसैले देख्दैनन्,’ उनले भने, ‘त्यहाँ भइरहेको चरम दोहनको कसैले वास्तै गर्दैनन् ।’

नामको मात्र समिति भएको र कुनै पनि अधिकार प्राप्त नभएकाले औचित्यविहीन समितिमा बस्न आफैँलाई लाज लागेर राजीनामा दिएको उनले सुनाए ।

प्रकाशित मिति: सोमबार, असार ८, २०७७ १५:३६