सम्पत्ति कमाउन राजनीतिमा आएको होइन : मन्त्री ढकाल

सम्पत्ति कमाउन राजनीतिमा आएको होइन : मन्त्री ढकाल

A+ A A-

स्वास्थ्य तथा जनसंख्यामन्त्री भानुभक्त ढकालले दैनिक १० हजार पीसीआर परीक्षण गर्ने गरी प्रयोगशालाको क्षमता विकास गरिने बताएका छन् ।

उनले प्रयोगशाला पूर्णरूपमा सञ्चालन र जनशक्ति परिचालनको तयारी भइरहेकाले असार १५ भित्र प्रतिदिन कम्तीमा १० हजारको पीसीआर परीक्षण गरिने बताए ।

स्वास्थ्य तथा जनसङ्ख्या मन्त्रालयद्वारा शनिबार आयोजित पत्रकार भेटघाटमा मन्त्री ढकालले सङ्कलन गरिएको स्वाब निजी क्षेत्रको प्रयोगशालामा दैनिक तीन हजार पठाएर पीसीआर परीक्षण गराइने बताए । उनले जनशक्ति थपेर ल्याब २४ घण्टा नै सञ्चालन गरिने र प्रत्येक प्रदेशमा दैनिक १ हजार परीक्षण गर्ने व्यवस्था मिलाइने बताए ।

मन्त्री ढकालले सङ्क्रमितको सङ्ख्या अझै बढ्न सक्ने सम्भावना रहेकाले तयारी र नियन्त्रण गर्न विज्ञसँगको परामर्शअनुसार नै मन्त्रालय अघि बढेको जानकारी दिए ।

उनले कोभिड-१९ सङ्क्रमण रोकथाम र नियन्त्रण गर्न स्वास्थ्य मन्त्रालय मातहत रहेका सबै निकायको एकीकृत धारणा बनाएर अगाडि बढिरहेको चर्चा गरे । सङ्क्रमण तीव्र हुँदै गएको अवस्थामा विज्ञको परामर्शमा होम आइसोलेसनको अवधारणा अनुसार नियन्त्रण कार्य अगाडि बढाइनेसमेत जानकारी उनले दिए ।

मन्त्री ढकालले सङ्क्रमण बढ्दै गएमा त्यस अनुसार नै मन्त्रालयले नियन्त्रणको रणनीति परिवर्तन गर्दै जाने बताए ।

कोरोना महामारी जित्न युद्धकै शैलीमा मन्त्रालयले समन्वयात्मक रूपमा काम गरिरहेको मन्त्री ढकालले बताए ।

उनले कोभिड-१९ नियन्त्रणमा सरकारी निकायबीच कुनै पनि मतभेद नरहेको स्पष्ट पारे । उनले स्वास्थ्य सामग्री खरिद प्रक्रिया नियम र कानुन अनुसार भएको स्पष्ट पार्दै अनियमित कामसँग जोडेर टिप्पणी गर्नेले पछि पछुताउनुपर्ने बताए ।

उनले अनियमित कार्यमा जोडेर टिप्पणी गर्ने र समाचार लेख्नेले यथार्थ बुझेपछि पश्चात्ताप गर्ने दिन आउँने बताए । मन्त्री ढकालले आफू सम्पत्ति कमाउन राजनीतिमा नआएको स्पष्ट पारे ।

प्रकाशित मिति: आइतबार, असार ७, २०७७ ०६:४८