व्यवसायी र लेखिकाको ३८ खर्ब रुपैयाँको सम्बन्ध विच्छेद

A+ A A-

नेपालमा सम्बन्ध विच्छेदमा सामान्यतः श्रीमानसँगको आधा सम्पत्ति श्रीमतिलाई दिनुपर्छ । नेपाली धेरै धनी नभएकोले सम्बन्ध विच्छेदमा कति रकमको भागबण्डा भयो भन्ने गरी त्यति चर्चा र चासो नहुन सक्छ ।

तर, संसारका धनी व्यक्तिहरुको सम्बन्ध विच्छेदको समाचार विश्वव्यापी बन्ने गरेको पनि छ । धेरै धन सम्पत्तिको कारण यस्तो सम्बन्ध विच्छेद चर्चाको साथै समाचारको विषय पनि बन्ने गरेका छन् ।

पछिल्लो समय एउटा सम्बन्ध विच्छेदको विषय अन्तराष्ट्रिय समाचारको विषय बनेको छ । अनलाइन सपिङ साइट अमेजनका मालिक जेफ बेजोस र सफल लेखिका मकेन्जीबीचको सम्बन्ध विच्छेदले अहिले अन्तराष्ट्रिय चर्चा पाएको छ ।

अन्तराष्ट्रिय समाचार संस्था बीबीसीका अनुसार संसारका सबैभन्दा धनी व्यक्ति जेफ बेजोस र उनकी पत्नी मक्केन्जीको सम्बन्धविच्छेदलाई अहिलेसम्मकै सबैभन्दा महँगो मानिएको छ ।

सम्बन्ध विच्छेद गर्दा उनीहरूबीच ३५ बिलियन अमेरिकी डलर अर्थात झन्डै ३८ खर्ब नेपाली रुपैयाँ बराबरको लेनदेनको सहमति भएको अन्तराष्ट्रिय संचार माध्यमले उल्लेख गरेका छन् ।

पारपाचुकेपछि मक्केन्जीसँग जेफले स्थापना गरेको अनलाइन किनमेल कम्पनी एमेजनको चार प्रतिशत शेयर हुने बीबीसीले उल्लेख गरेको छ । तर उनको वाशिङ्टन पोस्ट दैनिक र अन्तरिक्ष यात्रा कम्पनी ब्लू ओरिजिनसँग कुनै सम्बन्ध रहनेछैन । अर्थात यी दुबै कम्पनी जेफसँग नै रहने छन् ।

उनीहरूबीच २५ वर्ष वैवाहिक सम्बन्ध थियो । यो अहिलेसम्म पारपाचुकेका लागि गरिएको सबैभन्दा महँगो सहमति भएको बीबीसीको भनाइ छ ।

यसअघि सबैभन्दा महँगो पारपाचुके कलाव्यापारी एलेक विन्डेन्स्टेन र उनकी पत्नी जोस्लिनबीच भएको ३.८ बिलियन अमेरिकी डलरको (लगभग चार खर्ब २० अर्ब नेपाली रुपैयाँ) थियो ।

मक्केन्जीले सहमतिबारे आफ्नो पहिलो र अहिलेसम्मको एकमात्र ट्वीटमा जानकारी दिएकी छन् । उनले आफू ‘एक अर्काको सहयोगमा जेफसँगको विवाहलाई भङ्ग गर्ने प्रक्रिया सकिएकोमा कृतज्ञ भएको’ बताएकी छन् ।

जेफ बेजोससँग एमेजनको १६.३ प्रतिशत सेयर थियो, जसको ७५ प्रतिशत अझैपनि उनीसँगै रहनेछ र मक्केन्जीले आफ्नो शेयरको मताधिकार पूर्वपतिलाई दिएकी छन् ।

सन १९९४ मा जेफले एमेजन स्थापना गर्नुअगाडि नै उनीहरूले विवाह गरेका हुन् र माक्केन्जी एमेजनको पहिलो कर्मचारीमध्येकी थिइन् ।

अमेरिकी स्टक बजारका पछिल्ला तथ्याङ्क अनुसार एमेजनको कुल मूल्य ७९७ अर्ब अमेरिकी डलर पुगेको छ । सन २०१८ मा एमेजनले २.३ खर्ब डलरको समान बेचेको थियो ।

सफल लेखिका ४८ वर्षीय मक्केन्जी सन २००५ मा द‘ टेस्टिङ अफ लुथर अल्ब्राइट’ तथा सन २०१३ मा ‘ट्रयाप्स’ नामक उपन्यास लेखेकी छन् । पुलिट्जर पुरस्कार प्राप्त गरेकी लेखिका टोनी मोरिसनबाट सिर्जनात्मक लेखनको पढाइ पूरा गरेकी मक्केन्जीलाई मोरिसनले आफ्नो उत्कृष्टमध्येकी विद्यार्थी रहेको बताएकी थिइन् ।

अमेरिकी सञ्चारमाध्यमहरूले जेफको फक्स टीभीकी एक सञ्चालिका लरेन सान्चेजसँग प्रेमपूर्ण सम्बन्ध रहेको समाचार प्रकाशित गरेका छन् । सान्चेससँगको व्यक्तिगत सन्देशहरू प्रकाशित गर्दै एक पत्रिकाले जेफको विवाहेतर सम्बन्धको समाचार लेखेपछि उनीहरूले गत जनवरी महिनामा ट्वीटर मार्फत एउटा संयुक्त वक्तव्य प्रकाशित गर्दै आफूहरूले सम्बन्ध विच्छेद गर्न लागेको जानकारी दिएका थिए ।

प्रकाशित मिति: शनिबार, चैत २३, २०७५ ०१:०९