भेरीको पानी वीरेन्द्रनगरमा, लागत ३ अर्ब

A+ A A-

कर्णाली प्रदेश राजधानीमा खानेपानीको अभाव चुलिँदै गएको छ । दैनिक उपभोक्ताको वृद्धि र उपत्यकाभित्रको जमिन सिँचाइको आवश्यकतालाई मध्यनजर गर्दै ३ अर्ब लागतमा भेरी नदीको पानी नै सर्खेत उपत्यकामा ल्याउने तयारी भएको छ ।

दीर्घकालीन समाधानका लागि भेरी नदीको पानी लिफ्ट गरी सुर्खेत उपत्यकामा पुर्याउने लिफ्ट परियोजना यसै वर्षदेखि सुरु हुने भएको छ । केही वर्षदेखि चर्चामा रहँदै आएको आयोजनाको डीपीआर सम्पन्न भई निर्माण कार्यको सुरुवात पनि चालू आर्थिक वर्षमै सुरु गर्ने तयारी भइरहेको सुर्खेत उपत्यका खानेपानी उपभोक्ता संस्थाले जनाएको छ ।

उपत्यका आसपासका मुहान सुक्दै जाँदा खानेपानीको आपूर्ति गर्न नसकेपछि दीर्घकालीन समस्या समाधानका लागि महँगो भए पनि भरी नदीको पानीलाई नै विकल्पका रूपमा अध्ययन गरिएको थियो । उपभोक्ता संस्थाका अध्यक्ष कुलमणि देवकोटाले चालू अवधिभित्रै भेरीको पानी उपत्यका ल्याउन प्रक्रिया थालनी गरिने जानकारी दिएका हुन् ।

‘स–साना मुहानबाट पानी ल्याइए पनि खानेपानीको अभाव टार्न सकिएन,’ उनले भने, ‘बढ्दै गइरहेको उपत्यकाभित्रको खानेपानी समस्या दीर्घकालीन समाधानका लागि भेरीको पानी नै उत्तम विकल्प हो । आर्थिक लगानीका हिसाबले महँगो भए पनि यो परियोजनाले मात्रै हाम्रो आवश्यकताअनुसारको पानी उपलब्ध गराउन सक्छ ।

उनले भेरी नदीबाट पानी ल्याउन नेपाल सरकारले ‘निश्चित कार्य गर्नका लागि तोकिएका आयोजना’ अन्तर्गत आयोजनाको विस्तृत सम्भाव्यता अध्ययन गरी विस्तृत सर्वेक्षणको काम पनि सम्पन्न भएको जानकारी दिए । डीपीआरअनुसार यो परियोजनाको लागत २ अर्ब ९१ करोड अनुमान गरिएको छ ।

चालू आवभित्र नै संघीय, खानेपानी तथा ढल व्यवस्थापन आयोजना कार्यालय सुर्खेतबाट ठेक्कापट्टाको कार्य सम्पन्न गर्ने तयारी भइरहेको संस्थाले जानकारी दिएको छ ।

भेरीको पानी पम्पिङ गरेर उपत्यकामा ल्याइएको खण्डमा सुर्खेत उपत्यकाभित्र खानेपानी समस्या मात्रै होइन, आवश्यकताअनुसार सिँचाइको सुविधा पनि उपलब्ध गराउने संस्थाले लक्ष्य राखेको छ । यस्तै, भेरी पम्पिङ आयोजना सम्पन्न नहुनेबलासम्मको खानेपानी अभाव टार्न संस्थाले मझौला स्रोतहरू थप गर्ने भएको छ ।

विगतमा झुप्रा खोला, खरी, बोरीलगायतका खोलाबाट पानी ल्याएको संस्थाले पहिलोपटक स्थानीय मुहानको पानीलाई पनि उपयोग गर्ने रणनीति बनाएको हो । संस्थाले पातलगंगाको मूल, बाँध, स्किम नम्बर ५ बामेखोला रोकाय टोल नजिकै रहेको पानीका स्रोत थप्ने योजना बनाएको छ ।

सुर्खेतको प्रमुख पर्यटकीय स्थलका रूपमा रहेको बुलबुले तालको पानी पनि उपभोक्तासमक्ष पु¥याइने भएको छ । हाल बुलबुले तालको पानी उपयोगमा छैन । उक्त मुहानको पानीको वर्तमान अवस्थाबारे अध्ययन गरिने भएको छ ।

प्रकाशित मिति: शनिबार, चैत २३, २०७५ ०२:१४