समाचार प्रभावः एम्बुलेन्स बनाइएका शववाहन पुरानै लयमा

A+ A A-

कोरोना महामारीको बेलामा शववाहनलाई एम्बुलेन्स बनाएका चालकहरूले अहिले पुनः शववाहन बनाएका छन् ।

शववाहन हुँदा कोरोना संक्रमितलाई बोक्नुपर्ने र जोखिम हुन सक्ने भन्दै एम्बुलेन्स बनाएका २ चालकले अहिले पुन: शववाहन नै बनाएर चलाउन थालेका छन् ।

हरीकला घिमिरे स्मृति प्रतिष्ठानको शववाहनलाई चालक अर्जुन लामिछानेले एम्बुलेन्स बनाएका थिए । कोरोनाबाट मृत्यु भएका गुल्मीका शिक्षकको शव व्यवस्थापनमा उनलाई प्रशासन कार्यालयबाट फोन गर्दा उनले शववाहनलाई एम्बुलेन्सका रूपमा प्रयोग गरेको खुलेको थियो ।

शववाहनलाई एम्बुलेन्स बनाएका लामिछानेले अहिले लु२च ३४०० नम्बरको टाटा सुमोलाई शववाहन बनाएका छन् । शिलापत्रमा सेवाका नाममा व्यापारः कहिले एम्बुलेन्स, कहिले शववाहन शीर्षकमा समाचार प्रकाशन भएपछि उनले एम्बुलेन्स बनाएको गाडी पुनः शववाहन बनाएका हुन् ।

गत १० जेठमा गुल्मी मदाने गाउँपालिका–६, पुर्कोट दहका शिक्षकको कोरोनाबाट तिलोत्तमाको क्रिमसन अस्पतालमा मृत्यु भएपछि जिल्ला प्रशासन कार्यालय रूपन्देहीका प्रशासकीय अधिकृत जनक थापाले भन्सार छुट प्राप्त शववाहनहरूको लिस्ट खोजेर अर्जुनलाई फोन गर्दा बहाना बनाएर बुटवलमा छैन भन्दै शव बोक्न इन्कार गरेका थिए । पछि उनी बुटवलमा भए पनि शववाहनलाई एम्बुलेन्स बनाएका कारण शव ल्याउनका लागि नआएको खुलेको थियो ।

२ माघ, २०७४ मा एकै पटक एम्बुलेन्स र शववाहन सञ्चालनका लागि जिल्ला जनस्वास्थ्य कार्यालय रूपन्देहीको प्रस्तावमा तत्कालीन प्रमुख जिल्ला अधिकारी हरिप्रसाद मैनाली र तत्कालीन जनस्वास्थ्य प्रमुख केहरसिंह गोदारलगायतको समितिले हरीकला घिमिरे प्रतिष्ठानलाई स्वीकृति दिएको अभिलेख स्वास्थ्य कार्यालयमा छ ।

समितिले गरेको सिफारिस र मन्त्रालयले भन्सार विभागलाई गरेको पत्राचारका आधारमा दुईवटा सवारीसाधन प्रतिष्ठानले खरिद गरेको थियो । भन्सार छुटमा शववाहन र एम्बुलेन्स ल्याएको प्रतिष्ठानले १ वर्षसम्म सिफारिस भएअनुसार नै सेवामा लागेपछि चैतकाे पहिलो साता शववाहनलाई एम्बुलेन्स बनाएका थिए ।

त्यस्तै, २०६९ सालमा स्थापना भएको बुद्ध जागरण सामाजिक सेवा अभियानले भन्सार छुटमा ल्याएको लु.२च ७४०३ नम्बरको महिन्द्रा बाेलेरोलाई एम्बुलेन्स बनाएको समाचार बाहिर आएपछि अहिले त्यसलाई पुन: शववाहन नै बनाइएको छ ।

यो पनि पढ्नुहोस

सेवाका नाममा व्यापार : एउटै सवारी कहिले शव वाहन, कहिले एम्बुलेन्स

केही महिनाअघिसम्म ‘वैकुण्ठ यात्रा’ लेखेर शव बोक्दै आएको उक्त गाडी लकडाउन सुरू भएसँगै एम्बुलेन्स बनाएर चलाइएको थियो । उक्त सवारी एम्बुलेन्स बनाएर यदु भण्डरीले नै चलाएका थिए । तर, समाचार बाहिर आएपछि यदुले शववाहन नै बनाएका छन् ।

शववाहनलाई एम्बुलेन्स बनाएर चलाएका यदु भण्डारीले कोरोनाको महामारीको सुरूवाती समयमै शववाहनलाई एम्बुलेन्स बनाएको स्वीकार गरे । ‘शववाहनले शव मात्र बाेक्दा खर्च धान्न धौ–धौ भयो । ७–८ महिनामा चालकलाई तलब पनि दिन नसक्ने अवस्था भएपछि एम्बुलेन्स बनाएको हुँ’, उनले भने, ‘तर, अहिले शववाहन बनाइसकेँ ।’

उनले एम्बुलेन्सले बिरामी मात्र बोक्ने र शववाहनले शव मात्र बोक्नुपर्ने आवाज संघमा पनि बारम्बार उठाइएकाे उनले बताए । ‘मैले भनेको कुरा कतै सुनिएन । कोरोनाका कारण चैतमा एम्बुलेन्स कतै होल्डमा थिए । संघका अध्यक्ष सुरज तिवारीलाई मौखिक जानकारी गराएर कोरोना अवधिभरसम्म एम्बुलेन्स बनाउने भनेरै एम्बुलेन्स बनाएको यथार्थ हो’, उनले भने ।

बुद्ध जागरणले शववाहनसँगै लु१च ६०९८ नम्बरको महिन्द्रा बाेलेरो जीप खरिद गरी एम्बुलेन्स सञ्चालन गर्दै आएको छ ।

अभिलेख भेटिँदैन स्वास्थ्य कार्यालयमा

हाल जिल्लामा कति एम्बुलेन्स र शववाहन छन् भन्ने यकिन तथ्याङ्क स्वास्थ्य कार्यालयसँग छैन । गत असोजसम्मको अभिलेखअनुसार स्वास्थ्य कार्यालयमा जम्मा ६८ वटा एम्बुलेन्स र शववाहन छन् । त्यसपछि कति एम्बुलेन्स स्वीकृत भए । भन्सार छुट भएर आए, स्वास्थ्य कार्यालयमा तथ्याङ्क भेटिँदैन ।

पुरानो अभिलेखअनुसार हरिकला घिमिरे स्मृति प्रतिष्ठान, बुद्ध जागरण सामाजिक सेवा अभियान, हेल्थ क्लब अफ लुम्बिनी र यातायात मजदुर तथा व्यवसायी भलाइ कोषले शववाहनका लागि स्वीकृति लिएका छन् । यसमध्ये यातायात मजदुर तथा व्यवसायी भलाइ कोषको खरिद प्रक्रियामै रहेको बताइएको छ ।

सबैभन्दा पहिला २०६७ सालमा निर्माण व्यवसायी संघ लुम्बिनीले रूपन्देहीमा शववाहन सञ्चालन गरेको थियो । उक्त साधन अहिले पनि शववाहनकै रूपमा सञ्चालन भइरहेको छ ।

प्रकाशित मिति: शुक्रबार, असार ५, २०७७ ११:४५