अझै झस्किन्छन् रुकुम घटनाका घाइते

A+ A A-

भेरी नगरपालिका-४ का सुदीप खड्काको शारीरिक चोट विस्तारै ठीक हुँदैछ । टाउको, काँध, हात, पिँडुला, ढाड सबैतिर चोट छ तर त्यो चोट विस्तारै सञ्चो हुँदै गइरहेको छ । बेलाबेला घटनाको पीडा र त्रासले सताइरहेको छ । कहिलेकाहीँ घटना सम्झेर उनी झस्किन्छन् ।

भेरी नगरपालिका-४ का नवराज विकसहित ६ जनाको ज्यान जाने गरी गत १० जेठमा पश्चिम रुकुमको चौरजहारी-८ सोतीमा भएको घटनामा सुदीप घाइते भएका थिए । उनीसहित १२ जनाले बल्लतल्ल ज्यान जोगाउन सफल भए । तर, मरणासन्न हुने गरी पिटिए ।

सुदीपलाई प्रहरीले उद्धार गरी मिसन अस्पताल लगेको थियो । त्यहाँ उनलाई सकसपूर्ण २ रात बिताउनुपर्‍यो । घाउ पूरा निको नभए पनि उहाँ त्रासकै कारण घर फर्किनुपर्‍यो । प्रहरी, सञ्चारकर्मी र अन्य आफन्तले के भएको हो ? कसरी घटना भयो ? सोधेर हैरान पारेपछि आफू घर आएको सुदीपको भनाइ छ । बेलाबेला उनलाई त्यही नवराज लगायतका साथीहरूले बचाउबचाउ भनेको आवाज कानमा गुञ्जिरहन्छ ।

‘सुतेका बेलासमेत मलाई नमार्नुस् भन्छ’, मदनकी आमा लक्ष्मी शाहीले भनिन् । सुविधा सम्पन्न अस्पतालमा लगेर शारीरिक र मानसिक समस्याको उपचार गर्ने सोच भए पनि आर्थिक अभावले कतै लैजान नसकेको उनले बताइन् । घरी पुलिसले बोलाउँछ, घरी युट्युबर लगायत आउँछन्, बोलाउँछन् । ‘थरिथरिका मान्छेलाई कति बयान दिनु ? लक्ष्मीले भनिन्, ‘अहिले पनि छोरो डराइरहेको छ ।’

त्यही बयानकै कारण उनीहरूलाई फेरि आफूमाथि हमला होला भन्ने डर पनि छ । घाइते सरोज भडेलले भने, ‘कतिबेला कहाँ हामीलाई फेरि हमला गर्छन् । घर बाहिर निस्कँदा पनि डर लाग्छ । हाम्रो सुरक्षा
कसले गर्छ ?’

भेरी नगरपालिकाका प्रमुख चन्द्रप्रकाश घर्तीले घाइतेको जिल्लामै सामान्य उपचार गराउन सघाएका छन् । उनले हाल घाइतेको जिल्लाबाहिर लगेर उपचार गर्ने पहल भइरहेको जानकारी दिए ।

जिल्ला अस्पतालका डा. अमिन शाहले घाइतेहरूको टाउकोको स्क्यान गर्ने र मनोपरामर्शको जरुरी रहेको र घाइतेहरूमा घटनापछि मानसिक समस्या देखिएको बताए । यस्तो बेला झोक्रिने, एक्लै बर्बराउने, डराउने लगायतका समस्या देखिन्छन् ।

प्रकाशित मिति: शनिबार, असार ६, २०७७ ०७:०७