हेटौँडामा बुहारीको हत्या आरोपमा ससुरा र नन्द पक्राउ, प्रहरी भन्छ - 'घटना रहस्यमय छ'

A+ A A-

हेटौँडाकी एक विवाहित महिलाको मृत्यु प्रकरण थप रहस्यमय बन्दै गएको छ । हेटौंडा–४ सुर्यचोकस्थित घरको बन्द कोठाभित्र २२ वर्षीया सुस्मिता केसी (थापा) वीभत्स अवस्थामा मृत फेला परेकी थिइन् ।

सुस्मिताको मृत्यु प्रकरणमा संलग्नताको आशंका गर्दै प्रहरीले बिहीबार उनको ससुरा र नन्दलाई पक्राउ गरेको छ । बुहारी हत्या आरोपमा पक्राउ परेका उनीहरूलाई प्रहरीले ज्यानसम्बन्धी कसुर मुद्दामा अनुसन्धान गरिरहेको छ । घरको भान्सा कोठाभित्र गत २ असार बिहान सुस्मिता टाउकोमा चोट लागेको अवस्थामा मृत भेटिएकी थिइन् ।

‘घटनामा संलग्नताको आशंकामा मृतकको ससुरा ५८ वर्षीय प्रकाश थापा र नन्द २३ वर्षीया सीता थापालाई पक्राउ गरेका छौँ’ मकवानपुरका प्रहरी नायव उपरीक्षक इन्द्रबहादुर रानाले भने, 'घटनाको विषयमा थप अनुसन्धान भइरहेको छ । मृतक महिलाको टाउकोमा चोट लागेको देखिएको छ । घटनास्थलमा रगत पनि भेटिएको छ ।'

रानाका अनुसार प्रहरीले घटनाको विषयमा केही ‘क्लू’ भेटाएको छ । ‘हामीलाई घटनाको विषयमा ‘क्लू’ भेटिएको छ । तर, अनुसन्धान प्रभावित हुने भएकोले अहिले नै बताउन मिल्दैन्’ उनले भने ।

मृतक सुस्मिताकी पतिको करिब ९ महिनाअघि सवारी दुर्घटनामा परेर ज्यान गएको थियो । ‘कपिलवस्तु माइती रहेको थापाको आत्महत्या वा हत्या हो भन्न सकिने अवस्था छैन् । पोष्टमार्टम रिपोर्ट आएको छ, तर अनुसन्धान प्रभावित हुने भएकोले रिपोर्टको बारेमा बोल्न मिल्दैन्’ प्रहरी नायव उपरीक्षक राना भन्छन् ।

सुसुरा, सासू र एक नन्दसँगै मृतक थापा घरमा बस्दै आएकी थिइन् । ‘प्रारम्भिक अनुसन्धान अनुसार अघिल्लो दिन घरमा कुनै पनि किसिमको झै-झगडा भएको देखिएन' उनले भने 'घटना रहस्यमय छ । घटनास्थलमा पनि कुनै पनि हतियार एवं अन्य कुनै वस्तु भेटिएन ।’ रानाले यस विषयमा माइती पक्षले अनुसन्धानमा आवश्यक सहयोग गर्ने प्रतिबद्धता जनाएको बताए ।

नेपाली कांग्रेसकी सांसद डा. डिला संग्रौलाले हेटौँडा उपमहानगरपालिका-४ गर्दोईकी थापाको यहि असार २ गते घरमा नै क्षतविक्षत अवस्थामा शव भेटिएको खबरले स्तप्ध भएको भन्दै सत्यतथ्य छानबिन गरेर यथार्थ बाहिर ल्याउन सरकारसमक्ष माग गरेकी छन् ।

प्रकाशित मिति: शुक्रबार, असार ५, २०७७ १५:१०