कोरोना पुष्टि भएको ३ दिनपछि मात्रै पुर्‍याइयो आइसोलेसन अस्पताल

A+ A A-

रूपन्देहीको शुद्धोधन गाउँपालिकाका २ जना कोरोना संक्रमतिलाई ३ दिनपछि मात्र आइसोलेसन अस्पतालमा लगिएको छ । शुद्धोधन गाउँपालिका-३ को दूधनाथ थारू क्याम्पसको क्वारेन्टाइनमा रहेका उनीहरूलाई ३ दिनपछि आइसोलेसन अस्पतालमा लगिएको हो ।

शुद्धोधन गाउँपालिका-३ का २८ र १२ वर्षीय पुरुषलाई ३ दिनअघि कोरोना पुष्टि भए पनि आइसोलेसनमा बेड नभएको भन्दै क्वारेन्टाइनमै राखिएको थियो । १५ दिनअघि मात्र दिल्लीबाट आएका उनीहरूलाई सीधै क्वारेन्टाइनमा राखिएको र ३ दिनअघि मात्र पीसीआर परीक्षणमा कोरोना पोजिटिभ देखिएको गाउँपालिकाका अध्यक्ष किशुनचन्द्र चौधरीले बताए ।

'३ दिनदेखि हामीले क्वारेन्टाइनमै राख्यौँ । अहिले मात्र आइसोलेसनमा बेड खाली भएको भनेर बुटवलको एन्फामा पठाएका छौँ' उनले भने । संक्रमितहरूलाई ओसार्ने सवारी साधन नभएको र भएकाले समेत नलगेपछि स्कुटरमार्फत् उनीहरूलाई बुटवलको एन्फा आइसोलेसनमा पठाइएको उनले बताए । 'ट्याक्टरको ट्रलीमा राखेर भए पनि लैजाऊभन्दा कोही तयार हुँदैनन्, भाडा डबल दिन्छौँभन्दा पनि कोही नभएपछि स्कुटरमा लगिएको हो' उनले भने ।

संक्रमित पुष्टि भएका एक पुरुषको घरमा रहेको स्कुटरमा लैजानका लागि अनुरोध गर्दा परिवारकै सदस्यले स्कुटर दिन नसक्ने बताएका थिए । तर, पछि साइकलमै भए पनि लैजाने भनेपछि मात्र परिवारका सदस्य स्कुटर दिन तयार भएको उनले बताए ।

गाउँपालिकाले यसअघि पनि सवारी साधन नहुँदा संक्रमित व्यक्तिलाई बुटवलमा साइकलमै ल्याएको थियो । आइसोलेसनमा भएको एम्बुलेन्ससमेतलाई खबर गर्दा नआएपछि गाउँपालिकाको गाडी पछि-पछि र संक्रमित साइकलमा अघि-अघि गरेर बुटवल ल्याइएको गाउँपालिका अध्यक्ष चौधरीले बताए ।

साता दिनअघि शुद्धोधन गाउँपालिकाका- ७ का ३२ र ३५ वर्षीय कोरोना पोजेटिभ भएपछि उनीहरूलाई साइकलमै ल्याइएको उनले बताए । उनले चालकहरूले शंकास्पद कोरोनाका विरामी तथा उद्धारका लागि सीमाबाट ल्याउने नागरिक नबोक्दा अप्ठ्यारो भएको बताए । 'शंकास्पदलाई समेत ल्याउन गाह्रो छ, सवारी साधन नै पाइँदैन । हाम्रो गुनासो कसले सुन्ने हो' उनले भने ।

प्रकाशित मिति: बुधबार, असार ३, २०७७ १४:३५