पर्वत अस्पतालका स्वास्थ्यकर्मीसहित ८१ जनाको स्वाब संकलन, अस्पताल क्षेत्र सिल

पर्वत अस्पतालका स्वास्थ्यकर्मीसहित ८१ जनाको स्वाब संकलन, अस्पताल क्षेत्र सिल

A+ A A-

पर्वतमा कोरोना संक्रमितको उपचारमा संलग्न चिकित्सकसहित स्वास्थ्यकर्मीमा संक्रमण देखिएपछि कन्ट्याक्ट ट्रेसिङ गरी ८१ जनाको स्वाब संकलन गरिएको छ । शुक्रबार ५ जना स्वास्थ्यकर्मीमा कोरोना संक्रमण पुष्टि भएपछि उनीहरूका आफन्तसहित सम्पर्कमा आएकाहरूको ट्रेसिङ गरी स्वाब संकलन गरिएको हो ।

जिल्ला स्वास्थ्य कार्यालय पर्वतका तथ्याङ्क अधिकृत एवं कोरोना रोकथाम जिल्लास्तरीय कमाण्ड पोस्टका सूचना अधिकारी प्रवीण भण्डारीका अनुसार अस्पतालमा कार्यरत सम्पूर्ण कर्मचारी, क्यान्टिनका व्यवस्थापक र कोरोना पोजिटिभ देखिएका स्वास्थ्यकर्मीका घरपरिवारसहित ८१ जनाको स्वाब सकंलन गरिएको हो ।

स्वाब संकलन गरी पोखरास्थित प्रादेशिक जनस्वास्थ्य प्रयोगशालामा पठाइएको उनले बताए । कोरोना अस्थायी अस्पतालमा कार्यरत स्वास्थ्यकर्मीमा संक्रमण पुष्टि भएपछि अस्पतालमा इमर्जेन्सीबाहेक सबै सेवा बन्द गरिएको छ ।

अस्पतालवरपर आवागमनसमेत बन्द

संक्रमितको उपचारमा संलग्न स्वास्थ्यकर्मीमा संक्रमण पुष्टि भएपछि समुदायमा संक्रमण फैलिन नदिन पर्वतको सदरमुकाम कुस्मामा सुरक्षा सतर्कता बढाइएको छ । जिल्ला प्रशासन कार्यालयमा बसेको जिल्लास्तरीय कोरोना रोकथाम तथा व्यवस्थापन समितिको बैठकले उच्च सतर्कताका साथ कडाइ गर्ने निर्णय गरेको हो ।

बैठकले अस्पताल क्षेत्रमा आवागमन बन्द गराउने निर्णय गरेको छ । अस्पताल क्षेत्रमा वरपर सुरक्षाकर्मी परिचालन गरी आवगमन बन्द गराइसकिएको छ । कुष्मा बजारमा अनावश्यक हिँडडुल गर्न नदिने र अत्यावश्यकबाहेक पसल तथा सेवा बन्द गर्नका लागि आग्रह गरिने भएको छ ।

प्रमुख जिल्ला अधिकारी शम्भुप्रसाद रेग्मीले बजार क्षेत्रमा उच्च सतर्कता अपनाउने निर्णय भएको बताए । ‘स्वास्थ्यकर्मी र उनीहरूका परिवारको स्वाब परिक्षणको रिपाेर्ट नआएसम्म थप उच्च सतर्कता अपनाउनेछौँ,’ उनले भने ।

प्रकाशित मिति: शुक्रबार, असार ५, २०७७ १८:१३