कोरोना भाइरस संक्रमितको जीवन रक्षा गर्ने औषधि पत्ता लाग्यो

A+ A A-

कोरोना भाइरसका संक्रमितको जीवन रक्षाका लागि औषधि पत्ता लागेको विज्ञहरुले बताएका छन् ।

सस्तो र सर्वसुलभ रुपमा पाइने डेक्सामेथासोन नामक औषधिले कोरोना भाइरसका कारण गम्भीर बिरामी भएका व्यक्तिहरूको जीवन जोगाउन मद्दत पुग्ने बेलायतका विज्ञहरूले बताएका छन्।

कम मात्रामा दिइने सो स्टेरोइड औषधिलाई हालसम्म घातक देखिएको कोरोना भाइरसको लडाइँमा उल्लेख्य उपलब्धी मानिएको छ ।

यसले भेन्टिलेटरमा राखिएका बिरामी आठमा एक जना र अक्सिजन दिइएका २५ मा एक जनाको जीवन जोगाउने देखिएको छ।

कोरोना भाइरसको जारी उपचार विधिबारे विश्वभरि गरिएका ठूला परीक्षणहरूको यो औषधि पनि एउटा हिस्सा रहेको थियो। अनुसन्धानकर्ताहरूले यदी सो औषधि सुरू देखि बेलायतमा पाइएको भए ५ हजार जीवन जोगाउन सकिने थियो भन्ने समेत उल्लेख गरेका छन् ।

यो औषधिको मूल्य पनि सस्तो रहेको र यसले उच्च सङ्ख्यामा कोभिड–१९ का बिरामीहरू देखिएका गरिब देशहरूलाई ठूलो राहत दिनसक्ने ठानिएको छ।

डेक्सामेथासोनलाई सन् १९६० देखि नै दम देखि रूमटोइड आर्थ्राइटिसको उपचारका लागि प्रयोग गर्ने गरिएको छ।

कोभिड–१९ को सङ्क्रमण देखापरेपछि भेन्टिलेटरमा राख्नुपरेका आधा बिरामीहरूको ज्यान गइरहेको वर्तमान सन्दर्भमा सो जोखिमलाई एक तिहाइले घटाउनुलाई ठूलो उपलब्धी मानिएको छ।