गण्डकीमा क्षेत्रीय अस्पतालको मेडिकल वार्डमा कोरोना संक्रमित राख्ने तयारी

गण्डकीमा क्षेत्रीय अस्पतालको मेडिकल वार्डमा कोरोना संक्रमित राख्ने तयारी

A+ A A-

गण्डकी प्रदेशको कोरोना डेडिकेटेड अस्पतालकारूपमा रहेको पश्चिमाञ्चल क्षेत्रिय अस्पतालको आइसोलेसन वार्ड भरिएपछि विकल्पको रूपमा अस्पतालकै मेडिकल वार्डलाई प्रयोग गरिने भएको छ ।

प्रदेशमा कोरोना संक्रमितको संख्या दिनहुँ बढेपछि अस्पताल प्रशासनले मेडिकल वार्डलाई हटाएर कोरोना संक्रमितका लागि २५ वार्डको आइसोलेसन वार्ड बनाएको हो ।

प्रदेश सरकारले कोरोना महामारी फैलिएको ३ महिना बितिसक्दासमेत कोरोना संक्रमितका लागि भरपर्दो व्यवस्था नगरेपछि गण्डकी प्रदेशकै ठूलो पश्चिमाञ्चल क्षेत्रिय अस्पतालमै १० वेडको आइसोलेसन वार्ड तयार पारिएको थियो । अहिले अस्पतालको आइसोलेसन वार्डमा ९ संक्रमित उपचाररत छन् ।

आइसोलेसन वार्ड भरिन थालेपछि अस्पतालको मेडिकल वार्ड खाली गराई २५ बेड थप गरिएको प्रतिष्ठानका निर्देशक डा. अर्जुन आचार्यले जानकारी दिए । अस्पतालमा बनाइएको आइसोलेसन वार्ड भरिन थालेपछि अब आउने बिरामीहरूका लागि मेडिकल वार्डलाई नै आइसोलेसन वार्ड बनाइएको उनले बताए । अस्पतालको छुट्टै भवनमा केही समयअघि १० बेडको आइसोलेसन वार्ड निर्माण भएको थियो ।

निर्देशक आचार्यले कोरोना संक्रमणका गम्भीर बिरामीहरूको समेत उपचार गर्ने अस्पताल भएका कारण थप वेडसहितको वार्ड बनाइएको बताए । एउटै भवनमा विभिन्न वार्ड भएपनि कोरोना संक्रमितको उपचार गर्नुपर्ने अस्पतालको बाध्यता रहेको उनले बताए ।

क्षेत्रीय अस्पतालमा १२ बेडको आइसियूसहित ४ वटा भेन्टिलेटर रहेका छन् । ४ वटा भेन्टिलेटरमध्ये एउटा हाल संक्रमितको उपचार भइरहेको आइसोलेसनमा राखिएको छ । संक्रमितको उपचारमा ६ नर्स, २ मेडिकल अफिसर र ३ जना सहयोगी खटिएका छन् ।

संक्रमितको उपचारपछि बिरामी आउनै छाडे

दैनिक १ हजार भन्दा बढी विरामी अपचारका लागि आउनले यस अस्पतालमा कोरोना संक्रमितको उपचार थालेपछि सेवा लिन आउनेको संख्या ह्वात्तै घटेको निर्देशक आचार्यले बताए । ‘हामीले कोरोना संक्रमितको उपचार थालेपछि अस्पताल आउने अन्य रोगका विरामीको संख्या घटेको छ’, उनले भने, ‘आकश्मिक र गम्भीर प्रकृतिका विरामीको उपचार भने निरन्तरता दिँदै आएका छौँ ।’

कोरोना संक्रमण देखिनु भन्दा पहिले दैनिक १५ सयको हारहारीमा बिरामी उपचार गराउन आउने गरेको अस्पतालका सूचना अधिकारी नारायण आचार्यले जानकारी दिए । ‘पहिले करिब १५ सय जना दैनिक उपचार गराउन आउने गदर्थे । तर, अहिले अस्पतालमा २ सय जना मात्र आइरहेको छन्’, उनले भने, ‘मेडिकल वार्डलाई आइसोलेसन बनाए पनि अस्पतालका सबै सेवा भने सूचारु रहने छन् ।’

यसअघि गण्डकी प्रदेशकै रेफरल र ठूलो संख्यामा प्रशुतिका लागि महिलासमेत आउने अस्पताल भएका कारण कोरोना संक्रमितको उपचार गराउन नहुने अडान अस्पताल प्रशासनले राखेको थियो । तर, अन्यत्र कुनै वैकल्पिक व्यवस्था गर्न नसकेपछि गण्डकी प्रदशका मुख्यमन्त्री पृथ्वीसुब्बा गुरुङको निर्देशनमा यस अस्पतालमै कोराना संक्रमितलाई रान्ने निर्णय गरिएको थियो । सुरुमा प्रदेश सरकारले पोखराको लेखनाथस्थित लायन्स अस्पताललाई कोरोना संत्रमितका लागि डेडिकेटेड अस्पताल बनाउने निर्णय गरेको भएपनि स्थानीयका बिरोधका कारण पछि हटेको थियो ।

१९ सय स्वाबको नतिजा आउन बाँकी

पछिल्लो समय कोरोनाको ‘हटस्पट’कारूपमा चिनिन थालेको गण्डकी प्रदेशमा कोरोना संक्रमितको स्वाब परीक्षण सुस्त हुन थालेको छ । जनस्वास्थ्य कार्यालयले २ वटा पीसीआर मेसिनबाट कोरोना परीक्षण भइरहेको बताए पनि अझै परीक्षणको गति दु्रत हुन सकेको छैन । गण्डकी प्रदेशका विभिन्न जिल्लाबाट आएका करिब २ हजार स्वाबको नतिजा अझै आउन सकेको छैन ।

हालसम्म गण्डकी प्रदेशमा ८ हजार ५ सय भन्दा धेरै जनाको स्वाब संकलन गरिएको छ । तीमध्ये ६ हजार २ सय ९५ जनामा कोरोना नेगेटिभ देखिएको प्रदेश स्वास्थ्य निर्देशनालयले जनाएको छ ।

यो प्रदेशमा अहिलेसम्म ३ सय २४ जनामा कोरोना पोजिटिभ देखिएको स्वास्थ्य निर्देशक विनोदविन्दु शर्माले जानकारी दिए । उनका अनुसार संक्रमितमध्ये २२ जना निको भएर घर फर्किएका छन् भने १ संक्रमितको मृत्यु भएको छ । प्रदेशको मुस्ताङ बाहेक १० जिल्लामा संक्रमित भेटिएका छन् ।

९० वर्षीय वृद्धमा कोरोना, सम्पर्कमा आएका ६५ जनाको स्वाब संकलन

पोखराको पृथ्बीचोक स्थित रहेको पश्चिाञ्चल सामुदायिक अस्पतालमा उपचार गराउन पुगेका ९० वर्षका बृद्धमा कोरोना पुष्टि भएपछि उनको सम्पर्कका आएका ६५ जनाको स्वाब संकलन गरिएको छ ।

संक्रमितको उपचारमा संलग्न सामुदायिक अस्पतालका डाक्टर, कर्मचारी र परिवारका सदस्य गरी ६५ जनाको स्वाब संकलन गरिएको हो । प्रारम्भिक ट्रेसिङ गर्दा ६५ जना सम्पर्कमा आएको देखिएको छ । त्यसमा ५३ जना अस्पतालमा कार्यरत डाक्टर, नर्स लगायतका कर्मचारी रहेका छन् । बाँकी १२ जना परिवारका सदस्य रहेका छन् ।

ती वृद्धको स्वास्थ्य अवस्था सामान्य रहेको क्षेत्रीय अस्पतालले जनाएको छ । संक्रमित वृद्ध कोरोनाबाट मृत्यु भएका वालिङका ५८ वर्षे पुरुषसँगै पश्चिमाञ्चल क्षेत्रीय अस्पतालको प्रिआइसोलेसनमा बसेका थिए ।

४ दिन अस्पताल बसेर घर गएको भोलिपल्ट पोखरा पृथ्वीचोकस्थित पश्चिमाञ्चल सामुदायिक अस्पतालमा ल्याइएको थियो । ज्वरो आएकाले स्वाब संकलन गरेर पठाइएकोमा मंगलबार आएको रिपोर्टमा कोरोना पोजिटिभ देखिएको थियो ।

प्रकाशित मिति: बिहीबार, असार ४, २०७७ १९:१८