सरकारकै नीतिका कारण समुदायस्तरमा कोरोना फैलिने खतरा

A+ A A-

सरकारको नीतिकै कारण कोरोना समुदायस्तरमा फैलिने जोखिम बढेको छ । क्वारेन्टाइनमा बसेकाहरूलाई रिपोर्ट नआउँदै घर पठाउने र कतिपय ठाउँमा संक्रमित बेड अभावमा आइसोलेसनमै रहनुपर्ने भएकाले पनि समुदायमा झन् कोरोना फैलिने जोखिम बढेको हो ।

सरकारले १४ दिन क्वारेन्टाइन बसेपछि कोरोनाका कुनै पनि लक्षण देखा नपरे परीक्षण नै नगरी घर पठाउने निर्णय गरेको छ । तर, कतिपय जिल्लामा भने घर पठाएपछि मात्र रिपोर्ट पोजिटिभ आएपछि पुनः क्वारेन्टाइनबाट आइसोलेसनमा पठाउने गरेका छन् ।

रिपोर्ट नआउँदै घर पठाउने र रिपोर्ट आएपछि पुनः आइसोलेनमा राख्ने घटना प्रदेश ५ का दाङ, गुल्मीमा पनि भेटिएका छन् । बेड अभाव हुँदा संक्रमित आइसोलेसनमा जानुको सट्टा क्वारेन्टाइनमै बसेका घटनाहरू पनि प्रदेशमा धेरै छन् ।

३१ जेठमा घोराही उपमहानगरपालिका- १७ स्थित चौघेरा क्वारेन्टाइनमा रहेका १६ जनालाई कोरोना रिपोर्ट नआउँदै घर पठाइयो । तर, घर पठाइएका १६ मध्ये १३ जनाको रिपोर्ट पोजिटिभ आयो । राप्ती स्वास्थ्य विज्ञान प्रतिष्ठानबाट ३२ जेठकाे साँझ स्वाबको पीसीआर रिपोर्ट आउँदा घर पुगिसकेका १७ जनामा कोरोना पोजिटिभ देखिएको थियो ।

दाङको घोराही उपमहानगरपालिका-१७ कै प्रावि क्वाडीमा बसेका ४ जनामा कोरोना पोजिटिभ भेटिएको थियो । क्वाडीबाट घर पठाइएका ४ जनामा कोरोना संक्रमण पुष्टि भएको थियो । रिपोर्ट नआउँदै घर पठाइएकाहरूमा कोरोना पोजिटिभ देखिँदा समुदायमा संक्रमण फैलिन खतरा बढेको छ । दाङका ती १७ जना संक्रमितलाई पछि आइसोलेसनको व्यवस्था गरेर राखिएको वडा सदस्य तुलप्रसाद घिमिरेले जानकारी दिए ।

रुपन्देहीको शुद्धोधन गाउँपालिकाका २ जना कोरोना संक्रमतिलाई बुधबार ३ दिनपछि मात्र आइसोलेसन अस्पतालमा लगिएको छ । सो गाउँपालिका-३ को दुधनाथ थारु क्याम्पसको क्वारेन्टाइनमा रहेका उनीहरूलाई बुधबार ३ दिनपछि आइसोलेसन अस्पतालमा लगिएको हो । शुद्धोधन गाउँपालिका–३ का २८ र १२ वर्षे पुरुषमा ३ दिनअघि कोरोना पुष्टि भएपनि आइसोलेसनमा बेड नभएको भन्दै क्वारेन्टाइनमै राखिएको थियो ।

१५ दिनअघि मात्र दिल्लीबाट आएकाहरूलाई सिधै क्वारेन्टाइनमा राखिएको र ३ दिनअघि मात्र पीसीआर परीक्षणमा कोरोना पोजिटिभ देखिएको गाउँपालिकाका अध्यक्ष किशुनचन्द्र चौधरीले बताए । ‘यसरी संक्रमितलाई राख्दा अरुलाई पनि जोखिम हुने सम्भावना रहन्छ । हामी छिटो व्यवस्थापन गर्छौं भन्दासमेत सवारी पाइँदैन’, अध्यक्ष चौधरीले भने ।

रुपन्देहीकै कञ्चन गाउँपालिकाको रुद्रपुरस्थित लुम्बिनी ज्ञान निकेतनको क्वारेन्टाइनमा अहिले पनि संक्रमित छन् । क्वारेन्टाइनमा कोरोना आशंका गरिएका रहने गरेकोमा संक्रमितसमेत त्यहाँ रहँदा जोखिम बढेको छ ।

संक्रमितलाई अस्पतालमै ल्याएर उपचार गर्नुको सट्टा लक्षण नभएका संक्रमितलाई क्वारेन्टाइनमै राख्ने सरकारको नीतिअनुसार अहिले उनीहरू क्वारेन्टाइमै रहेका हुन् । ‘एक ठाउँमा हुँदा स्वाभाविक रूपमा जोखिम हुन्छ, त्यहाँ बसेकाहरूलाई पनि अप्ठयारो लाग्ने रहेछ’, कञ्चन गाउँपालिकाका अध्यक्ष गोकर्ण क्षत्रीले भने ।

क्वारेन्टाइनमै संक्रमित र देश बाहिरबाट आएका व्यक्तिहरूलाई राख्दा बढी सावधानी अपनाएको उनको भनाइ छ ।

गुल्मीको मुसिकोट नगरपालिका-३ मा रहेको पृथ्वी माविको क्वारेन्टाइनमा रहेका १० जनाको आइतबार कोरोना पोजिटिभ रिपोर्ट आयो । रिपोर्ट आउनुअघि नै ती व्यक्तिहरू घरतर्फ गइरहेका थिए । घर नपुग्दै बाटोमा हिँड्दाहिँड्दै रिपोर्ट पोजिटिभ आएपछि फर्काएर विद्यालयको क्वारेन्टाइनमा ल्याएर राखियो ।

त्यस्तै, बिहीबार डडेल्धुरामा क्वारेन्टाइनबाट घर गएका ५८ जनामा कोरोना पोजिटिभ देखिएको छ । जिल्लाको गन्यापधुरा गाउँपालिकाले क्वारेन्टाइनबाट घर पठाएकामध्ये ५८ जनामा कोरोना पोजिटिभ देखिएको हो ।

कोरोना परीक्षणको रिपोर्ट नआउँदै घर पठाएका गन्यापधुरा गाउँपालिकाका ५८ जना संक्रमण भएको रिपोर्ट बिहीबार आएको हो । गन्यापधुरा गाउँपालिकाले १४ दिन क्वारेन्टाइनमा राख्दा कसैमा पनि कोरोना लक्षण नदेखिएको र स्वाब परीक्षणको रिपोर्ट ढिला भएकोले घर पठाइएको गन्यापधुरा स्वास्थ्य शाखा प्रमुख वासुदेव नौन्याल बताउँछन् ।

अहिले धेरै जिल्लामा रिपोर्ट नआउँदै घर पठाउने र घर पुगेपछि मात्र कोरोना पुष्टि हुने गरेका छन् । धादिङ, कञ्जनपुर, धनुषा लगाएका जिल्लाबाट पनि त्यस्ता खबरहरू आइरहेका छन् । जसले गर्दा कोरोना संक्रमण समाजमा सजिलै फैलिन सक्ने खतरा बढ्दै गएको छ ।

२३ जेठमा बुटवल कोरोना विशेष अस्पतालबाट २७ जना कोरोना संक्रमित डिस्चार्ज भएर घर फर्किएका छन् । कोरोनाका लक्षण नदेखिएपछि उनीहरूलाई डिस्चार्ज गरिएको थियो । त्यसरी डिस्चार्ज भएर जानेलाई २ हप्ता होम क्वारेन्टाइनमा बस्ने गरी अस्पतालबाट पठाइएको हो ।

‘सरकारकै नीतिअनुसार हामीले उनीहरूलाई डिस्चार्ज गरेका हौँ । रिपोर्ट पोजिटिभ आएको खण्डमा अवस्था हेरेर पुनः उनीहरूलाई आइसोलेसन वा होम आइसोलेसनमा राख्छौँँ’, लुम्बिनी प्रादेशिक अस्पतालका कोरोना सम्पर्क व्यक्ति डा. सुदर्शन थापाले भने ।

प्रकाशित मिति: शुक्रबार, असार ५, २०७७ ११:२०