लकडाउनले एउटै यातायात कम्पनीमा आवद्ध व्यवसायीलाई २ अर्ब बढी घाटा

फाइल तस्वीर

A+ A A-

देशकै अर्थतन्त्रमा ठूलो असर पारेको कोरोना महामारीले यातायात क्षेत्र धरासायी बनेको छ । कोरोना संक्रमणको जोखिमबाट बच्न सरकारले गरेको लकडाउनले यातायात क्षेत्र थला परेको छ ।

लकडाउनको करिब ३ महिनको अवधिमा अर्बौ घाटा यातायात क्षेत्रले ब्यहोरेको नेपालको यातायात क्षेत्रको ३० प्रतिशत हिस्सा ओगटेको पुरानो नारायणी यातायात कम्पनी प्रालिले जानकारी दिएको छ । कम्पनीमा आबद्ध व्यवसायीहरूले लकडाउन अवधिमा २ अर्ब ४७ करोड ५० लाख नोक्सान ब्यहोर्नु परेको छ ।

नारायणी यातायातमा करिब ९ हजारको संख्यामा मालबाहक, सार्वजनिक यातायात र पेट्रोलियम ढुवानी गर्ने सवारी आवद्ध छ । एउटै कम्पनीमा आवद्ध व्यवसायीहरूले मासिक रुपमा ८२ करोड रुपैयाँ घाटा व्यहोर्दै आएको कम्पनीले जानकारी दिएको छ ।

कम्पनीका अध्यक्ष श्रेष्ठले राज्यले समेत विगतमा वेवास्ता गर्दै आएको यातायात क्षेत्रमा कोरोनाले प्रभाव पारेको बताए । ‘कोरोना महामारीले यातायात क्षेत्रमा ठूलो असर ग¥यो । व्यवसायीलाई टिक्नै नसक्ने गरी यस्ले थला पारेको छ । हाम्रो कम्पनीमा आवद्ध व्यवसायीहरुले मात्रै मासिक ८२ करोड रुपौयाँ घाटा व्यहोरेका छन् । यो घाटाले यातायात क्षेत्रलाई पनि सिथिल बनाएको छ’ कम्पनीका अध्यक्ष हिरालाल श्रेष्ठले भने ।

लकडाउनका कारण मालवाहक सवारी सबै सञ्चालनमा आउन नसक्दा यातायात व्यवसायी पलायन हुने संघारमा पुगेको नेपाल ट्रक यातायात व्यवसायी महासंघका केन्द्रीय सदस्य बद्री प्रसाद चौलागाईंले बताए । उनले कम्पनीमा आवद्ध यातायात व्यवसायी मध्ये २५ प्रतिशत व्यवसायी पलायनको संघारमा पुगेको बताए । ‘सडकमा गाडी राखेर व्यवसायी विस्थापित हुने कुरा गरिरहेका छन् । लकडाउनले व्यवसायी विस्थापित हुने निश्चित देखिएको छ’, चौलागाईंले भने ।

लकडाउनमा सवारी थन्काएका यातायात व्यवसायीहरूले बैंकको ब्याज, मासिक किस्ता, मर्मत खर्च र कर्मचारीलाई दिइने पारिश्रमिकसमेत जुटाउन नसकेपछि विस्तापितको संघारमा पुगेको कम्पनीका अध्यक्ष श्रेष्ठ बताउँछन् । ‘बैंक किस्ता, ब्याज तिर्न नसकेर व्यवसायी सडकबाटै हिँड्न थालिसके । गाडी थन्किएको छ, कसरी बैंकको कर्जा चुत्ता गर्छन् व्यवसायी’ श्रेष्ठ भन्छन् ।

लकडाउनमा कम्पनीमा आवद्ध ४० प्रतिशत मालबाहक मात्रै सञ्चालनमा आएको जनाइएको छ । लकडाउन अवधिमा अधिकांश उद्योग ठप्प हुँदा मालवाहकसमेत सञ्चालन हुन सकेनन् ।

लकडाउनले यातायात क्षेत्रमा पारेको विविध समस्या लिएर नारायणी यातायात कम्पनी र नेपाल ट्रक यातायात व्यवसायी महासंघका प्रतिनिधि संघीय सरकारका भौतिक पूर्वाधार यातायात मन्त्रीदेखि बागमती प्रदेशका मुख्यमन्त्री डोरमणि पौडेल, प्रदेशको भौतिक पूर्वाधार विकास मन्त्री, यातायात व्यवस्था कार्यालय, बीमा समिति पुगेका छन् ।

यातायात व्यवसायीहरुले विशेष गरी लकडाउन अवधीको बैैंक ब्याज मिनाहा हुनुपर्ने, बैंक किस्ता अवधी बढाइदिनु पर्ने, सवारी कर तथा जरिवाना तिर्न समयावधी थप गर्नुपर्ने लगायतका माग राखेका छन् । कम्पनीले लकडाउन अवधिमा नवीकरण गर्नुपर्ने सवारीसाधनको सवालमा कार्यालय बन्द भएको र रकम तिर्ने वातावरण नभएका कारण जरिवाना छुट गर्दै लकडाउनको अवधीलाई शून्य समय कायम गर्नुपर्ने माग गरेका छन् ।

प्रकाशित मिति: बिहीबार, असार ४, २०७७ ०६:१९