आइसोलेसन अस्पतालमा ३ महिने कोरोना संक्रमित शिशुको चिच्याहट

बच्चा बस्ने क्वारेन्टाइनको भुँइमा बनाइएको बेड/तस्वीर : विकास पराजुली

A+ A A-

बुटवलको धागो कारखानामा बनाइएको अस्थायी कोरोना अस्पतालमा पुग्दा एउटा चिच्चाहट आवाज आइरहन्छ । मानौँ बच्चालाई तिखो केही वस्तुले रोप्दा निस्कने रोदनभन्दा कम लाग्दैन । एक पटक होइन बारम्बार बच्चा रोइरहेको आवाज सुनिन्छ ।

आमाले काखी च्याप्दा समेत उनी रुन छोड्दैनन् । बच्चालाई रुनबाट रोक्न आमाले अनेक प्रयत्न गरिरहन्छिन् । तर, सबै प्रयास अनर्थ बन्छन् । बच्चा भने रोइरहन्छन् ।

कोरोना संक्रमित भएपछि ३ महिने बालक अहिले अस्थायी कोरोना अस्पतालको बेडमा छन् । बच्चाकी आमापनि सँगै छिन् । ‘बच्चालाई पीडा भएर रोएको भने होइन । तर, पनि किन हो खै ? रुन छाडेको छैन’, बच्चाकी आमा सरला योगीले भनिन्, ‘खै किन हो, जन्मेदेखि नै धेरै रुन्थ्यो ।’

रुपन्देहीको कञ्चनगाउँपालिका-५ की योगी १ असारदेखि ३ महिने बच्चासहित बुुटवलको धागो कारखानास्थित कोरोना विशेष अस्पतालमा छिन् । ३ महिने सुत्केरी सरलाको पीडाभन्दा बच्चाको रोदनले सरलाको मन पोल्छ । भारतमा मुटुको अप्रेशन गरेर फर्किएकी उनलाई त्यो उपचारमाभन्दा बच्चा रुँदा बढी मनको घाउ दुःखेको छ ।

बच्चा रोइरहँदा चिकित्सक र नर्स सरला बसेको ठाउँमा पुग्छन् । तर, च्याप्प समातेर अँगालोमा कस्न सबैलाई अप्ठयारै लाग्छ । सरला भने सबै जोखम मोलेर बच्चासँग दिन बिताइरहेकी छन् ।

१ असारमा आईसेलेसन अस्पतालमा आएकी सरला त्यो भन्दापहिले ४ दिन संक्रमित बच्चा सँगै क्वारेन्टाइनमा बसिन् । कञ्जन गाउँपालिकाले तयार गरेको गरगरेस्थित लुम्बिनी ज्ञान निकेतन माविको चिसो छिडीमा ४ दिन कटाएकी उनलाई १ असारमा मात्र आइसोलेसन अस्पतालमा ल्याइएको हो ।

उनलाई बच्चालाई कोरोना पुष्टि भएको थाहा हुँदासमेत कोरोना विशेष अस्पताल र एन्फा एकेडेमीस्थित आइसोलेसन सेन्टरमा बेड अभाव भएको बाहना बनाउँदै गाउँमै फर्काएर विद्यालयकै क्वारेन्टाइनमा राखिएको थियो । बुटवलमा ल्याइएको भएपनि बेड नभएपछि विद्यालयमै लगेर राखिएको उनले गुनासो गरिन् ।

‘हाम्रो २९ जेठमा रिपोर्ट आएको हो । तर, १ गतेसम्म क्वारेन्टाईनमै बस्यौँ’, उनले भनिन्, ‘भुँइमै सुताएर क्वारेन्टाइनमा राखे पनि अहिले भने त्यहाँभन्दा राम्रो छ, खुसी नै छु ।’

११ वैशाखमा योगीको परिवार भारतको नयाँदिल्लीबाट आएको थियो । दिल्लीबाट आउने वित्तिकै लुम्बिनी ज्ञान निकेतनको क्वारेन्टाइनमा उनको परिवार बस्यो । १४ दिन क्वारेन्टाइनमा बसेपछि २२ जेठ आरडीटी गर्दा सरला, आमा र बच्चामा नतिजा पोजिटिभ देखियो ।

२३ गते पीसीआर परीक्षणका लागि स्वाब निकालेर भैरहवा प्रयोगशालामा पठाउँदा २९ गते सरलाबाहेक बच्चाको हजुरआमा र बच्चालाई कोरोना पुष्टि भएको थियो । आमा अहिले पनिक्वारेन्टाइनमै रहेको योगीले बताइन् । ‘श्रीमान् उतै हुनुहुन्थ्यो । मुटुको अप्रेशन गरेपछि माघमा आमालाई बोलाएकी थिए । अनि हामी ११ जेठमा भारतबाट यहाँ आएका हौँ’, उनले भनिन्, ‘भारतमै हुँदा बच्चालाई र मलाई ज्वरो आएको थियो ।’

सरला अहिले माक्स लगाएर बच्चासँग आइसोलेसन अस्पतालमा छिन् । ‘डाक्टरहरूले तपाइलाई पनि लाग्न सक्छ, ख्याल गर्नुस्, भन्नुहुन्छ । अहिले डर मात्र लागिरहेको छ’, उनले भनिन् । क्वारेन्टाइनमाभन्दा आइसोलेसन अस्पतालमा व्यवस्थापन राम्रो भएको उनको अनुभव छ । ‘क्वारेन्टाइन भन्दा यहाँ राम्रो व्यवस्था छ । खानामा मासु पनि दिनुभएको छ । बच्चालाई दूधको व्यवस्था पनि गरिदिनु भएको छ’, उनले भनिन् ।

गाडीको पार्टपुर्जाको कम्पनीमा काम गर्ने योगी उद्योग बन्द भएपछि २ महिना खाली बसे । कोरोना संक्रमण दिल्लीमा झन् तीव्ररूपमा फैलिएपछि उनीहरू गाउँ आएका हुन् । ३० जनाको समूहले दिल्लीबाट नेपाल-भारत सिमानाका सुनौलीसम्म प्रतिव्यक्ति ४ हजारका दरमा गाडी रिजर्ब गरेर आएको सरलाले बताइन् । त्यहाँबाट उनीहरूलाई गाउँपालिकाले उद्दार गरेर क्वारेन्टाइनमा ल्याएर राखेको थियो ।

कोरोना विशेष अस्पतालका फोकल पर्सन तथा वरिष्ठ कन्सलटेन्ट डा. सुदर्शन थापाले बच्चालाई आइसोलेनमा राखिएकाले स्वास्थ्य अवस्था अहिले ठीक रहेको बताए । ‘आमा पनि सँगै भएकाले बच्चाको रेखदेखमा राम्रो भइरहेको छ । हामीले पनि प्रत्यक्ष भेटेर उहाँलाई विभिन्न सल्लाह दिइरहेका छौँ । सुत्केरी भएका कारण पोशिलो खानेकुरा, बच्चाका लागि दूधको व्यवस्था गरेका छौँ’, उनले भने ।

अस्पतालले बच्चाको पीसीआर परीक्षणका लागि बुधबार स्वाब संकलन गरी प्रयोगशालामा पठाएको छ । नयाँ परिवेश र आमा मात्रै भएका कारणले बच्चा अलि बढी रुने गरेको समेत उनले बताए ।

प्रकाशित मिति: बिहीबार, असार ४, २०७७ २१:२५